¿Imaynatam yanapachwan divorciasqa kaqkunata?

Huk cristianam divorciasqa iñiqmasinta kallpanchachkan

Yaqapaschá achka divorciasqakunata reqsinki. Arí, kunan tiempopiqa rakinakuyqa maypiñapas kanmi. Huk willakuypa nisqanman hinaqa, Polonia nacionpis kimsa chunka watankupi kaqkuna kimsa hinaspa soqta watallaraq casarasqa kachkaspanku divorcianakuyman chayanmanku. Ichaqa manam chayna watankupi kaqkunallachu rakinakunku.

Arí, España nacionmanta Instituto de Política Familiar nisqapa willakusqanman hinaqa, “Europa lawpim iskay casarasqakunamanta huk divorciakunku”. Yaqa chaynam huklaw nacionkunapipas.

SONQONKUPI LLUMPAY HUKMANYASQANKUMANTA

¿Imaynam tarikunku divorcianakusqanku qepaman? Europa lawmanta kaq casado vidamanta consejaq warmim nirqa kaynata: “Divorcioqa casarasqa kasqankupi mana allin kawsasqankutam sutillata qawachin, chayqa llumpay hukmanyanapaqmi”, nispa. Nirqataqmi “divorcianakusqanku qepaman piñasqa, ñakakuywan, llumpay hukmanyasqa hinaspa penqaypi tarikusqankumanta”. Chayna tarikuqkunaqa, wakinpiqa wañurachikuytam piensanku. “Divorcianakuspanku tukuy imamanta rakinakuruspankupas, pasaypaq hukmanyasqam hinaspa sapallankum tarikunku. Paykunaqa ichapas tapukunmanku: ‘¿Kunanqa imaynataq kasaq manaña casarasqa kaspayqa? ¿Imatataq vidaywan ruwasaq?’”, nispa.

Ewa sutiyoq cristianam ñawpaqpi imayna tarikusqanmanta yuyarispan nin: “Divorciakurusqay qepaman vecinoykuna hinaspa llamkaqmasiykuna ‘divorciasqa’ niwaptinkum llumpayta penqakuq kani. Chaynata niwaptinkum piñasqa tarikuq kani. Qosaymi saqeruwarqa iskay taksa warmachaykunatawan, chaymi wawaykunapaq tayta-mama karqani”, nispa.a Adam sutiyoq iñiqmasinchikmi chunka iskayniyoq wata congregacionpi anciano karqa, paymi nin: “Mana valeqpaq hina hapikuspaymi wakinpiqa piñasqa tarikuni hinaspapas sapallay kaytam munani”, nispa.

ALLINYANANKUPAQ KALLPANCHAKUSQANKUMANTA

Wakinkuqa unay wataña divorciasqa kaspankupas hinallam kallpanchakunku llumpay hukmanyasqa tarikusqankumanta allinyanankupaq. Ichapas piensanmanku mana pipas llakipayasqanta. Chaymanta yachaq huk warmipa nisqanman hinaqa, “imayna kawsayninkupim cambiananku hinaspapas kikinkum tukuy sasachakuykunata atipayta yachananku”.

Stanisław sutiyoq iñiqmasinchikmi yuyarispan nin: “Señorayqa divorcianakuruptiykum manaña saqewarqachu iskay warmi churichaykunata qawanayta. Chayna ruwawasqanwanmi piensarqani mana kaqpaq pipas hapiwasqanta hinaspa Jehova Diospas saqeruwasqanta. Manañam kawsaytapas munarqaniñachu. Ichaqa, tiempopa risqanman hinam musyakurqani chayna piensasqay mana allin kasqanta”, nispa. Wanda sutiyoq iñiqmasinchikpas ninmi: “Ñoqaqa piensarqanim pipas nitaq iñiqmasiykunapas ñoqatawan wawaykunata mana yanapaykuwanankuta. Kunanmi ichaqa musyakuruni wawaykuna Jehova Diosta servinankupaq uywasqaypi iñiqmasiykuna anchata yanapawasqankuta”, nispa.

