“Mañakuykiqa huk watalla kusisqa hinaspa hawka kawsakuytam”

ÑAWPA VIDAY.

Francia nacionpa, Tellancourt llaqtapim yacharqaniku. Taytayqa Franciamantam karqa, mamayñataqmi Italia nacionmanta. Pusaq watachaypi kachkaptiymi Italia nacionpi Roma llaqtaman ripukururqaniku, hinaspam yacharqaniku llumpay wakcha runakunapa kasqanku lawpi. Wasiypiqa tayta-mamaymi qullqimanta llumpayta piñanakuqku.

15 wataypi kachkaptiymi mamayqa kallpanchawaq amistadkunata hawapi maskanaypaq. Chaymi manapas unayllapi mana allin runakunawan amistadta ruwarqani. Huk kutipim huk runa asuykamuwaspan sumaq simillawan drogata munachiwarqa hinaptinmi yuyayniyuqta hina qawawanankuta munaspay drogataqa chaskikurqani. Chayllamá drogakuyta qallaykurqani hinaspam achka warmikunawanpas kayta qallaykurqani. Achka kutitataqmi violaruwarqakupas. Ñuqapaqa wañuypas, kawsakuypas chaynallam karqa, manam imapas qukuwaqchu. Mana piniyuq hinam tarikurqani. 16 wataypi kachkaspaymi wañuyta munaspay huk botella wiski tragota tomaruspay quchaman wischukuykurqani. Ichaqa manam wañurqanichu, aswanqa kimsa punchawmi wañunayastin karqani.

Chaymantapacham kawsakusqaytaqa allinpaqña qawarqani ichaqa maqakuqllaña kayta yacharuspaymi suwakuq kani. Qullqiraykum runakunata niq kani paykunawan warmi-qari hina puñunaypaq, wasinkuman chayaspayñataqmi drogaruspay tukuy imankuta apakuq kani. Achka droga rantikuqkunapa drogantam Italia nacionpi aypuq kani. Sapa kutim policiakuna hapiwaqku. Mana allin kawsakuspaypas sunquypiqa allin kawsakuytam munarqani. Chaymi Diosta mañakuspay nirqani: “Mañakuykiqa huk watalla kusisqa hinaspa hawka kawsakuytam”, nispa.

BIBLIAM VIDAYTA CAMBIARURQA.

Droga rantikuqkuna wañuchiwananpaq maskawaptinkum 24 wataypi kachkaspay Inglaterra nacionman ripukunaypaq tantearurqani. Manaraq ripukuchkaspaymi mamay watukuq rirqani, hinaptinmi mana imanakuytapas atirqanichu Annunziato Lugarà sutiyuq runata mamaywan bibliamanta rimachkaqta qawaykuspay.a Annunziatoqa ñawpaq riqsisqay suwam karqa, chaymi mancharikuspay tapurqani chaypi ima ruwasqanta. Hinaptinmi willawarqa Jehova Diospa testigon kananpaq tukuy ima ruwasqanmanta, hinaspam chunkay-chukayta niwarqa Inglaterraman chayaruspay Jehova Diospa testigonkunata maskanaypaq. “Maskasaqmi” nichkaspaypas Inglaterraman chayaruspayqa hinallam mana allinkunata ruwarqani.

Huk punchawmi Londres llaqtapi rikururqani Jehova Diospa testigonta Willakuq hinaspa ¡Rikchariy! qillqakuna aypuchkaqta. Chaypim yuyarirurqani Jehova Diospa testigonkuna maskanaypaq Annunziatopa niwasqanta, chaymi qillqa aypuq testigota nirqani bibliamanta yachachiwananpaq.

Bibliamanta yachasqaymi yuyaymanarachiwarqa. Sunquymi tiyaykurqa 1 Juan 1:9 nisqanmanta yacharuptiy. Chaypim Diosmanta nin: ‘Payman huchanchikkunata willakuptinchikqa paymi mana engañakuq hinaspa allin ruwaq kasqanrayku pampachawanchik hinaspam tukuy mana allin ruwasqanchikmanta mayllawanchik’, nispa. Dios chayna pampachakuqllaña kasqanta yachasqaymi yanapawarqa mana allin kawsakuyniyta saqinaypaq. Chayllamá Jehova Diospa testigonkunapa huñunakuyninman riyta qallaykurqani, chaypim kusikuyllawanña chaskiykuwarqaku. Sumaq kawsakusqankuta hinaspa kuyanakusqankuta qawaspaymi ñuqapas paykuna hina kayta munarqani.

Mana sasachakuspallam mana allin ruwasqaykunataqa saqirqani, ichaqa genioy cambiaymi sasa karqa. Musyakurqanim aswan respetakuq hinaspa kuyapayakuq kanaypaq kallpanchakunayta, kunankamapas hinallam kallpanchakuchkani. Jehova Diospa yanapawasqanwanmi runayachkaniña. Biblia estudiasqaymanta 6 killa pasaruptinmi 1997 watapi Jehova Diospa testigon kanaypaq bautizakururqani.

IMAKUNAPIM YANAPAWARQA.

Bautizakurusqay qipallatam Barbara sutiyuq iñiqmasiywan casarakururqani, paypas chayraq bautizasqam kachkarqa. Allinña kawsakusqayta qawaspanmi ñawpa amistadniy biblia estudiayta qallaykurqa. Kunanqa paninpiwanmi paypas Jehova Diospa testigonña. Chaynallataqmi abuelaypa ñañanpas 80 watanpiña bibliata estudiarqa hinaspam bautizakururqa.

Kunanqa iñiqmasiykunamanta huknin nanachikuqmi kani, warmichaypiwanmi Londres llaqtapi italiano rimaq runakunaman Diosmanta willakuspa yachachiniku. Wakinpim ñawpa vidayta yuyarispay hukmanyani, ichaqa warmichaymi sapa kuti kallpanchallawan. Kayqaya kunanqa Diospa kuyasqan aylluywan hawka kawsakuni. Jehova Diostam mañakurqani huk watalla kusisqa hinaspa hawka kawsakunaypaq, ichaqa unayñam chaynata kawsachiwachkan.