Bibliaqa hamuq tiempopaqmi yanapawanchik

QANMI sapallayki kichki ñanta richkawaq tuta. Ichaqa chuyay-chuyay achkiq hatun linternayuq kasqaykiraykum mana qalaypaq chinkasqachu tarikunki. Pampata achkiykuspaykim sumaqta rikunki ñawpaqnikipi ima kasqanta. Karu ñawpaqnikita achkiykuspaykipas allintamá rikunki maynin ñan kasqantapas.

Chay linterna hinam bibliapas allintapuni yanapawanchik. Pasaq yachachikuykunapi qawamusqanchikman hinam Diospa palabranqa yanapawanchik kawsakuyninchikpi tukuy ima sasachakuykunata atipananchikpaq. Ichaqa manamá chayllapichu yanapawanchikqa. Bibliaqa yanapawanchiktaqmi wiñay kawsayman apaq ñanninta rinanchikpaqpas (Salmo 119:105). ¿Imaynata?

Puntatam yanapawanchik 1) kusisqa kawsakunapaq, yanapawanchiktaqmi 2) unanchawaqninchikwan wiñaypaq kuyachikunapaqpas. Chaykunamantam qatiqninpi yachasunchik.

1. KUSISQA KAWSAKUNAPAQ IMATA RUWANAMANTA

Bibliaqa wakin qillqakunamantapas astawanraqmi yanapawanchik ima sasachakuytapas atipananchikpaq. Yachachiwanchikmi runamasinchikkunata llakinkunapi yanapananchikpaq. Chaynata ruwaspanchikqa kusisqam kawsakusunchik.

Bibliam nin: “Imapas quqmi aswan kusisqaqa imapas chaskiqmantaqa”, nispa (Hechos 20:35). ¿Yaqachu pitapas yanapaykurqanki qullqikiwan? ¿Yaqachu amistadnikita sumaqta uyariykurqanki llakinkunata willasuptiki? Hukkunata yanapaykuspanchikqa kusisqamá tarikunchik ¿aw?

Mana imallapaq hukkunaman imallanchiktapas quykuspaqa aswan kusisqamá tarikunchik. Qillqakunata ruwaq runam nirqa: “Yaqa llapanpiqa hukkunamanqa imatapas qunchik kutichiwananchikta suyaspallanchikmi. Wakillanpim qunchikqa mana imallapaqqa”, nispa. Ichaqa mana imallapaq quptinchikpas Diosninchikmi kutichipuwasun, aswanraqmi mana kapuqniyuqkunata yanapaykuptinchikqa (Proverbios 19:17). Diosqa anchatam chaninchan hukkunarayku imapas ruwasqanchiktaqa, chaymi kay allpa pacha sumaq huerta kaptin wiñaypaq kawsakuyta quwasunchik. ¡Mayna kusikunapaqmá chayqa kanqa! (Salmo 37:29; Lucas 14:12-14).a

Chayna kaptinpas, bibliaqa yachachiwanchikmi Jehova Diosta yupaychaspalla kusisqa kawsakunanchikmanta. Palabranpim niwanchik payllata hatunchananchikpaq hinaspa kasukunanchikpaq (Eclesiastes 12:13; Apocalipsis 4:11). Chayta ruwaspanchikqa unanchawaqninchiktam kusichinchik. Paymi niwanchik: ‘Churilláy, yachayniyuqyá kay, sunqullaytayá kusichiy’, nispa (Proverbios 27:11). ¿Yaqachu haykapipas chayna nisqanpi yuyaymanarqanki? Bibliapa nisqanman hina imata ruwananchikpaqpas tanteaspanchikqa hanaq pachapi kaq kuyakuq taytanchiktam kusichinchik. ¿Imanasqam chaynata ninchik? Payqa ñuqanchikmantam nanachikun, chaymi munan kamachikuyninkunata kasukuspa allin kawsakunanchikta (Isaias 48:17, 18). Llapallan kamachiq Jehova Diosta yupaychaspanchikqa kusisqamá kawsakusunchik.

2. UNANCHAWAQNINCHIKWAN KUYACHIKUNAPAQ IMATA RUWANAMANTA

Bibliaqa yachachiwanchiktaqmi imata ruwaspa unanchawaqninchikwan kuyachikunapaqpas. Bibliam nin: “Diosman asuykuptikichikqa paypas asuykusunkichikmi”, nispa (Santiago 4:8). Ichapas iskayrayachwan tukuy atiyniyuq Diospa kuyasqan kaymanta. Bibliam ichaqa niwanchik Diosta maskaspaqa tarinanchikmanta, “payqariki manam llumpay karupichu ñuqanchikmantaqa kachkan” (Hechos 17:27). Bibliapa nisqanta kasukuspanchikqa Diospa kuyasqanmi kasunchik, hinaspapas hamuq punchawpim wiñay kawsayta chaskisunchik. ¿Imanasqam chaynata ninchik?

Kaypi yuyaymanay: Imataña ruwaspapas manam wañuymantaqa librakuyta atichwanchu (1 Corintios 15:26). Diosmi ichaqa wiñaypaq kawsaq. Payqa manam haykapipas wañunqachu, chaymi munan kuyasqankunapas wiñaypaq kawsakunankuta. Jehova Diosmi maskaqninkunata kaynata nin: ‘Wiñaypaqmi kawsakunkichik’, nispa (Salmo 22:26).

¿Imaynatam Dioswan wiñaypaq kuyachikuchwan? Chaypaqqa paymantam bibliapi astawan yachananchik (Juan 17:3; 2 Timoteo 3:16). Chaypaqmi Diosta mañakunanchik palabranta entiendenanchikpaq. Bibliam niwanchik aswan yachayniyuq kananchikpaq Diosta sunqumanta mañakuptinchikqa payqa quwananchikmantab (Santiago 1:5). Chaymantapas, kallpanchakunanchikmi yachasqanchikkunata kasukunanchikpaq. Chayta ruwaptinchikqa Diospa palabranmi ‘achki’ hina yanapawasunchik allinta kawsakunapaq hinaspa wiñay kawsaytapas haypananchikpaq (Salmo 119:105).