Rurasqanchikqa ancha kusikunapaqmi
1. ¿Imaynatam runakunata sanoyachichkaq hina yanapachkanchik?
1 Apostolkunapa tiemponpim ancha kusikuywan qawarqaku onqoqkuna milagrowan sanoyasqankuta (Luc. 5:24-26). Ñoqanchikpas anchatam kusikunchik runakunata sanoyachichkaq hina Jehová Diosmanta yachachispa (Apo. 22:1, 2, 17). Kusikuywanmi experienciakunata leenchik, Diospa Palabran hinaspa chuya espiritun yanapaptin runakuna vidanta imayna cambiasqankumanta. Astawanraqmi kusikunchik pimanpas Bibliata estudiachispaqa.
2. ¿Imanasqam kusikunchik cheqap yachachikuymanta pimanpas yachachispa?
2 ¿Imataq Diospa sutin? ¿Imanasqataq ñakarisqanchikta saqen? ¿Imatam Diospa Gobiernon ruranqa runakunapaq? Kaykunamanta contestaspam kusikunchik, astawanraqmi cheqapmanta yachachiptinchik estudiante entiendeptinqa (Pro. 15:23; Luc. 24:32). Chaymantapas yachasqanman hinam Jehová Diospa sutinta riman, pachakuyninpi hinaspa allichakuyninpi cambian, saqentaqmi mana allin costumbrekunata hinaspa hukkunaman predican. Diosman qokuspa bautizakuspanqa, iñiqmasinchik kaspanmi yanapaqninchikña. Chayna rurasqankuqa kusikunapaqmi (1 Tes. 2:19, 20).
3. ¿Imakunatam rurawaq pimanpas Bibliamanta estudiachinaykipaq?
3 ¿Atiwaqchu yanapayta? Pitapas estudiachispa kusikuyta munaspaykiqa Diosta mañakuy llampu sonqoyoq runata tarinaykipaq hinaspa mañakusqaykiman hina kallpanchakuy (1 Juan 5:14). Runapa kasqanpiqa, maypipas predicay. Bibliata estudiachinaykipaq pimanpas munachiy (Ecl. 11:6). Diosmanta yachay munaqta tarispaqa muhuta tarpuruq hina yapamanta kutispa parqoy (1 Cor. 3:6-9).
4. ¿Imanasqataq urgente munachinanchik Bibliata estudiachinapaq?
4 Achkaraqmi yarqasqa, yakunayasqa hina kachkanku allin ruray mana kaptin. ¿Pitaq paykunata yanapanman Bibliawan Diosmanta yachachispan? (Mat. 5:3, 6.) Tukuy sonqonchikwanyá yanapakusun predicacion tukunankama hinaspa cosechachkaq hina Cristopa qatiqnin kanankupaq runakunata yanapaypi (Isa. 6:8).