QARANPI KAQ YACHACHIKUY | ANGELKUNAQA ¿YANAPAWANCHIKMANCHU?
¿Imaynatam angelkunaqa yanapawanchik?
Angelkunaqa Diospa munayninta ruwaypim kachkanku, paykunaqa runakuna yanapaytam munanku. Dios kay pachata unancharuptinmi ‘llapallan angelkuna qaparillawanña kusikurqaku’ (Job 38:4, 7). Angelkunaqa yachaytam munarqaku Diosmanta willakuqkunapa nisqanku imayna kay pachapi ruwakunanmanta (1 Pedro 1:11, 12).
Bibliam willakun, angelkunaqa Diospa munayninta ruwanankupaq Diospa runankunata waqaychasqankumanta (Salmo 34:7). Qatiqninpim chaymanta qawasunchik:
Sodoma hinaspa Gomorra llaqtakunata Jehova Dios chinkachiptinmi, angelkunaqa Lotta hinaspa ayllunta yanaparqaku chay llaqtamanta ayqinankupaq (Genesis 19:1, 15-26).
Diosta serviq kimsa mozokunata rupachkaq hornoman wañunankupaq Babilonia nacionta kamachiq wischuykachiptinmi, Diospa ‘angelnin chay mozokunata libraykurqa’ (Daniel 3:19-28).
Diosmanta willakuq Danieltapas leonkunapa kasqan machaymanmi wischuykurqaku, ichaqa Diospa angelninmi leonkunapa siminta wichqarurqa Danielta mana mikunankupaq (Daniel 6:16, 22).
Ñawpaqmantaraqmi angelkunaqa Diospa runankunata yanaparqaku
JESUSPA QATIQNINKUNATAPAS ANGELKUNAQA YANAPARQAM
Jesuspa punta qatiqninkunatam angelkunaqa yanaparqaku Diospa munayninta ruwanankupaq. Chaymantam qatiqninpi yachasun:
Huk kutipim Diospa angelnin apostolkunata carcelmanta hurqurqa, chaynapi hinalla Diosmanta willakunankupaq (Hechos 5:17-21).
Huk kutipipas Diospa angelninmi Diosmanta willakuq Felipeta kacharqa Etiopia nacionniyuq runaman Diosmanta yachachinanpaq, chay runaqa Jerusalen llaqtamantam kutichkarqa (Hechos 8:26-33).
Diosmi munarqa mana judio kaq runakunapas Jesuspa qatiqnin kanankuta, chaymi mana judio kaq Cornelio sutiyuq runata angelninwan rimapayarqa apostol Pedrota wasinman qayachinanpaq (Hechos 10:3-5).
Apostol Pedrotapas carcelman hinaruptinkum Diospa angelnin libraykurqa (Hechos 12:1-11).
¿KUNANQA YANAPAWANCHIKCHU?
Manañam apostolkunapa tiemponpi hinañachu kunan tiempoqa angelkunaqa runakunataqa yanapachkan. Ichaqa Jesusmi nirqa: “Diospa munaychakuyninmanta kay sumaq willakuymi willakusqa kanqa enterollan kay pachapi llapallan nacionpi runakuna yachanankupaq, chayñam tukuy imapas tukunqa”, nispa (Mateo 24:14). Chay willakuypim angelkunaqa yanapakuchkanku, ¿imaynata?
Angelkunam yanapakuchkanku enteron pachapi runakuna Diosmanta yachanankupaq
Apocalipsis qillqam willakun angelkunaqa Diosmanta runakuna yachanankupaq yanapakusqankuta. Chaymantam apostol Juan nirqa: “Rikurqanitaqmi hanaq pachapa chawpinta pawachkaq huk angeltapas, paymi wiñaypaq kaq sumaq willakuyta apachkasqa kay pachapi yachaqkunaman willakunanpaq. Arí, apachkasqaqa llapallan nacionkunaman, castakunaman, tukuy rikchaq rimayniyuqkunaman hinaspa lliw llaqtakunamanmi. Paymi kallpawan nirqa: ‘Diosta respetaspayá hatunchaychik juzganan hora chayaramusqanrayku. Chaynaqa hanaq pachatapas, kay pachatapas, lamar quchatapas hinaspa pukyukunatapas unanchaqtayá yupaychaychik’”, nispa (Apocalipsis 14:6, 7). Diosmanta willakuypi angelkuna yanapakusqankumantam achka willakuykuna kan. Hinaspapas, huchanmanta wanakuq runa Jehova Diosman kutirikuptinpas angelkunaqa kusikunkum (Lucas 15:10).
¿Imam kanqa Diosmanta willakuy tukuruptinqa? Jesucristom hanaq pacha angelkunawan kuska Diospa piñakuynin punchawpi tukunqa mana allin runakunata (Apocalipsis 16:14-16; 19:14-16). Arí, chay punchawpim angelkunaqa Diospa kamachisqanman hina “Jesusmanta sumaq willakuyta mana kasukuqkunata” tukunqaku (2 Tesalonicenses 1:7, 8).
Angelkunaqa munanmi llapallan runakuna Diosta servispa salvakunankuta, paykunaqa munanmi runakuna yanapayta. Qawamusqanchikman hinam, Jehova Diosqa angelninkunawan ñawpaq tiempopi achka kutipi runankunata yanaparqa hinaspa kallpancharqa (Hebreos 1:14).
Kunanpas, sapakamam tanteakunanchik angelkunapa yanapakuyninwan Diosmanta willakusqankuta chaskikunapaq utaq manapas. Jehova Diospa testigonkunaqa kusisqam yanapasunki Diosmanta astawan yachanaykipaq.