¿IMATAQ YANAPAWACHWAN MANAÑA CHIQNINAKUNAPAQ?

2 | Mana vengakuqyá kasun

Bibliapim nin:

“Pipas mana allinta ruwasuptikichikqa amayá mana allinwanqa kutichiychikchu. [...] Atisqaykichikman hinayá kallpanchakuychik llapallan runakunawan hawkalla kanaykichikpaq. Kuyasqallaykuna, amayá vengakuychikchu, [...] qillqasqamiki kachkan: ‘Ñuqam vengakusaqqa, ñuqataqmi mana allin ruwasqanmanta pagapusaq’ ninmi Jehova Dios”, nispa (ROMANOS 12:17-19).

¿Imatam yachachwan?

Wakinpiqa runamasinchik imawanpas ñakarichiwaptinchikqa piñakunchikmi, ichaqa manam vengakunanchikchu. Diosmi kallpanchawanchik mana vengakuq kananchikpaq. Payqa manapas unaymantam mana allinkunata chinkachinqa (Salmos 37:7, 10).

Kaypaqyá kallpanchakuy:

Vengakuptinchikqa sunqunchikpi chiqnikuymi astawan wiñan. Chaymi kallpanchakunanchik hawkalla kanapaq hinaspa mana vengakuq kanapaq (Proverbios 19:11). Wakinpiqa allintaqmi kanman pipas mana allinkunata ruwarusuptikiqa utaq imaykitapas suwarusuptikiqa autoridadman quejakuyniki.

Vengakuyqa astawanmi chiqninachiwanchik hinaspa sasachawanchik

Piwanpas sasachakuynikita chaylla allichayta mana atispaykiqa amayá vengakuychu. Aswanqa ‘Diospiyá hapipakuy’, hinaspayá llapallan sasachakuynikita paypa makinpi saqiykuy, payqa yanapasunkim (Salmos 37:3-5).

Vidanmanta willakusqan (ADRIAN)

Manaña vengakuq kananpaqmi kallpanchakurqa

Adrianqa warmallaraq kaspanmi mana allin ruwaq runakunawan hukllawakuq. Chaymi chiqnikuqllaña karqa hinaspa piñallaña purispan imamantapas vengakuyta munaq. Adrianmi nin: “Sapa kutillam baleanakuq kaniku, chaymi wakinpiqa wañusqa hina callepi yawarllaña wischurayaq kani”, nispa.

16 watanpi kachkaspanmi Adrianqa bibliamanta yachayta qallaykurqa. Payqa nintaqmi: “Diosmanta yachasqayman hinam imayna sunquyuq kasqayta cambianay karqa”, nispa. Adrianqa kallpanchakunanmi karqa chiqnikuqllaña hinaspa maqakuqllaña kasqanta saqinanpaq. Chaypaqmi yanaparqa bibliapi Romanos 12:17-19 nisqan. Adrianqa ninraqmi: “Bibliapi chaynata nisqankunawanmi cuentata qukurqani Jehova Dioslla imapas ruwasqanman hina pimantapas cuenta mañasqanta, chaymi kallpanchakurqani pisi-pisimanta chiqnikuq, maqakuq kayniyta saqinaypaq”, nispa.

Huk tutam Adriantaqa ñawpaq puriqmasinkuna maqayta qallaykurqaku. Hinaptinmi payqa kutipakunanmantaqa sunqullanpi Jehova Diosta mañakurqa, hinaspam lluptikururqa.

Adrianqa willakuntaqmi: “Paqarinnintintañataqmi maqawayta munaq runawan tuparurqani. Payqa sapallanmi kachkasqa, chaymi sunquypiqa maqaparuyta munarqani, ichaqa Jehova Diostam mañakurqani hawkalla kanaypaq. Payñataqmi asuykamuwaspan niwarqa: ‘Munaymanmi qam hina biblia estudiayta’, nispa. Chayna niwasqanwanmi anchata kusikurqani. Mana vengakusqayraykum paypas Diosmanta yachayta qallaykurqa”, nispa.