QARANPI KAQ YACHACHIKUY | ACHKA RUNAKUNAM LLAKISQA TARIKUNKU ¿IMAKUNAWAN?
Sasachakuy: Hukmanyasqa kaspa
¿SUNQUYKIPI llakisqa utaq piñasqa kasqaykiwanchu hukmanyasqa tarikunki? Chayna kaspaqa yaqapaschá mana kallpayuq tarikunki imatapas ruwanaykipaq. ¿Imatam ruwawaq?a
YACHASUN DIOS YUPAYCHAQ DAVIDMANTA
Davidqa achka kutipim hatun sasachakuykunawan llakipi tarikurqa. ¿Imataq yanaparqa mana hukmanyananpaq? Mana iskayrayaspan Diospi hapipakusqanmi (1 Samuel 24:12, 15). Imayna sientekusqanmantam qillqarqa, chaymantapas Diostam sapa kuti mañakurqa.b
GREGORY IMA RUWASQANMANTA
Gregory sutiyuq runam umanwan unqun, chaymi mana allinkunata piensaspan chaylla hukmanyan. Paymi nin: “Imamantapas chaylla preocupakuq kasqaywanmi hukmanyasqa tarikuq kani”, nispa. ¿Imaynatam atiparqa chay sasachakuyninta? Nintaqmi: “Warmiypa hinaspa amistadniykunapa yanapayninwanmi controlakuyta yacharuni. Chaymantapas doctorpa yanapayninwanmi imawan unqusqaymanta astawan yacharuni. Hinaspapas ruwayniykunatam ruwani atisqayman hina, chayqa yanapawanmi chaylla mana hukmanyarunaypaq. Wakinpiqa hinallaraqmi mana allin pensamientokunawan atipachikuni, ichaqa yacharunim imata ruwaspay hawkayayta”.
‘Kusisqa sunquyuq runaqa sanoy-sanoymi kanqa’. (Proverbios 17:22)
¿IMATAM RUWAWAQ?
Mana allin pensamientokunawan intuchikuspaqa kaykunatam ruwawaq:
Sapa punchaw qillqay imayna tarikusqaykimanta.
Aylluykiman utaq amistadnikiman willay sunquykipi imayna tarikusqaykimanta.
Imanasqa hukmanyasqa kasqaykipi piensariy. Tapukuy: “¿Mana allichayta atinaypaq hinachu sasachakuyniy?”, nispa.
Ama atipachikuychu piñasqa utaq llakisqa kasqaykiwanqa. Aswanqa allin kaqkunata ruwanaykipaq kallpanchakuy.c
¿Imatam yacharunchik? Wakinpiqa manam sasachakuyninchik kasqanraykuchu mana allin pensamientokunawanqa atipachikunchik, aswanqa chay sasachakuyninchikta imayna allichanapaq mana piensarisqanchikwanmi.
a Wakinpiqa imawanpas unqusqankuraykum mana allin pensamientokunawan atipachikunku, chayna tarikuspaykiqa allinmi kanman doctorwan qawachikuyniki. ¡Rikchariy! qillqaqa manam imawan hampichikunamantaqa rimanchu. Chaypaqqa sapakamam tanteakunanchik.
b Diosta mañakuspan Davidpa qillqasqankunaqa bibliapim Salmos libropi kachkan.
c Astawan yachanaykipaq, leey septiembre-octubre 2015 Willakuq qillqapi “Llumpayta mana hukmanyanapaq” niq yachachikuyta.