¿Imayna runa kasqankutam qawachinku religionpi kaqkunaqa?

Onqoqkunata yanapaq Silviam nin: “Universidadpim estudiarqani religionpi kaq runakunawan, ichaqa examenta qospankupas copiakuqkum chaymantapas drogakuqkum. Manam religionninkupi yachasqankuman hinachu kawsaqku”, nispa.

Leonelpas ninmi: “Llamkaqmasiykunam faltakunku onqoq tukuspanku. Paykunapa religionninkuqa wasipi imapas qawanapaq kaqkunallamanmi rikchakun”, nispa.

Religionninkuqa manam yanapanchu runamasinkuta imayna kawsanankupaqqa. ‘Yanqallam Diosta serviq tukunku, aswanqa tukuy sonqonkuwanqa manam creenkuchu’ (2 Timoteo 3:5). Umalliqninkupas manam allintachu kawsanku, manataqmi Diospa Palabranpa nisqanman hinachu imayna kawsanankupaqpas yachachinku. Chaymi yaqa llapanku piensanku imayna kawsasqankupi Diosqa mana reparasqanta.

¿IMATAM BIBLIAQA YACHACHIN?

Bibliaqa sutillatam yachachin Diosqa sentimientoyoq kasqanta. Israelitakunam mana kasukuq kasqankuwan llumpayta ‘llakichirqaku’ (Salmo 78:40). Ichaqa hanaq pachapim ancha ‘kusikuy’ kan runakuna tukuy sonqonkuwan huchankumanta wanakuspa cambiaptinku (Lucas 15:7). Taytanchik Jehova Diospa sumaq kayninkunata yachasqankum Payta kuyanankupaq yanapan chaynataq cheqnisqanta cheqninankupaq hinaspa kuyasqanta kuyanankupaqpas kallpanchan (Amos 5:15).

¿IMAYNATAQ JEHOVA DIOSPA TESTIGOKUNAQA KANKU?

Paykunamantam huk periodico nirqa: “Familiapi sumaqta kawsanankupaqmi runamasinkuta yanapanku, yanapankutaqmi allin llamkaq chaynataq mana suwakuq kanankupaqpas”, nispa (The Deseret News, de Salt Lake. City Utah, Estados Unidos). Nirqam: “Paykunaqa sumaqta kawsanankupaqmi kallpanchakunku. Manam cigarrota pitankuchu nitaq drogakunkuchu, manataqmi sinkanankukamaqa tomankuchu, nitaq pukllankuchu qollqepaqqa. Manataqmi qaripurapas nitaq warmipurapas pierdekunkuchu nitaq huchapakuypiqa purinkuchu, chaykunaqa Dioswan amistadninkutam yanqachan”, nispa.

¿Imaynatam Diospa sumaq kayninkunamanta yachasqanku Testigokunata yanapan? Silviam nin: “Doctorkunam onqoqkunata engañanku. Chayna engañayqa manam sasachu. Ichaqa engañaqkunata Jehovaa Dios imayna qawasqanmanta yachasqaymi yanapawan runamasiyta mana engañanaypaq. Chayna kawsasqaywanmi kusisqa chaynataq hawka tarikuni”, nispa. Silviaqa convencesqam tarikun religionnin vidanpi imayna yanapasqanmanta.