Atichwanmi wiñaypaq kusisqa kawsakuyta

Diosmi Abrahanta nirqa paypa huk kaqnin mirayninrayku kay pachapi lliw runakuna bendecisqa kanankumanta (Genesis 22:18). ¿Pitaq kanan karqa?

Yaqa iskay waranqa wata ñawpaqtaraqmi Diosqa Jesusman atiyta qurqa tukuy imata ruwananpaq. Tukuy ima ruwasqanwanmi Jesusqa sutillata qawachirqa Abrahanman Diospa nisqanqa Jesusnintakama ruwakunanmanta. Jesusqariki Abrahanpa mirayninmantam hamurqa (Galatas 3:14).

Runakunapas Jesuspa ruwasqanta qawaspankum mana iskayrayarqakuchu Jesusnintakama Dios runakunata yanapananmantaqa. Jesus imayna kasqantayá yachaykusun.

Jesusqa kuyakuqmi karqa, chaymi unquqkunata sanoyaykachirqa.

Huk kutipim lepra unquyniyuq runa Jesusta nirqa munaspanqa unquyninmanta sanoyaykachinanpaq. Chaymi Jesusqa llachpaykuspan nirqa: “Munanim”, nispa. Hinaptinmi chay runaqa sanoyaykurqa (Marcos 1:40-42).

Jesusqa qukuykuqmi karqa, chaymi runakunaman mikuyta qurqa.

Jesusqa manam munarqachu pipas yarqaymanta kanantaqa. Chaymi achka runakunata mikuykachirqa as tantallawan hinaspa iskay-kimsa challwachakunallawan (Mateo 14:17-21; 15:32-38). Runakunaqa saksanankukamam mikurqaku, chaymantapas mikuyqa puchurqaraqmi.

Jesusqa llakipayakuqmi karqa, chaymi wañuqkunatapas kawsarichirqa.

Huk kutipim huk viudapa wawan wañukurqa. Chaymi viudaqa llumpay llakisqa tarikullarqa. Chayta qawaspanmi Jesusqa llakipayaspan chay viudapa wawanta kawsarirachirqa (Lucas 7:12-15).