Kunanpas kusisqa kawsakuytaqa atichwanmi
LLAPANCHIKMI munanchik mana unquspa, mana yuyaqyaspa nitaq mana wañuspa kawsakuyta. Chaynam hamuq tiempopi kawsakusunchik. Ichaqa, kunan tiempoqa sasachakuypa chawpinpiraqmi kawsachkanchik. Chaywanpas, ¿atichwanchu kusisqa kawsakuyta? Arí atichwanmi, chaypaqmi biblia yanapawanchik. Niwanchikmi kusisqa kawsakunapaq imakuna ruwanamanta.
KAPUQLLANCHIKWAN KAWSAKUYTA YACHASUN
Bibliam niwanchik: “Amayá qullqilla maskaymanqa qukuruychikchu, aswanqa imam kapusuqnikichikwanyá hawka kawsakuychik”, nispa (Hebreos 13:5).
Runakunam niwanchik “kayta utaq wakta rantispaykiqa kusisqam kawsakunki” nispa. Bibliam ichaqa niwanchik mana tukuy imayuq kaspapas kusisqa kawsakuyta atinanchikmanta. ¿Imatam ruwachwan kusisqa kawsakunapaq?
Manam qullqilla kuyaqqa kananchikchu. Qullqita kuyasqankuraykum wakin runaqa ayllunkuwanpas manaña allinchu kanku, mana respetakuqña kanku hinaspa amistadninkuwanpas chiqnichikunku (1 Timoteo 6:10). Qullqilla kuyaq runapaqqa manam maynaña qullqiwanpas ‘sunqunqa tiyanchu’ (Eclesiastes 5:10).
Yuyananchikmi imamantapas aswan allinqa runamasinchik kasqanta. Wakin rantisqanchikqa allintam serviwanchik, ichaqa manam kuyawanchikmanchu, runallam kuyanakuytaqa atinchik. Chaymi allin amistadniyuq kayqa kusichiwanchik (Proverbios 17:17).
BIBLIAPA NISQANTA KASUKUSPAQA KUSISQAM KAWSAKUSUNCHIK
UNQUSPA IMA RUWANAMANTA
Bibliam niwanchik: ‘Kusisqa sunquqa allin hampim’ nispa (Proverbios 17:22).
Kusisqa kayqa yanapawanchikmi unquspapas mana llakisqallaña kanapaq. Ichaqa, ¿imakunatam ruwananchik kusisqa kanapaq?
Agradecekuqmi kananchik. Unqusqanchikrayku llakisqallaña kaspanchikqa sapa punchawmi hukmanyasqalla tarikusun (Proverbios 15:15). Bibliam niwanchik mana llakisqallaña kanapaqqa ‘agradecekuq’ kananchikmanta (Colosenses 3:15). Agradecekunam imapas allinkuna chaskisqanchikmanta. Diostam agradecekuchwan intimanta, wayramanta hinaspa tukuy imamanta. Ayllunchiktapas agradecekuchwanmi yanapawasqanchikmanta.
Runamasinchikta yanapasunchik. Unquqkunaqa imatapas pimanpas quspankuqa kusisqam tarikunku. Bibliapa nisqanman hinaqa “imapas quqmi aswan kusisqaqa imapas chaskiqmantaqa” (Hechos 20:35). Imapas ruwapusqanchikmanta pipas agradecekuwaptinchikqa kusisqam tarikunchik, llakinchiktapas qunqarinchikraqmi.
YANANCHIKWAN KUSISQA KAWSAKUSUN
Bibliam niwanchik: “[Kallpanchakuychikyá] imakuna aswan allin kasqanmanta yachanaykichikpaq”, nispa (Filipenses 1:10).
Casarasqakuna kuska kanankupaq mana tiempochakuspankuqa pisi-pisimantam karunchakurunmanku. Chaymi kallpanchakunanku imatapas kuska ruwanankupaq.
Kuska imatapas ruwaychik. Bibliam nin: “Chullalla runamantaqa iskay runam aswan allinqa”, nispa (Eclesiastes 4:9). Munasqaykita sapallayki ruwanaykimantaqa allinmi kanman yanaykiwan kuska imatapas ruwaynikichik. Ichapas kuska yanukuwaqchik, mikuq maytapas lluqsiwaqchik utaq maytapas purikuq pasakuwaqchik.
Yanayki kuyasqaykiqa sutillam kanan. Bibliam nin ‘qariqa kikinpa cuerponta hina warminta kuyananmanta’, ‘warmiñataq qusanta anchata respetananmanta’ (Efesios 5:28, 33). Warmi-qariqa kuyakuywanmi rimanakunanku, imachatapas quykanakunanku, abrazanakuykunanku, hinaspapas warmiqa qarillanpaqmi kanan chaynataqmi qaripas warmillanpaq kanan (Hebreos 13:4).