Revistanchikta leeqkunam tapukunku

¿Bautizanachu wawachakunata?

▪ Victoriam nin, “llumpaytam llakichiwaq limbo nisqankupi sullkachay John kasqanta piensasqay”. ¿Imanasqataq llakikurqa? “Manaraq bautizasqam Johnqa wañururqa, chaymi huk cura nirqa limbopi wiñaypaq kananta.” ¡Chaychiki Victoriaqa llakisqa tarikurqa! ¿Yachachinchu Bibliaqa manaraq bautizasqa wañuq wawakuna wiñaypaq castigasqa kanankuta?

Bibliaqa yachachinmi cristianokunaqa bautizasqa kananmanta. Jesusmi qatiqninkunata kamachirqa: ‘Llapallan nacionpi runakunaman rispayá willamuychik qatiqniykunaña kanankupaq hinaspayá bautizamuychik Taytapa, Churipa hinaspa chuya espiritupa sutinpi’, nispa (Mateo 28:19, 20). Kay textopa nisqanman hinam, bautizakunanpaqqa puntatam Jesuspa discipulon kanan otaq reqsinan, tanteanantaqmi yachachikuyninman hina kawsananpaqpas. Wawakunaqa manam chaykunapaq tanteakuytaqa atinmanraqchu.

Chayna kaptinpas wakin runakunam ninku discipulonkunaman Jesuspa kamachisqanqa wawakunapaqwan kasqanta. Luterano religionmanta huk pastormi nirqa: “Yuyayniyoqpas hinaspa wawakunapas lliwmi bautizasqa kananku. [. . .] Mana chayqa manam huchankumanta pampachasqachu kanqaku aswanqa wiñaypaq castigasqam kanqaku”, nispa. Chayna yachachisqankuqa manam tupanchu Jesuspa yachachisqan kimsa yachachikuykunawan.

1) Jesusqa manam haykapipas yachachirqachu wawakuna bautizaymantaqa. ¿Imanasqataq chaymanta yachananchik? Jesusqa anchatam kallpanchakurqa discipulonkuna Diosta imaynata servinankupaq yachachiypi. Chaymi yapa-yapamanta yachachirqa yachanankupaq kaqkunata allinta entiendenankupaq (Mateo 24:42; 25:13; Marcos 9:34-37; 10:35-45). Hinaptinqa, ¿imanasqataq mana yachachirqachu chulla kutillatapas wawakuna bautizaytaqa? ¿Qonqarunmanchu karqa chaymanta yachachiyta? ¡Manam chaynachu! Wawakuna bautizay obligatorio kaptinqa yachachinmanmi karqa.

2) Jesusqa manam yachachirqachu wañusqakuna ñakarisqanmantaqa. Payqa creerqam Eclesiastes 9:5, nisqanpi: “Wañunanmantam yachanku kawsaqkunaqa. Manam imatapas yachanchu wañuqkunaqa”. Wañusqakunaqa manam ñakarinkuchu purgatoriopi, infiernopi otaq limbopiqa nitaq maypipas, chaytam Jesusqa allinta yacharqa. Chaymi yachachirqa wañusqakunaqa puñuchkaq hina kasqankumanta (Juan 11:1-14).

3) Jesusqa yachachirqataqmi ‘llapallan wañusqakuna kawsarimunankumanta’ (Juan 5:28, 29). Chaywanmi qawachin mana bautizakuspa wañuq millonnintin runakuna kawsarimunankuta. Kawsarimuspankum Diospa yachachikuyninkunamanta yachanqaku hinaspam wiñaypaq kawsanqaku suma-sumaq huertapi hina kay Pachapi (Salmo 37:29).a

Yachamusqanchikman hina Bibliaqa manam yachachinchu wawakuna bautizaymantaqa.

[Willakuy]