Jehová Diospa Llaqtanpi Punta Apaqkunapa Cartan
Kuyasqayku wawqe-panillaykuna:
¡Ima sumaqmi Jehová Diospa testigonkuna nispa sutichasqa kayninchikqa! Tukuy ima kamachiqpa sutintam apanchik, kay sutiqa wiña-wiñaypaqmi, mana tupachiy atina hinaspa payllapam. Kikin Jehová Diosmi chay sutitaqa churawarqanchik, chay sutiwanmi astawan reqsichikunchik 1931 watamantapacha (Isa. 43:10). Chayraykum hatun kusikuywan sutichakunchik Jehová Diospa testigonkuna nispa.
Diabloqa tukuy imatam rurachkan Diospa sutinta chinkachinanpaq. Paypa makinpi nacionkunaqa Jehová Diospa sutintam cheqninku, Hatun Babilonia otaq enteron pachapi pantasqa religionkunapas achka Bibliakunamantam Diospa sutinta chinkarachinku cheqnisqankurayku. Señorninchik Jesucristom ichaqa mana chaynatachu rurarqa. Paymi qatiqninkunata mañakunankupaq yachachispan, Taytanpa sutinta puntapi churaspan hatuncharqa, nirqam: “Qamkunaqa kaynatayá mañakuychik: Hanaq pachapi Taytayku, sutiki yupaychasqa kachun”, nispa (Mat. 6:9). Chaymantapas sonqomanta mañakusqanpim nirqa: “Kay pachamanta qowasqayki runakunamanqa ñam willaniña pim kasqaykita [“sutikita”, NM]”, nispa (Juan 17:6). Jesucristopa ejemplonta qatipakuspam ñoqanchikpas astawan kallpanchasqa kachkanchik Diosninchikpa sutinta enteron Pachapi willakunapaq.
2009 watapaq, ‘Allin noticiatayá llapallan runakunaman willasun’ niq textom kallpanchawarqanchik llapallan runakunaman predicananchikpaq (Hech. 20:24). Sutillamá Jehová Diosqa qayna wata llamkasqanchikta anchata bendeciwarqanchik, chaymi sutin hatunchasqa kananpaq enteron Pachapi willakurqanchik. Qayna watam 7.313.173 predicaqkuna llapallan runakunaman willakurqaku hinaspa allin sonqoyoq runakunamanpas yachachirqakum tukuy sasachakuykunata pim allichananmanta. Jesuspa wañukusqan punchawta yuyarinapaq huñunakuypim karqanchik 18.168.323 runakuna, kaymi qawachiwanchik manaraq puchukay tiempo chayamuchkaptin millonnintin runakunaraq Jehová Diospa sutinta willakunankumanta.
Jehová Dios ninankamaqa hinallam sumaq noticiamanta ganaswan predicasunchik, tukuy imatam rurasun predicasqanchik lawpi llapallan runakunaman predicananchikpaq (Mat. 24:14; Mar. 13:10). Hinallayá kallpanchakusunchik wasin-wasinpas, callekunapipas, cartawanpas hinaspa telefonowanpas otaq maypi tarikuspanchikpas Jehová Diospa sutinta hinaspa munayninta llapallan runakunaman reqsichinanchikpaq.
Segurom kachkanchik pisi tiempollamantaña Jehová Diosqa sutinta chuyanchananmanta (Eze. 36:23). Utqayllamanñam hichpaykamuchkan Diospa sutinta yanqachaqkunapa puchukaynin punchawqa. ¡Maynatachá Diospa serviqninkunaqa chay punchawpi kusikunqaku, paykunam Jehová Diospa Sutinmanta hinaspa llapallan kamachiq kasqanmantapas willakurqaku!
Jehová Dios llaqtanta kuyakuywan cuidasqanmi sutilla qawakurqa, 2009 watapi yaqa enteron Pachapi, ‘¡Listollayá kaychik!’ nisqa kimsa punchaw asambleapi hinaspa huk law nacionkunamanta iñiqmasinchikunawan huñunakusqanchik asambleakunapipas. Chay asambleakunaqa mana qonqanapaqmi karqa, chaymantapas yanapawarqanchiktaqmi Jehová Diospa piñakuynin punchawpaq rikchan-rikchanlla kananchikpaqpas (Mar. 13:37; 1 Tes. 5:1, 2, 4).
Chaynaqa mana iskayrayaspam nichwan Jehová Dios kuyawasqanchikta, sonqonchiktapas kusichinmi, sumaqllaña ikllirimuq pastokunapim samaykachiwanchik, pusawanchiktaqmi yakukunapa kasqan hawkalla samana kaqkunamanpas (Sal. 23:1, 2; 100:2, 5).
Kuyasqayku wawqe-panillaykuna, Jehová Diospa bendicionninkunaqa achkallañam kanqa predicaypi hinalla kallpanchakuptikichikqa.
Yuyariychiktaqyá kuyasqaykuta.
Iñiqmasikichikkuna,
Jehová Diospa Llaqtanpi Punta Apaqkuna