Bibliata imakuna pasasqan

Bibliaqa manam sapaq librokuna hinachu. Bibliaqa una-unay watakunañam wara-waranqantin runakunata yanapachkan Diospi iñinankupaq. Manataqmi biblia hinaqa huk libroqa kanchu achka-achka runakunapa estudiasqan nitaq chinkarachiyta munasqankupas.

Wakin yachaysapa runakunam ninku, kay tiempopi bibliakunaqa ñawpaq kaq qillqakunaman hina manaña kasqanta. Religionmanta yachachiq profesormi nin: “Manam yachanchikchu ñawpaq kaq qillqakunapa nisqanman hina imam kaqta ruwasqankuta, ñawpaq kaq qillqakuna ruwasqankumanta pacha-pachaknintin watakuna pasaytañam kunan kaq bibliakunataqa yaqa llapanta ruwarqaku, chaymi kay tiempopi bibliakunaqa ñawpaq kaq qillqakunawanqa mana tupanchu, hinaspapas puraminti pantayniyuqmi”, nispa.

Hukkunañataqmi bibliapa yachachisqanmantaqa iskayrayanku sapaq religionniyuq kasqankurayku. Faizal sutiyuq runapa tayta-mamanmi mana Jesucristota qatiqkuchu, paytam yachachirqaku bibliaqa Diosmanta kasqanta, ichaqa nirqakum yachachikuyninkuna manaña ñawpaq qillqakunawan tupasqanta. Faizalmi nin: “Pipas bibliamanta rimapayawaptinqa manam uyariqchu kani, biblian cambiasqa kasqanta piensaspay”, nispa.

Sichum biblia cambiasqa kaptinqa, ¿yaqachu qipa punchawpaq bibliapa sumaq willakuyninkunata chiqappaq hapiwaq? (Romanos 15:4). Kay tiemponchikpi bibliakuna pantayniyuqllaña kasqanta piensaspaykiqa, ¿yanapachikuwaqchu llamkaynikimanta, aylluykimanta hinaspa Dios yupaychaynikimanta allinta tanteakunaykipaq?

Ñawpaq kaq qillqakuna manaña kaptinpas yanapachikuchwanmi, chay qillqakunamanta achkallaña kaq copiakunawan. ¿Imanasqataq bibliaqa mana chinkarqachu imapi qillqasqa kasqan mawkayaruptinpas, chinkachiyta munaptinkupas hinaspa textonkunata cambiayta munaptinkupas? ¿Imanasqataq kaykunamanta yachayqa kunan tiempopi bibliapa yachachisqanpi hapipakunapaq yanapawachwan? Qatiqnin yachachikuypi kay tapukuykunamanta ima nisqanta qawaykuy.