Allinta yanapanapaq: Yachachiq librota servichikuy

Imanasqataq ancha allin. Diosmanta willakusqanchikpim Yachachiq librota astawan servichikunchik. Kay qillqaqa ancha allinmi Diosmanta yachachinapaq, pimanpas yachachiyta munaspaqa chay qillqatam qunanchik. Ichaqa allintam yachananchik Diosmanta willakusqanchikpi ima nispa chay qillqata saqinanchikpaq (Prov. 22:29). Qatiqninpiyá yachasun Diosmanta willakusqanchik lawpi imaynata ruwananchikmanta.

Imaynatam saqichwan:

Imamanta yachachiyta munasqaykiman hina wasiyuqta tapuy, chaypaqqa yanapachikuwaqmi sapa yachachikuypa qallariyninpi kaq tapukuykunata. Wasiyuqpa ima nisusqaykita uyarispa bibliata leepuy, hinaspa akllasqayki yachachikuypa huk parrafonmanta pisi rimayllapi yachachiy.
Kaynatapas ruwawaqmi, kimsa kaq paginapi tapukuykunaman hina wasiyuqta tapuy hinaspa bibliapa ima nisqanta leepuy. Hinaspa niy: “Manchakuypaq kaqkuna pasasqanmanta noticiapi uyarispankum kaynata tapukunku”, nispa. Kaynatapas niwaqmi: “Vecinonchikkunamanmi hamuq tiempopi kusisqa kawsakuymanta willachkaniku”, nispa. Hinaspa qawachiy 4, 5 kaq paginakunapi dibujokunata. Chayman hina tapuy: “¿Mayqin cumplikunantataq munawaq”, nispa. Kaynatapas niwaqmi: “Huk ratochallam watukamuchkayki kayna tapukuykunamanta parlarinapaq”, nispa. Chaymanta qawachiy 6 kaq paginapi tapukuykunata. Hinaspa tapuy: “Mayqinmantataq yachayta munawaq”, nispa.
Kaynatapas ruwawaqmi, chayllaraq watukusqaykipi pimanpas niy bibliamanta yachachinaykipaq. Niwaqmi: “Kay qillqawan yanapachikuspam vecinokunaman bibliamanta yachachichkaniku. ¿Qampas munawaqchu yachaykuyta? Kay qillqawan yanapachikuspa bibliaykita estudianaykipaqmi tiempochayki kaptinqa yachaykachikiman”, nispa.

Kay killapi kayta ruway:

Diosta yupaychanapaq tutapi wasikipi kaqkunawan ensayaychik imaynata ruwanaykichikpaq.
Diosmanta willakuq lluqsispaykiqa riqmasikiman willay ima nispayki rimayta qallarinaykimanta (Prov. 27:17). Chaynata rimaptiki pipas mana uyarisuptikiqa kaqmanta piensay ima nispa rimayta qallarinaykipaq.