¿Imaynatam qaqchanakuyta saqechwan?

SASACHAKUY

¿Manachu sasachakuynikichikta hawkalla allichayta atinkichik? ¿Bomba toqyarunanpaq kachkaq hinañachu imamantapas tarikunkichik?

Chayna kaptinpas ama hukmanyaychikchu: atiwaqchikmi allin kawsakuytaqa, chaypaqmi puntata yachanaykichik imanasqa qaqchanakusqaykichikta.

¿IMANASQATAQ PASAN?

Mana entiendenakuy.

Ilianama nin: “Wakinpim qosaywan parlayta munani ichaqa manam munasqayman hinachu rimani. Wakinpiqa, imatapas nisqaytam piensani ichaqa piensayllam piensasqani, chaynapunim pasawan”, nispa.

Mana chaynalla piensasqanku.

Imapiña tupaspankupas piensasqankupiqa manam chaynallachu kanku. ¿Imanasqa? Runakunaqa manam tukuy imapiqa piwanpas tupachwanchu, chayraykum mana aminapaq hina kawsayninchikqa ichaqa sasachawanchiktaqmi. Yaqa lliw casadokunataqmi sasachakunku.

Mana qatipakunapaq.

Raquelmi yuyarispan nin: “Tayta-mamayqa sapa kutim liryanakuspa mana respetanakuqkuchu, chaynamá ñoqapas casarakuruspayqa qosayta mana respetowan mamay hina rimapayaq kani. Manam respetakuyta yacharqanichu”, nispa.

Imanasqa sasachakusqanku.

Sasachakuyqa manam ima ruwasqankuwanchu qallarin, aswanmi sientechinakusqankuwan. Kaypi piensasun: huk warmim qosanta ninman “¡sapa kutim tardeyamunki!”, nispa. Manachá tarde chayamusqanchu sasachan warmintaqa, aswanqa paypa imayna sientekusqanpi mana reparasqanmi.

Imarayku sasachakuptinkupas kaywanqa onqorunmankum hinaspapas rakinakuymanpas chayarunmankum. Hinaptinqa, ¿imaynatam qaqchanakuyta saqechwan?

¿IMATAM RUWAWAQ?

Puntataqa yachanaykichikmi imanasqa sasachakusqaykichikta. Iskaynikichik hawkalla kachkaspa kaykunata ruwaychik.

1. Sapakama huk papelpi qellqaychik imanasqa kay punchawkunalla qaqchanakusqaykichikmanta. Huk qosam señoranmanta kaynata qellqanman: “Tukuy punchawmi amigaykikunawan tiyarayamuspayki mana huk kutillatapas qayamuwarqankichu”, nispa. Warmiñataqmi qosanmanta kaynata qellqanman: “Amistadniykunawam lloqsisqaymantam piñakurqanki”, nispa.

2. Mana hukmanyaspalla iskaynikichik yuyaymanaychik qatiqnin tapukuykunapi: ¿Cheqaptapunichu piñakunapaq hina karqa? ¿Allinchu kanman karqa chaypi mana piensayqa? Hawkalla kanapaqmi wakinpiqa mana chaynalla kasqanchikta reqsikuna hinaspam kuyakuywan pampachanakuna. (Imatam Biblia yachachin: Proverbios 17:9.)

Mana llumpay sasachakunapaq kasqanta iskaynikichik piensaruspaykichikqa, pampachanakuykuspa qonqaruychik. (Imatam Biblia yachachin: Colosenses 3:13, 14.)

Ichaqa huknikichikpaq llumpay kaptinqa kayta ruwaychik.

3. Papelpi sapakama qellqaychik qaqchanakuspa imayna sientekusqaykichikmanta. Qosam kaynata qellqanman: “Ñoqawan kanaykimantaqa amistadnikikunawan kaytachusmi munanki”, nispa. Señorañataqmi kaynata qellqanman: “Taytanta sapa kuti qayapayaq warmata hinam niwasqaykiwan sientechiwarqanki”, nispa.

4. Qellqasqaykichikta qonakuspaykichik leeychik huknikichikpa imam qellqasqanta. ¿Imaynam qosayki otaq señorayki sientekurqa qaqchanakuchkaptikichik? Rimaychiktaq imatam sapakama ruwawaqchik karqa mana piñanakuspalla sasachakuyta allichanapaq. (Imatam Biblia yachachin: Proverbios 29:11.)

5. Rimaychik kay tawa ruwaykunapi imam yachasqaykichikmanta. ¿Imatam ruwawaqchik yapapi sasachakuykuna kaptin hawkalla allichanaykichikpaq?