Casado vidaqa wiñaypaqmi kanan

IMAM SASACHASUNKI

Casarakusqaykichik punchawpim achka runakunapa qayllanpi prometenakurqankichik. Chay punchawpim prometenakurqankichik mana haykapipas saqinakunaykichikpaq, chaynataq ima sasachakuytapas kuska allichanaykichikpaq.

Ichaqa watakuna pasasqanman hinam qaqchanakusqaykichikwan manaña anchatachu kuyanakunkichik. Chayna tarikuspaykiqa rakinakuypiñapaschá piensanki.

IMATAM YACHANAYKI

Imataq casado vidapi sasachanman. Achka runakunam manaña munankuchu casarakuytaqa. Wakinqa piensankum casarakuspaqa sasachakuypi tarikunanpaq kasqanta. Ichaqa manam chaynachu, casarakuspa prometenakusqaykichikqa yanapasunkichikmi hawkalla kawsakunaykichikpaq. Megan sutiyuq warmim nin: “Casarakuspa prometenakuyqa allinpaqmi chayqa yanapasunkim ima sasachakuypas kaptinqa mayqinnikichikpas rakinakuypi mana piensanaykichikpaq”, nispa.a Llumpay sasachakuypi tarikuptinkupas prometenakusqankuqa yanapanqam casado vidankuta mana yanqachanankupaq (qaway “Prometekusqaykita cumpliy” niq yachachikuyta).

Qampas casado vidaykipi sasachakuypi tarikuspaykiqa, ama piensaychu rakinakuypiqa aswanqa kallpanchakuy sasachakuynikichikta allichaspa kusisqa kawsakunaykichikpaq.

IMATAM RUWAWAQ

Yuyaymanay casado vidata imayna qawasqaykipi. “Wañuyllam rakinanqa”. Chayna nisqanwanqa, ¿imaynataq tarikunki, obligasqachu icha kusisqachu? Sasachakuypi tarikuspaqa, ¿rakikuypichu piensanki? Casado vidaykipi hawkalla kawsakuyta munaspaqa yuyaymanay casarakuspa prometanakusqaykichikpi. (Bibliapa yachachisqan: Mateo 19:6).

Casado vidankupi tayta-mamayki imayna kawsasqankupi piensariy. Paykuna casado vidankupi sasachakuypi tarikusqankuta yuyarispaykipaschá casarakuspa prometekuytaqa mana munankichu. Leam nin: “Tayta-mamaymi rakinakururqaku warmachallaraq kachkaptiy. Chaymi ñuqaqa mana munanichu casarakuspay prometekuytaqa”, nispa. Tayta-mamayki casado vidankuta yanqacharuptinkupas qamqa atiwaqmi casado vidaykipi kusisqa kawsakuyta. (Bibliapa yachachisqan: Galatas 6:4, 5).

Allinta tanteaspa rimay. Rimasqaykichikpi piñanachikuspaqa ama niychu “¡wischusqaykim!” utaq “¡hukwanmi pasakusaq!”, nispaqa. Chayna rimasqaykimantaqa ñakakuwaqmi. ¿Imanasqa? Chayna rimayqa casado vidaykipim hukmanyachisunki chaymantapas kaminakuytam qallaykuwaqchik. Nanay simiwan rimanaykimantaqa ichapas kaynata niwaq: “Amayá piñanakusunchu aswanqa iskayninchikyá sumaqllata allichanapaq tanteasun”, nispa. (Bibliapa yachachisqan: Proverbios 12:18).

Paylla kuyasqaykita qawachiy. Warmikipa utaq qusaykipa fotonta apaykachay, atikuptinqa maymi llamkapakusqaykipi sutillata churay. Casado vidaykichikpi allinlla kawsasqaykichikmanta rimay. Ama qunqaychu huk cuerpo hinalla kasqaykichikta, rimaspaqa iskaynikichik huk sunqulla imatapas ruwasqaykichikmanta rimay. Chaynata ruwaspaqa manam qunqankichu kuyasqaykita, qawachinkitaqmi hukkunamanpas kuyanakusqaykichikta. Chayqa yanapasunkim casado vidaykipi.

Casado vidankupi allin kawsakuqkunata qatipakuy. Qawariy ima sasachakuyninkutapas atipaspa unay watakunaña casarasqa kaqkunata. Tapuy: “¿Imataq yanapasunkichik kuyanakuynikichik hinalla kananpaq? ¿Imataq yanapasurqankichik casarakuspa prometenakusqaykichikta cumplinaykichikpaq?”, nispa. Bibliam nin: “Imaynam fierro limawan fierrota afilanku. Chaynam amigopurapas entiendenachikunku”, nispa (Proverbios 27:17). Casado vidankupi allin kawsakuqkunapa yanapayninta maskasqaykiqa yanapasunkim.