Armayta aparikuspam maymanpas riq kani

ÑAWPAQ VIDAY:

Romapim nacerqani hinaspa wiñarqani mana allin hinaspa wakcha runakunapa kasqan sitiopi. Taksaymantam ancha sasachakuypi tarikurqani. Mamaytam mana reqsirqanichu, taytaywanpas manam entiendenakurqanikuchu. Mana allin runakunapa kawsasqanman hinam wiñarqani.

Chunka watallaypiraqmi suwakuyta qallaykurqani, 12 wataypiñataq wasiymanta pasakurqani. Achka kutipim comisariamanta taytay horqowarqa. Chaylla piñakuq kasqaywanmi piwanpas sapa kutilla kaminakuq kani. 14 wataypiqa wasiymantam pasakurqani manaña kutimunaypaq. Drogakuspaymi callekunapi tiyaq kani. Tutapiñataq mayqen carrotapas kichaspay chaypi puñuq kani, achikyaqtañataq maymanpas yakupa kasqanman rispay mayllakuq kani.

Hichu-hichu suwam rikurirurqani. Tukuytam suwakurqani: warmikunapa bolsantam otaq carterantam qechuq kani, chaymantapas wasikunamanmi tuta yaykuq kani. Chayna kasqaywanmi allinta reqsichikurqani, chaymi manchakuypaq mana allin runakuna otaq pandillerokuna niwarqaku paykunawan juntakunaypaq. Paykunawanqa astawanraqmi suwakuyta yacharurqani, bancokunamantañam qollqeta suwakurqani. Llumpay maqakuqllaña kaptiymi paykunaqa respetawarqaku. Armayta aparikuspam maymanpas riq kani, puñuspaypas sawnay ukupim churaq kani. Maqakuq, drogakuq, suwakuq, huchapakuq hinaspa millayllaña rimaqmi karqani. Policiam maskawaspan achka kutipi hapiwarqa. Unay watakunam karqani callepi hinaspa carcelpi.

BIBLIAM VIDAYTA CAMBIARURQA:

Achka kutipim carcelmanta lloqsirqani, chaymi hukkaqnin kutipi huknin tiayta watukurqani. Ñoqaqa manam yacharqanichu tiayqa iskaynin wawankunapiwan Testigoña kasqankuta. Paykunam hukkaqnin huñunakuyninkuman invitawarqaku; yachaytam munarqani imayna kasqanta, chaymi rirqani. Huñunakunanku Salonman chayaruspaymi qepallapi tiyanaypaq nirqani, chaynapi pikuna yaykumusqanta otaq lloqsisqanta qawanaypaq. Chaymanpas armayoqmi rirqani.

Chay huñunakuymi vidayta cambiaruwarqa. Yuyachkaniraqmi, chay huñunakuypiqa tarikurqani muspayniypi hinam. Muyuriqniypi kaqkunam kusisqallaña hinaspa kuyakuqllaña karqaku. Chay huñunakuypi Testigokuna kuyakuywan qawariwasqankutam kunankamapas hinalla yuyachkani. Mana allin vidapi kasqaymantaqa huk vidapipas kayman hinam sientekurqani.

Testigokunawan Bibliata estudianaypaqmi tanteakurqani. Estudiasqayman hinam cuentata qokurqani imayna kawsasqayta cambianaypaq. Sonqoymanmi chayaruwarqa Bibliapi leesqay, ninmi: “Yachayniyoq runakunawan juntanakuspaykiqa yachayniyoqmi kanki. Sonso runakunawan juntanakuspam ichaqa sasachakuypi kanki”, nispa (Proverbios 13:20). Chaywanmi cuentata qokururqani pandillero amistadniykunawan manaña juntakunaypaq. Chayqa sasam karqa, ichaqa Jehova Diospa yanapayninwanmi atirqani.

Cuerpoypipas chuyanchakurqanim. Anchatam kallpanchakurqani cigarrota manaña pitanaypaq, chaynataq manaña drogakunaypaqpas. Hatun chukchaytam kuchuchikurqani, aretekunawanpas manañam churakurqanichu, millay rimaq kayniypipas cambiarqanim. Chaykunawanmi musyakurqani vidaypi cambiay atisqayta.

Manam haykapipas munarqanichu leeytawan estudiaytaqa, chaymi anchata sasachakurqani Bibliata estudiaspa entiendeypi. Ichaqa pisi-pisimantam Jehova Dios kuyayta qallaykurqani. Chaymi imayna kawsasqayta cambiayta qallaykurqani, chaymantapas concienciaymi acusawarqa, sapa kutillam hukmanyasqa sientekurqani, piensarqanim tukuy mana allin ruwasqayta Jehova Dios mana pampachawananpaq kasqanta. Chayna tarikuspaymi Davidmanta willakuyta leeq kani, paytam Jehova Dios pampacharqa hatun huchankunamanta, chaywanmi consuelasqa sientekurqani (2 Samuel 11:1–12:13).

Sasachakurqanitaqmi wasin-wasin predicaq rinaypaqpas (Mateo 28:19, 20). Anchatam manchakurqani suwasqay otaq imanasqay runakunawan tuparuyta. Ichaqa tiempo pasasqanman hinam chayna manchakuyniyta atiparurqani, chaymi kusisqa willakurqani taytanchik Jehova Diosmanta, payqa ima huchanchikmantapas pampachawaqninchikmi.

BENDICIONKUNA CHASKISQAYMANTA:

Jehova Diosta reqsisqayqa wañuymantam libraruwan. Ñawpa amistadniykunam wakinqa wañurunkuña, wakinñataq carcelpi kachkanku. Ñoqam ichaqa kawsakuchkani hamuq tiempopi suyakuyniyoq. Yacharunim humillakuyta, kasukuyta, chaynataq chaylla piñakuq kayniy controlaytapas, chayna kasqaymi yanapawan ladoypi kaqkunawan hawkalla kawsakunaypaq. Kunanqa buenamoza warmiwanmi casarasqa kachkani, paypa sutinmi Carmen. Kuskaykum runakunata yanapachkaniku Bibliamanta yachachiypi.

Kunanqa manaña suwakuspam vida pasanaypaq llamkapakuniña. Hinallaraqmi bancokunaman yaykuchkani, ichaqa manam suwakunaypaqchu aswanqa limpianaypaqmi.