Manam kay llamkay hinaqa kanchu
1. ¿Imakunatam rurasunchik predicayninchikta chaninchaspaqa?
1 ¿Imanasqataq sapa kuti niwanchik tukuy tiemponchikwan, kallpanchikwan hinaspa kapuqninchikwan predicanapaq? Niwanchikmi kay llamkay hina mana maypipas kasqanrayku. Predicayninchik imakunapi yanapakusqanpi yuyaymanaymi yanapawasun kay ruraypi astawan llamkanapaq, kayqa manamá haykapipas yapamantaqa rurakunqachu (Hech. 20:24).
2. ¿Imaynatam predicayninchik yanapan Jehová Diospa sutin chuyanchasqa kananpaq?
2 Jehová Diospa sutintam chuyanchan. Predicayqa qawachinmi Jesuspa makinpi Diospa Gobiernon runakunapa gobiernontawan tukuy sasachakuykunatapas wiñaypaq chinkachinanta (Mat. 6:9, 10). Qawachintaqmi Jehová Dioslla onqoymantawan wañuymanta librayta atiwasqanchikta (Isa. 25:8; 33:24). Chaymantapas sutinta apasqanchikrayku allin kawsakuyninchik hinaspa ganaswan predicasqanchikmi hukkunata yanapanqa Jehová Diosta alabanankupaq (1 Ped. 2:12). ¡Anchatamá kusichiwanchik Jehová Diospa sutinta enteron Pachapi willakusqanchikqa! (Sal. 83:18, NM.)
3. ¿Imakunatam chaskinku Diospa yachachisqanta kasukuqkuna?
3 Runakunatam salvan. Jehová Diosqa manam munanchu pipas chinkarunantaqa, aswanmi munan huchamanta wanakuspa payman llapallanchik kutirikunanchikta (2 Ped. 3:9). Ichaqa pipas mana yachachiptinqa, ¿imaynatamá runakunaqa yachanqaku Diospaq imam allin otaq mana allin kasqantaqa? (Jon. 4:11; Rom. 10:13-15.) Sichu pipas Diosmanta willakusqanchikta kasukuspan mana allin ruraykunata saqespanqa, manam wiñay kawsayllatachu chaskinqa, aswanqa kay tiempopipas allintañam kawsakunqa (Miq. 4:1-4). Arí, sapa kuti predicayqa salvawanchikmi, salvantaqmi uyariwaqninchikkunatapas (1 Tim. 4:16). ¡Mayna kusikunapaqmi kay ruraypi yanapakuyninchikqa!
4. ¿Imanasqataq kallpanchakunanchik predicanapaq hinaspa yachachinapaqpas?
4 Pisi tiempollamantañam kay Pachapi tukuy mana allinkunaqa llumpay ñakariy tiempopi chinkachisqa kanqa, Jehová Diosta yupaychaqkunam ichaqa kawsaqlla qepanqaku. Chayraykum, kay tiemponchikpi predicayqa hinaspa yachachiypas aswan allin ima ruraymantapas. Hinaptinqa, ¡chay ruraytayá puntapi churasun! (Mat. 6:33.)