‘Llapanwanmi hawkalla kawsana’
1. Wasiyoq piñakuptinqa Bibliapa, ¿ima nisqantataq yuyananchik?
1 Diosta serviqkunaqa sumaqllatam hawkayachikuq noticiamanta willakunchik (Is. 52:7). Ichaqa wakin runakunam anchata piñakunku predicananchikpaq wasinkuman riptinchik. Chayna kaptinkuqa imataq yanapawachwan hawkalla predicanapaq (Rom. 12:18).
2. ¿Imanasqataq cuentata qokuq kananchik?
2 Entiendeqmi kananchik. Wakinqa Diosmanta mana yachay munasqankuraykum piñakunku. Hukkunaqa piñakunkum mana tiempoyoq kachkaptin otaq imawanpas piñasqa kachkaptin chayaruptinchik. Wakinñataqmi mana allinpaq hapiwanchik yachachisqanchikmanta hukkuna mana allinkunata rimasqankurayku (2 Cor. 4:4). Imanasqa piñakusqankumanta musyanapaqmi entiendeq otaq cuentata qokuq kananchik, chayqa yanapawasunmi hawkalla kanapaq (Prov. 19:11).
3. ¿Imaynatam respetasqanchikta qawachichwan?
3 Respetoyoqmi kananchik. Predicasqanchik lawpi runakunaqa creesqankupim hapipakunku (2 Cor. 10:4). Sapakamam tanteakunku Diosmanta uyarinankupaq otaq mana uyarinankupaqqa. Uyariwaqninchikkuna imapi creesqankutaqa respetanam, manam hapinanchikchu Diosmanta qalaypaq mana yachasqankupaqqa. Mana uyariyta munaspan pasakunanchikpaq nanay siminwan niwaptinchikpas hawkallam pasakunanchik.
4. ¿Imaynatam ‘sumaqlla’ rimaq kasqanchikta qawachichwan?
4 Llampu simiwanmi rimananchik. Pipas kamiwaptinchikqa hawkallam hinaspa ‘sumaqllatam’ rimananchik (Col. 4:6; 1 Ped. 2:23). Rimaypi atipanakunamantaqa kallpanchakunam uyariwaqninchikpa yachay munasqanmanta rimanapaq, atikuptinqa sumaqllatam tapuchwan imanasqa mana uyariy munasqanmanta. Wakinpiqa allinmi kanman rimayta tukuruspalla pasakuyninchik (Prov. 9:7; 17:14).
5. ¿Imanasqam hawkalla predicananchik?
5 Hawkalla kaptinchikqa ichapas chaypi reparaspan pipas yapapi predicaptinqa Diosmanta yachayta munanman (Rom. 12:20, 21). Mana uyariy munaqkunapas wakinqa tiempo pasasqanman hinam iñiqmasinchikña kanmanku (Gal. 1:13, 14). Cambiananku otaq mana cambiananku kaptinpas hawkalla predicasqanchikqa Jehová Diostam hatunchan, qawachintaqmi yachachisqanchikqa allinpaq kasqantapas (2 Cor. 6:3).