Uyariwaqninchikkunata yanapasun piensarinankupaq
1. ¿Imataq yanapawasun allinta predicanapaq?
1 ¿Imataq yanapawasun predicayninchik allin kananpaq? ¿Obliganachu munasqanchikta uyarinankupaq icha piensarichinachu cuentata qokunankupaq? Apostol Pablom Tesalonicapi judiokunaman predicaspan piensarichirqa, hinaptinmi ‘wakin judiokunaqa iñirqaku’ (Hech. 17:2-4) Ichaqa, ¿imaynatam yanapachwan cuentata qokunankupaq?
2. ¿Imaynatam qatipakuchwan Pablopa predicasqanta?
2 Imayna piensasqankupim reparana. Predicasqanchik lawpi runakunata piensarichinapaqqa reparanam imakunapi piensasqankuta. Areopago sutiyoq sitiopim Pablo predicayta qallaykurqa Jehová Diospi mana iñiq runakunaman, reqsisqanku hinaspa yachasqanku kaqkunata servichikuspa (Hech. 17:22-31). Chaynallataqmi ñoqanchikpas predicacionpaq preparakuspaqa reparananchikmi runamasinchik ima religionniyoq kasqankupi hinaspa imamanta mana uyariyta munasqankupipas (1 Cor. 9:19-22). Mana uyariyta munaptinqa kallpanchakunanchikmi reqsisqanku otaq yachasqanku kaqkunamanta rimanapaq.
3. ¿Imaynatam Pablo hina predicachwan?
3 Allinta piensaspam tapunanchik. Pipas mayman risqanpi imayna chayananpaq telefonontakama tapuwaptinchikqa manam yanapayta atichwanchu maypi tarikusqanta mana yachaspaqa. Chaynallataqmi, pitapas manam yanapayta atisunchu imam piensasqankuta mana yachaspaqa. Jesusmi runakunata manaraq piensarichichkaspan, imam piensasqankuta yachananpaq tapuq. Ejemplopaq, huk runam Jesusta tapurqa: “¿Imata ruraspaytaq wiñay kawsayta haypayman?” nispa, Jesusñataqmi manaraq contestachkaspan imam piensasqanmanta tapurqa (Luc. 10:25-28). Huk kutipiñataqmi Pedro mana allinta tanteaspa rimaruptin Jesusqa chayna piensasqanta correginanpaq tapuykunata servichikurqa (Mat. 17:24-26). Ñoqanchikpas uyariwaqninchik mana allinta entiendeptinqa piensarichinapaq hinam tapuna.
4. ¿Imanasqam piensarinankupaq yanapana?
4 Pitapas cuentata qokunanpaq hina yanapaspaqa Allin Yachachiq Jesucristotawan ñawpaq tiempopi cristianokunatam qatipakuchkanchik. Chaymantapas uyariwaqninchikkuna respetasqanchiktam qawachinchik (1 Ped. 3:15). Chaynata ruwaptinchikqa munanqakum yapapi watukunanchikta.