¿Imanasqataq mana hawkaqa kawsakunchikchu? | ¿Imatam biblia nin?

Manam ancha riqsisqa politicokunapas nitaq riqsisqa organizacionkunapas atinkuchu hawka kawsakunapaq imapas ruwaytaqa. Segunda guerra mundial kasqanmantapacham kaypi-chaypi guerraqa siempre kachkan. Chaymi yaqa 2.000 millones runamasinchikkuna guerrapa kasqan lawpi yachachkanku.

¿Imaynanpitaq runakunaqa mana imatapas ruwayta atinkuchu hawka kawsakunapaq? ¿Imatam biblia nin?

Runakuna imakunarayku mana atisqankumantayá yachaykusun:

1. 1. Bibliapim willakurqaña kay tiemponchikpi runamasinchikkuna kayna kanankumanta: “Kikillankupi piensaqkuna, qullqilla kuyaqkuna, alabakuqkuna, hatuntukuqkuna, […] runamasin qipanchaqkuna, […] acuerdoman mana yaykuqkuna, […] mana controlakuqkuna, animal hina piña runakuna, […] mana uyarikuqkuna hinaspa capaztukuqkuna”. Chayna kasqankuraykum runamasinchikkunaqa hawka kawsakuytaqa mana munankuchu (2 Timoteo 3:2-4).

2. 2. Runakunaqa maynataña kallpanchakuspankupas imapas problemanku allin allichaytaqa manam atinkuchu, Jehovaa Diosllam chaypaqqa yanapawachwan. Bibliapim niwanchik: “Runapaqqa manam makinpichu maynin puriyta akllakunanpaqqa”, nispa (Jeremias 10:23).

3. 3. Kay allpa pachanchikqa satanaspa makinpim kachkan, paymi “kay pachapi llapallan runakunata pantachichkan”. Satanas hinalla kay allpa pachanchikta gobiernaptinqa hinallam guerrakunaqa kanqa, manam hawka kawsakuytaqa atisunraqchu (Apocalipsis 12:9; 1 Juan 5:19).

¿Pitaq hawkayayta apamunqa?

Bibliapim niwanchik Jehova Dioslla hawkayayta kay allpa pachanchikman apamunanmanta, manam runakunachu. Chaytam kikin Diosninchik niwanchik:

• “Ñuqaqa sumaqtam yachani qamkunapaq imam munasqaytaqa. Hawkayaypi kanaykichiktam munani, manam sasachakuypi kanaykichiktachu. Hamuq punchawkunapi allinña kanaykichiktam munani”, nispa (Jeremias 29:11).

¿Imatam ruwanqa Jehova Diosninchik chay nisqanta cumplinanpaq? Chaypaqqa ‘hawkayay qukuq Diosninchikmi satanasta [...] chaylla sarupanqa’ (Romanos 16:20, Chuya Qellqa 2012). Chaytam ruwanqa hanaq pachapi gobiernonwan, hinaspam kay allpa pachaman hawkayayta apamunqa. Bibliapim chay gobiernota nin “Diospa gobiernon” nispa. Chay gobiernopi kamachiqqa señorninchik Jesucristom (Lucas 4:43). Kay allpa pachanchikta Jesus kamachimuptinqa lliw runam hawka kawsakusunchik (Isaias 9:6, 7).

• Chaymanta astawan yachayta munaspaykiqa leeykuy “¿Imakunatam Diospa gobiernon ruwanqa?” niq yachachikuyta.