Qawasqanchikman hinaqa, wakin divorciakuqkunaqa llumpay mana allin piensaykunawanmi intuchikunku. Ichapas manaña kuyakunkuñachu mana kaqpaq hapikuspanku hinaspa mana pipas paykunapi reparasqanta piensaspanku. Chaymantapas, hukkunapa pantasqankupim astawan reparayta qallaykunmanku, chayraykum piensanmanku congregacionpi iñiqkuna mana kuyakuq kasqankuta. Ichaqa, yaqapaschá Stanisław hinaspa Wanda hina musyakunmanku iñiqmasinkunapa yanapasqankuta. Arí, iñiqmasinkunaqa tukuypim yanaparqaku qallariypi sutillata mana qawakuptinpas.

SAPALLANKU HINASPA QEPANCHASQA TARIKUSQANKUMANTA

Yanapanapaq maynataña kallpanchakuptinchikpas divorciasqa iñiqmasinchikkunaqa wakinpiqa hinallam sapallanku tarikunqaku. Divorciasqa cristianakunaqa astawanraqmi piensanmanku manaña pipas kuyasqanta. Alicja sutiyoq iñiqmasinchikmi nin: “Divorciakusqaymanta pusaq wataña pasaruptinpas, wakinpiqa hinallam mana kaqpaq hapikuni. Chayna tarikuspaymi sapallay kayta munaspay waqakuni hinaspa kikillaypi piensayta qallaykuni”, nispa.

Divorciasqa kaqkuna chaynapi tarikuptinkupas, Bibliaqa ninmi hukkunamanta mana karunchakunankupaq, mana chayqa allin consejokunatapas qepancharunmankum (Prov. 18:1). Ichaqa, manam allinchu kanman sapallanku tarikuqkuna mana warmimasin otaq mana qarimasin kaqpa consejonta otaq yanapakuyninta sapa kuti mañakuyninqa. Mana chayqa sonqonkupim mana allin munaykuna qallaykunman.

Divorciasqa iñiqmasinchikkunaqa tukuy mana allinkunawanmi hukmanyanku. Hamuq tiempopi imayna kanankumanta hukmanyaspankupas, sapallanku hinaspa qepanchasqam tarikunmanku. Chayna tarikusqanku sasa atipanapaq kasqanraykum Jehova Dios hina yanapananchik (Sal. 55:22; 1 Ped. 5:6, 7). Chaynata ruwaptinchikqa ancha agradecesqam tarikunqaku. Qawanqakum congregacionpi kuyakuq achka amistadkuna kasqanta (Prov. 17:17; 18:24).

a Wakin sutikunaqa cambiasqam kachkan.

¿IMATAM RUWAWAQ YANAPANAYKIPAQ?

¿Imaynatam yanapawaq divorciakuruspanku llumpay hukmanyasqa tarikuqkunata? Qaway Bibliapa ima nisqanta hinaspa achka cristianokuna imayna yanapasqankumanta.

Llakipayaspa uyariy. (Prov. 16:20, 23)

Divorciasqa kaqkunaqa ichapas mana willayta munawasunchu imarayku divorciakurusqankumanta. Llumpay hukmanyasqa kachkaspa llutanpi imatapas rimasqankuqa manam allinpaqchu kanman, wakinpiqa astawanraqmi hukmanyarachinman (Prov. 12:25; Rom. 12:15). Rimamusqanchik Adamta yanapaq Michałpa nisqanman hinaqa, hukmanyasqa kaqkunaqa manam tukuy imataraqchu willawananchik llakikuywan uyarinapaqqa. Paymi nin: “Adamtam nirqani hukmanyasqa tarikusqanrayku mana yachanaypaq kaqkunata willaruwaspan ichapas pesakunanmanta”, nispa. Chayraykum Michałqa nirqa tukuytaraq mana yachay munasqanmanta. Chaywanpas allin amistad hinam uyariykurqa. Divorciasqa kaqkunataqa allintam yanapanman huñunakuy manaraq qallarichkaptin otaq tukuruptin kaynata niykuyqa: “¿Imaynallam tarikunki? Mana allinpaschá tarikuchkanki, imapipas yanapaykunaypaqmi kachkani”, nispa.

