Allinta yanapanapaq: piñasqa runakunawan tupaspa hawkalla kay

Imanasqam ancha allin. Diosmanta willakuspanchikmi sumaq simiwan chaskikuq runakunata tarinchik. Ichaqa Jesusmi willakurqa chiqniwaqninchik runakunapas kananmanta (Juan 17:14). Chaymi mana hukmanyananchikchu ñuqanchikwan piñakuq runakunata tarispaqa. Chayna runawan tupaspaqa Jehova Diospa munasqanman hinam llampu sunqu kananchik (Rom. 12:17-21; 1 Ped. 3:15). Chayna kaspanchikqa sunquntam tiyachichwan. Chaymantapas, kikin runa hinaspa qawawaqninchikkunapas ruwasqanchikta allinpaq hapispankum uyariyta munanqaku yapapi kutiptinchikpas (2 Cor. 6:3).

Imayna ruwanamanta:

Ama piñakuspa sunquykita tiyachiy hinaspa kuyakuywan rimay. Amayá kaqpaqpas hapiychu hatunmanta rimasqantaqa (Ecl. 7:9). Ichapas wasiyuqqa sasachakuyniyuq otaq ima ruwayniyuqpas kachkarqa punkunta takaykuptikiqa. Otaq ñuqanchikmanta mana allinta yachasqankurayku piñakunku (2 Cor. 4:4).
Kuyakuywan rimapayay (Prov. 15:1). Ichapas puñukuchkaptin churmicharunki otaq imatapas ruwakuchkaptin tapkarunki. Chayna kaptinqa sunqumanta mañakuy pampachasunaykipaq, ichaqa manam Diosta kasukusqanchikraykuchu pampachawananchiktaqa mañakunanchik. Sichu ñuqanchikmanta yanqakunata uyarisqankurayku piñasqa kaptinqa. Kaynatam niwaq: “Chaynatam runakuna rimanku. Ichaqa manachusmi sumaqtachu yachanku. ¿Rimariykuchwanchu imayna kasqanmanta?”, nispa. Diospa llaqtanmanta qarqusqa kaqkunawan mana rimasqanchikta otaq yawarta mana churachikusqanchikta mana allinta qawaptinkuqa nichwanmi: “Achka runakunam chaynata niwanku. Ichaqa, ¿qawaykuchwanchu chaykunamanta Bibliapa ima nisqanta?”, nispa.
Llumpay piñasqa kaptinqa mana imatapas nispallam pasakuna. Ama haykapipas punkunta takanapaq niwaptinchikqa kasukunanchikmi.

Killantin kayta ruway:

Wasikipi kaqkunawan Diosta yupaychasqaykipi chayna sasachakuykunata imayna atipanaykichikta qawachiychik.
Piñasqa runawan tupasqaykichikmanta pasakuspa puriqmasikita tapuy imaynatam aswan allinta rimapayawaq karqa.