Imaynatam tanteanakuna

IMAM SASACHASUNKI

Warmikipawan qampa imapas ruway munasqaykichikmi mana tupanchu.a Chaynaqa, ¿imatam ruwawaq? Kay kimsa ruwaykunamantam hukninta akllanayki:

1. Hikutanam munasqaykiman hina ruwakunankama.

2. Upallallam ruwanayki warmikipa nisqanta.

3. Tanteanakunam.

Yaqapaschá ninki: “¿Imaynataq tanteanakusaq? Yanqapaqmi sapa kuti chay ruwasqaykuqa”, nispa.

Imayna tanteanakuyta yachaptikichikqa manam yanqapaqchu kanqa.

KAYTAM YACHANAYKI

Kuskam ruwana. Manaraq casarakuchkaspaykiqa sapaykichá imata ruwanaykipaqpas tanteaq kanki. Kunanqa manam sapaykiñachu kanki, chaymi iskaynikichikpaq imam allin kasqanpi piensanayki. Chay ruwayqa allinnikichikpaqmi kanqa. Alexandra sutiyuq warmim nin: “Iskay runapa kuska piensasqankum allinpi tukun sapakama piensasqankumantaqa”, nispa.

Hukkunapa piensasqantapas uyarinam. Casarasqakunata yanapaq huk runam nin: “Manam llapanpichu huknikiwanqa chaynallata piensankichik, ichaqa uyarinaykim huknikipa imam piensasqanta. Hukniki rimachkaptin makikita chupqapakuykuspa mana uyariyta munaptikiqa, manam allinpichu tukunkichik”, nispa.b

Amam qamllapi piensaqqa kanaykichu. Manam pipas munanmanchu: “Ñuqapa nisqayman hinam ruwakunqa” niq runawan casarasqa kaytaqa. June sutiyuq warmim nin: “Wakinpiqa qusaypa munasqanman hina ruwakunanpaqmi saqini, wakinpiñataqmi pay saqin ñuqapa munasqayman hina ruwakunanpaq. Chaynam casado vidaqa iskayninchikmantam kanan”, nispa.

IMATAM RUWAWAQ

Sumaqta rimaspa qallariy. Nanay simiwan rimayta qallarispaqa manam hawkaqa tukuwaqchikchu. Chayraykum Bibliapa kayna nisqanta kasukunayki, ninmi: ‘Musuq pachawan pachakuchkaq hinayá allinkunata ruwaspa riqsichikuychik llakipayakuspa, sumaq sunqu kaspa, humillakuspa, llampu sunqu kaspa hinaspa pacienciakuspa’, nispa (Colosenses 3:12). Warmi-qari chayna kanapaq kallpanchakuspaqa, mana qaqchanakuspallam ima sasachakuytapas allichankichik. (Bibliapa yachachisqan: Colosenses 4:6.)

Chaynalla piensasqaykichikmanta rimariychik. Imapipas mana tupasqallaykichikpi piensaspaqa sapa kutim tanteanakuyta munaspapas piñanakuyllapi tukunkichik. Chaynapi mana tukunapaqqa imakunapi tupasqaykichikmanta rimariychik. Chaypaqqa kayta ruway:

Sapakama iskay listata ruwaychik. Hukninpi qillqaychik imakunapim munasqaykiman hina ruwakunanmanta, hukninpiñataq huknikipa munasqanman hina kaqkunamanta. Hinaspa tupachiychik listaykichikta. Ichapas yaqa lliwpi tupachkankichik. Chayna kaptinqa manachá sasachu kanqa imapipas tanteanakuyqa. Mana lliwpi tupaptikichikpas qillqasqaykichikmi yanapasunkichik allinta tanteanaykichikpaq.

Ima sasachakuytapas kuska allichaychik. Wakin sasachakuykunaqa manam llumpay sasachu. Sasa kaptinqa kuskaykichik imayna allichayta tanteaspa casado kasqaykichikta kallpanchaychik. Ichapas chayta ruwaspaqa aswan allinta allichawaqchik. (Bibliapa yachachisqan: Eclesiastes 4:9.)

Ama hapipakuychu munasqallaykimanqa. Bibliam nin: ‘Kikikichikta hinayá warmikichiktapas sapakama kuyaychik, warmiñataqyá qusanta respetachun’, nispa (Efesios 5:33). Casado kasqaykipi kuyakuy hinaspa respetanakuy kaptinqa, manam sasachakunkichikchu huknikichikpa munasqanta ruwanapaqqa. Cameron sutiyuq runam nin: “Ñawpaqta mana munasqaykikunatam kunanqa warmikirayku munankiña”, nispa. (Bibliapa yachachisqan: Genesis 2:18.)