Yanapay munasqaykita qawachiy. (Filip. 2:4)

Mirosławmi nin: “Señoraywanmi tantearurqaniku tiempota horqospayku divorciasqa cristianata yanapanaykupaq. Wasinpa punkuntam allichapurqaniku hinaspapas paytam doctorman pusarqaniku”, nispa. Chayna yanapay ancha allinpaq mana rikchakuptinpas chayqa allintam yanaparqa. Chay iñiqmasinchikmi pisi-pisimanta iñiyninpi allinña tarikurqa. Chaymantañataqmi precursoraña karqa, hinaspapas 11 watanpi kaq wawanmi bautizakururqa.

Niy imayna tarikusqanta Jehova Dios yachasqanta.

Divorciasqa iñiqmasinchik mana kaqpaq hapikuptinqa, qamqa niwaqmi Diosqa sapakama serviqninkunata kuyasqanta. Diospaqqa “pichinchurruchakunamantapas aswan valeqmi” kanchik, payqa sapakamatam allinpaq hapiwanchik (Mat. 10:29-31). Diosqa “runapa sonqonta” qawasqanraykum divorciasqa kaqkunapa imayna tarikusqanta yachan. Payqa manam saqenqachu payman sonqo serviqninkunataqa (Prov. 17:3; Sal. 145:18; Heb. 13:5). Chaynaqa, yanapay munasqaykita qawachispaykipas, niy yupaychayninpi kallpanchakusqanta Jehova Dios chaninchasqanta (Filip. 2:29).

Iñiqkunawan hukllawakunanpaq kallpanchay.

Mana allin tarikuspankum wakinkuqa huñunakuykunaman mana rinkuchu, chayna kaptinpas huñunakuykunaman riyqa ancha allinmi kallpanchawasqanchikrayku (Sal. 122:1; 1 Cor. 14:26). Chayraykum ancha allin ancianokuna divorciasqakunapa hichpallanpi hina kayninkuqa. Rimamusqanchik Wandam nin: “Hinallaraqmi yuyachkaniku kuyakuywan yanapaykuwasqankuta”, nispa.

Bibliata estudiaspan, mañakuspan hinaspa yuyaymanaspan Dioswan amistadnin allin kananpaq kallpanchay. (Sant. 4:8)

Jehova Dios tukuy atiyniyoq hinaspa hanaq pachapi kaspanpas, qawachkanmi ‘llakisqa kaqkunata, sonqonkupi hukmanyasqakunata chaynataq palabranta uyarispan katkatataqkunata’. Chayna kasqanmanta divorciasqa kaqkunata yuyarichiy hinaspapas niytaq Bibliata estudiaspan chaynataq mañakuspan Diosman asuykuptinqa pay yanapaykunanmanta (Is. 66:2, NM).

Niy Diosmanta willakuq lloqsinaykichikpaq otaq huñunakuypaq kuska preparakunaykichikpaq.

Chayna ruwasqanchikmi divorciasqa cristianota yanapanqa hawkalla tarikunanpaq. Divorciakusqan qepaman hukmanyasqa tarikuq cristianata yanapaq Martam nin: “Kuskam Diosmanta willakuq lloqsirqaniku. Kusikunikum Dios servisqaykupi imapas tanteasqaykuta haypaspayku. Wakinpiqa kuskayku huñunakuypaq preparakuruspaykum miski mikuyta yanukuniku”, nispa.