2015 watapaq Diosmanta Yachachinapaq Escuelaqa allin yachachiq kanapaqmi yanapawasun

¹ Davidmi qellqarqa: “Dios Taytalláy, qamqariki kanki rumi hina amparaykuqniymi. Qamqariki kanki tukuymanta libraykuqnillaymi. Rimasqaykunapas qampa agradoykipaqtaq kachun. Piensasqaykunapas qampa agradoykipaqtaq kachun”, nispa (Sal. 19:14). Ñoqanchikpas rimasqanchikwanmi Jehova Dios kusichiyta munanchik, chaymi huñunakuyninchikpi hinaspa wasin-wasin Diosmanta rimasqanchiktaqa chaninchanchik. Jehova Diosqa paymanta willakunapaqmi Diosmanta Yachachinapaq Escuelatapas servichikun. Kay escuelaqa allpantinpim sapa semana 111.000 masnin congregacionkunapi apakun hinaspam tukuy rikchaq runakunata yanaparqa mana manchakuspa hinaspa kuyakuywan Diospa Munaychakuyninmanta allinta yachachinankupaq (Hech. 19:8; Col. 4:6).

² 2015 watapaq Diosmanta Yachachinapaq Escuelapi yachachikuykunam horqosqa kachkan kay qellqakunamanta: ¿Imakunamantam Diospa Palabran yachachin?, Willakuq, ¿Imatapunim Bibliaqa yachachin?, Bibliamanta willakuq libroy, ‘Diospa kuyakuyninpiyá takyasunchik’ hinaspa Iñiyninkuta qatipakunapaq, niqkunamanta. Kay escuelapi yachachikuykunaqa manam qayna watapi kasqanman hinallachu kanqa. Qawasunyá imakunapi mana chaynalla kananmanta hinaspa imayna ruwakunanmantapas.

³ Sapa semana Biblia leesqanchikpi yachasqanchikmanta. Kayta ruwaq iñiqmasinchikqa chay semana Biblia leesqanchikmanta huk yachachikuyllantam ruwanqa, chaytaqa iskay minutollapim ruwanan. Tiempollanpi hinaspa allinta yachachinanpaqqa allintam preparakunan. Chaymantañataqmi huñunakuypi kaqkuna imapas yachasqankumanta rimarinmanku soqta minutopi, ichaqa sapakamam kimsa chunka segundollapi rimarinanku. Chaypaqqa allinta preparakuspam tiempollanpi tukuna. Kayqa allinninchikpaqmi hinaspapas achka iñiqmasinchikkuna rimarinankupaqmi yanapanqa.

⁴ 1 kaq yachachiy. Bibliatam leemunqa kimsa minutollapi otaq menospi, leemunapaqqa asllam kachkan. Kayta leemuqkunaqa wasinkupim achka kutita imam kaqta kallpawan leenanku hinaspa chuyay-chuyayta, chaynapi allinta uyarikunanpaq. Jehova Diospa testigonkunaqa llapanchikmi allinta leenapaq kallpanchakunanchik Diosta yupaychanapaq ancha allin kasqanrayku. Kusikunchikmá huñunakuyninchikkunapi achka warmachakuna leey yachasqankumanta. Churi-wawanku allin leeq kanankupaq kuyakuywan yanapaq tayta-mamakunaqa alabanapaqmá.

⁵ 2 kaq yachachiy. Warmi iñiqmasinchikkunam kaytaqa ruwanqaku pichqa minutopi. Tupasqan yachachikuyman hinam ruwanan. ¿Imakunamantam Diospa Palabran yachachin? niq qellqamanta ruwanan kaptinqa Diosmanta willakuyninchikpi yanapawananchikpaq hinaspa maymi yachasqanchik lawpaq hinam kanan. Bibliapa willasqan runakunamanta rimanan kaptinñataqmi, rimasqanwan tupaq textokunata akllaspan imakuna yachachiwasqanchikmanta qawachinqa. Akllanmantaqmi yachachikuywan tupaq sapaq textokunatapas. Escuelamanta encargakuq ancianom ninqa piwan ruwananpaqpas.

