Warmaykikunata yachachiy Diosta servinankupaq
1. Salmo 148:12, 13 nisqanman hina, ¿imapaqmi tayta-mamaqa warmankuta yanapananku?
1 Jehová Diosmi warmachakunata kallpanchan payta alabanankupaq (Sal. 148:12, 13). Chayraykum cristianokunaqa Diospa Palabranmanta hinaspa kamachikuyninkunamanta warmankuman yachachinku. Yachachinkutaqmi predicanankupaqpas. ¿Imaynatam wiñasqankuman hina yanapanmanku?
2. ¿Imaynatam tayta-mamapa ejemplon warmankuta yanapanman?
2 Ejemploykichikwan yachachiychik. Juez Gedeonmi 300 soldadonkunaman nirqa: ‘Qamkunapas rurankichik ñoqapa rurasqayta hinam’, nispa (Jue. 7:17). Warmakunaqa tayta-mamapa rurasqanta qawaspam qatipakunku. Huk iñiqmasinchikmi tuta llamkapakun, sabado temprano lawta puñunanmantaqa llumpay pisipasqa kaspanpas warmachankunawanmi predicaq lloqsin. Mana rimaspallanmi yachachichkan ima ruraymantapas Dios serviyqa puntapi kasqanta (Mat. 6:33). Warmaykikuna, ¿reparanchu ganaswan orakusqaykita, Biblia leesqaykita, huñunakuypi rimarisqaykita hinaspa predicasqaykita? Wakinpiqa pantankipaschá, chayna kaptinpas Diosta serviypi kallpanchakusqaykita qawaspankum Diosmanta yachachisqaykita astawan yachayta munanqaku (Deu. 6:6, 7; Rom. 2:21, 22).
3. ¿Imakunata ruraspam warmaykikunata yanapawaq Diosta serviyninpi ñawparinankupaq?
3 Ñawparinankupaq yanapay. Tayta-mamaqa mana amispam warmachanku atinankukama yachachinku puriyta, rimayta, pachakuyta. Mayqentapas rurayta yacharuptinqa huk rurayta yachananpaqmi kallpanchanku. Cristiano kaspankuqa yanapankutaqmi warmanku wiñasqanman hina chaynataq atisqanman hina Diosta serviyninkupi ñawparinankupaq (1 Cor. 9:26). ¿Yachachichkankichu entiendesqanman hina huñunakuypi rimarinanpaq otaq Diosmanta Yachachinapaq Escuelapi discurson tupaptin kikin preparakunanpaq? (Sal. 35:18.) ¿Yachachichkankichu maypipas Diosmanta yachachinanpaq? ¿Kallpanchachkankichu bautismopi piensananpaq otaq precursor kananpaq? ¿Imatataq rurachkanki tukuy sonqonkuwan Diosta serviqkunawan amistadta ruraspa kallpanchasqa kanankupaq? (Pro. 13:20.)
4. ¿Maykamam yanapan taksachanmanta warmaykiman Diosta serviy yachachisqaykiqa?
4 Huk kutipim kay Salmo qellqaq nirqa: “Diosnilláy, qanmi warma kasqaymanta qawachiwarqanki milagroykikunata. Kunankamapas willakuchkaniraqmi qampa milagroykikunata”, nispa (Sal. 71:17). Taksachanmantapacha warmaykikunata yanapay Diosta serviq kanankupaq. Cimientachkaq hina taksachanmanta yachachisqaykim tukuy tiempo yanapanqa (Pro. 22:6).