¿Maypitaq chiqap yachachikuyta tarichwan?
Imamantapas chiqap kaqta yachayqa yanapawanchikmi wañuymanta librakunapaqpas. Chaymi kunanqa, unquykuna imanasqa rikurisqanmanta chiqap yachakusqanrayku manaña runakunapas anchachu wañunchik.
Ñawpaqtaqa, waranqantin runakunam wañurqaku imanasqa unquykuna rikurisqanmanta manaraq yachakusqanrayku. Watakuna pasasqanman hinam ichaqa, yachaysapa runakuna yacharurqaku imanasqa unquykuna rikurisqanmanta. Chayta yacharusqankuraykum hampikunataña ruwayta qallaykurqaku, chaymi kunanqa hampikuna kasqanrayku unaytaraq kawsakunchik.
¿Yaqachu qatiqninpi tapukuykunamanta chiqap kaqta yachaypas allin kawsakunapaq yanapawanchikman?
¿Pitaq Diosqa?
¿Pitaq Jesucristoqa?
¿Imataq Diospa munaychakuyninqa?
¿Imaynañam hamuq tiempopiqa kawsakusunchik?
Chay tapukuykunamanta chiqap kaqta yacharusqankuraykum waranqantin runakuna allinña kawsakuchkanku. Chay tapukuykunamanta yachaspaykiqa qampas aswan allinmi kawsakunki.
¿ATICHWANCHU IMAMANTAPAS CHIQAP KAQTA YACHAYTA?
Ninkipaschá: “Manañam pipas chiqap kaqtaqa willakunñachu”, nispa. Arí, manañam yachakunñachu sichus ima willakuypas chiqap kasqanmanta utaq llulla kasqanmanta.
Kunan tiempoqa, gobiernokunapas, hatun empresakunapas hinaspa noticiakunata willakuqkunapas manañam chiqap kaqtaqa willakunkuchu. Chaymi iskayrayanchikña willakusqanku chiqap kasqanmanta utaq llulla kasqanmanta.
Chayna kaptinpas, atichwanmi yachay munasqanchik tapukuykunamanta chiqap kaqta yachaytaqa.
¿IMAYNATAM CHIQAP KAQTA YACHACHWAN?
Sapa punchawmi imamantapas chiqap kaqta yachayta munanchik. Yesicam chayta ruwan, paymi nin: “Warmachaymi maniyniyuq mikuyta mikuruspaqa llumpayta unquspa wañurunman. Chaymi manaraq ima mikuytapas rantipuchkaspay sumaqta qawani sichus maniyniyuq kasqanta. Chaymantapas, mikuy rantikuqtam qayani tapukunaypaq. Hukkunatapas tapukunitaqmi sichus chay mikuy ruwaqkuna allin kasqanmanta utaq manapas”, nispa.
Yaqapaschá ñuqanchikqa mana Yesica hinachu imamantapas sapa punchawqa tapukusun. Chayna kaptinpas pay hinam ruwananchik:
Yachanapaqmi kallpanchakunanchik.
Hinallam tapukunanchik astawan yachanapaq.
Maymanta hamusqantam allinta yachananchik.
Kaykunata ruwaspaqa yachasunmi imapas tapukusqanchikkunamanta. Chaymanta yachaykusun.
BIBLIALLAM CHIQAP KAQTAQA WILLAWANCHIK
Imaynam mana maniyniyuq mikuyta mana rantinanpaq Yesicaqa sumaqta yachaq, chaynam huk tapukuyninkunamantapas sumaqta yachananpaq kallpanchakurqa. Paymi nin: “Bibliata ñawinchasqay hinaspa astawan yachanaypaq kallpanchakusqaymi yanaparuwan bibliamanta chiqap kaqta yachanaypaq”, nispa. Waranqantin runakunapas Yesica hinam kay tapukuykunamanta bibliapa ima nisqanta yacharunku:
¿Imapaqtaq Diosqa unanchawarqanchik?
¿Imataq wañuqkunata pasan?
¿Imanasqataq ñakarinchik?
¿Imatam Diosqa ruwachkan ñakariykunata chinkachinanpaq?
¿Imaynatam kusisqa kawsakuchwan?
Chay tapukuykunamantam yachawaq bibliata ñawinchaspa. Maskawaqtaqmi internetpi www.jw.org nisqanpipas.