Churi-wawanchikkunata yachachisun Jehová Diosta yupaychanankupaq
1. ¿Atinmankuchu mozo-sipaskuna Jehová Diosta yupaychayta?
1 Salmo 148:12, 13 nisqanpim kallpanchan mozo-sipaskunata Jehová Diosta ‘alabanankupaq’. Bibliapim kachkan achka mozo-sipaskunapa chayna rurasqanku. Ejemplopaq, Samuelmi Jehová “Diosta servirqa [...] Payqa karqa warmallaraqmi” (1 Sam. 2:18). Chaymantapas ‘huk sipascham’ willarqa lepra onqoyniyoq Naaman runapa warminman, Naamanpa onqoyninta Israel nacionpi Jehová Diosmanta willakuq hampirunanmanta (2 Rey. 5:1-3). Chaynataqmi Jesus templopi milagrokunata ruraptin “warmachakuna” qayakurqaku: ‘Rey Davidpa miraynin’ libraykuwayku, nispa (Mat. 21:15). Hinaptinqa, ¿imaynatam tayta-mamakuna wawa-churinkuta yachachinmanku Jehová Diosta yupaychanankupaq?
2. ¿Imanasqam tayta-mamakuna allin ejemplota qonanku wawa-churinkuman?
2 Tayta-mamakunapa ejemplon: Israel llaqtapi tayta-mamakuna warmankupi Diospa palabranta manaraq sonqochachkaspaqa, kikinkuraqmi Jehová Diosta hinaspa kamachikuyninkunatapas tukuy sonqonkuwan kuyananku karqa (Deu. 6:5-9). Tayta-mamakuna predicacionmanta allintapuni rimaspanku hinaspa sapa semana predicacionman lloqsiptinkuqa, churi-wawakunam qawanqaku predicayqa allinpuni hinaspa kusikunapaq kasqanta.
3. ¿Imaynatam huk paninchikta tayta-mamanpa rurasqan yanaparqa?
3 Huk paninchikmi kuyakuywan yuyarin: “Warmallaraq kachkaptiymi familiay sapa semana tukuyta predicacionman lloqsirqaku. Tayta-mamaymi predicaspanku anchata kusikurqaku. Chaymi wiñarqaniku predicayniykuta anchata kuyaspayku”. Kay paninchikmi qanchis watachanpi manaraq bautizakuchkaspa predicaqña karqa, kunanqa kimsa chunka iskayniyoq watañam precursora regular hina kachkan.
4. Wawa-churikunata, ¿imaynatam warmacha kasqanmantapacha yachachichwan?
4 Warmacha kasqanmantapacha yachachiy: Tayta-mamakuna warmaykichik predicacionman lloqsispaqa yanapakuchunku. Ichapas punkukunata takanmanku, tratadota qonmanku otaq textotapas leenmanku. Chaynatam predicaq lloqsisqankuwan kusikunqaku hinaspam Diospa Munaychakusqanmanta predicay atisqankupi confianzatapas hapinqaku. Wiñasqankuman hinam astawan predicananku. Chaynaqa yanapaychik iñiyninkupi wiñanankupaq hinaspa Dios serviypi imapas munasqankuta haypanankupaq.
5. ¿Imakunatam warmacha ruranan manaraq bautizakuchkaspan predicaqña kananpaq?
5 Ancianokunawan rimay manaraq bautizakuchkaspa predicananpaq allinña kaptinqa hinaspa kikinkumanta predicay munasqankuta willakuptinkuqa. Manaraq bautizakuchkaspa predicaqña kasqankuqa astawanmi yanapanqa Jehová Diosta yupaychanankupaq. Yachanaykitaqmi warmachaqa manam hatun runa hinaraqchu yachanan manaraq bautizakuchkaspa predicaqña kananpaqqa. ¿Yachanchu asllatapas Bibliapa cheqap yachachikuyninkunata? ¿Bibliapa nisqanman hinachu kawsachkan? ¿Munachkanchu predicacionman lloqsiyta hinaspa Jehová Diospa testigon kayta? Chayna kaptinqa ancianokunam musyanqaku manaraq bautizakuchkaspa predicananpaq allinña kasqanta (qawariy Organizados para hacer la voluntad de Jehová, nisqa libropa 79-82 paginankunata).
6. ¿Imanasqam allinpuni kanman tayta-mamakuna wawa-churinkunata yachachiyninkuqa?
6 Wawa-churikuna Jehová Diosta yupaychayta yachachinapaqqa anchatam kallpanchakuna. Chaywanpas tayta-mamakunapaqqa manam huk hatun kusikuyqa kanchu wawa-churinkunapa iñiyninkupi wiñayninkumantaqa. Aswanraqmi Jehová Diosqa anchata kusikun admirakuypaq rurasqankunamanta warmachakuna willakuptinku.