⁶ 3 kaq yachachiy. Warmi otaq qari iñiqmasinchikmi kaytaqa pichqa minutollapi ruwanqa. Warmikuna kayta ruwaspaqa iskay kaq yachachiyta hinam ruwananku. Bibliapi tarikuq runamanta qarikunaman tupaptinñataqmi huñunakuypi kaqkunapaq discursota qonqa. Kayta ruwaspanqa textokunata allinta akllaykuspanmi chay runamanta imam yachachiwasqanchikta qawachinqa.

⁷ Imatawanmi ruwana 3 kaq yachachiypi. Yachachikuypa ñawpaqninpi asterisco rikuriptinqa qari kaq iñiqmasinchikmi ruwanqa familiawan Biblia estudiasqanta otaq Diosmanta willakusqanta qawachiq hina. Yaqa llapanpim escuelamanta encargakuq anciano yanapaqninta akllanqa hinaspa imayna yachachinanmantapas. Yanapaqninqa qari iñiqmasinchikmi otaq ayllunmi kanman. Huk textokunatapas akllanmanmi yachachikuywan tupaptinqa. Wakinpiqa huk ancianom ruwanqa, payqa kikinmi yanapaqnintawan imayna yachachinanpaqpas akllanqa. Ancianokuna ayllunkuman otaq huk iñiqmasinchikman imayna yachachisqankuta qawachiyninkuqa maynatachá iñiqmasinchikkunataqa kallpanchanqa.

⁸ Consejanapaq. Escuelamanta encargakuq ancianoqa sapa yachachiypa tukuynintam iskay minutopi kallpanchanqa hinaspa yanapanqa Escuelawan Yanapachikuy libropa nisqanman hina. Discursaq otaq demostracion ruwaq manaraq qallaykuchkaptinqa manam ninanchu imapi kallpanchakunanmantaqa. Ichaqa rimayta tukuruptinmi kallpanchaykuspa imapi llamkasqanmanta hinaspa imanasqa allin ruwasqanmanta ninqa hinaspapas chay ruwasqanpi imanasqa astawan kallpanchakunanmantam sumaqllata willanqa.

⁹ Imakunapi llamkanapaq listataqa tarinki Escuelawan Yanapachikuy libropa 79-81 paginankunapim. Huñunakuy tukuytañataqmi escuelamanta encargakuq ancianoqa yachachiy ruwaqkunapa libronkupi qellqanqa imayna ruwasqankumanta hinaspam sapankupi tapunqa ruwananchikpaq kaqkuna nisqata ruwasqankumanta. Tiempo kaptinqa imapi astawan kallpanchakunanpaqpas ninmanmi, manachayqa huk kutipiña chaymanta nichun. Escuelamanta encargakuq ancianopa nisqanqa iñiyninchikpi ñawparinapaqmi yanapawasun, chaynatam kay escuelapi kaqkunapas qawananku (1 Tim. 4:15).

¹⁰ Sichum escuelapi kaqkuna tiempowan llallirachikuptinkuqa escuelamanta encargakuq ancianom otaq yanapaqninmi musyachinqa tiempon ña tukurusqanta, chaypaqqa uyarinanpaq hinallam lapizwanpas takanman mesata otaq imatapas chayta uyarispanqa chayllam rimasqanta tukunan (qaway Escuelawan Yanapachikuy librota pag. 282 § 4).

¹¹ Bibliapa yachachisqanman hina kawsakuqkunatam kallpanchamuykiku Diosmanta Yachachinapaq Escuelapi kanaykichikpaq (qaway Escuelawan Yanapachikuy librota pag. 282 § 6). Kay escuelaqa Diospa llaqtanpi kaqkunatam yanaparqa Diospa Munaychakuyninmanta sumaq willakuyta kallpawan hinaspa kuyakuywan willakunankupaq hinaspa yachachinankupaqpas. Jehova Diosqa kusikunmi payta hatunchanapaq kayna yanapakuykunata servichikuptinchikqa (Sal. 148:12, 13; Is. 50:4).