Llumpay llakikuymanta

¿Imanasqataq llumpayta llakikuchwan?

IMATAM YACHANAYKI.

Llakikuyqa apamun manchapakuyta hinaspa qipa punchaw imayna kaymanta llakikuytam. Sasachakuy tiempopi kawsasqanchikraykum imamantapas llakikuchwan.

¿IMATAM BIBLIA NIN?

Kamachiq Davidmi qillqarqa: ‘¿Haykapikamataq almallay ñakarinqa? ¿Haykapikamataq sunqullaypas llumpay llakisqa kanqa?’, nispa (Salmo 13:2, CQ12). ¿Imataq Davidta yanaparqa mana hukmanyarunanpaq? Diosta mañakuyninmi. Payqa Diospa kuyasqan kasqanta musyakuspanmi payman sunqunta kicharirqa (Salmo 13:5; 62:8). Diosqa munachkanmi imapas llakichiwaqninchikkunata willananchikta, payqariki ñuqanchikmantam ‘nanachikun’ (1 Pedro 5:7).

Ichaqa imamantapas llakikuyninchikmi wakinpiqa yanapawanchikman pitapas yanapaykunapaq. Apostol Pablopas ‘iñiqkunamanta llakikusqanraykum’ tukuy imata ruwarqa kallpanchaykunanpaq (2 Corintios 11:28). Llakikuyninmi yanaparqa wakinkunata yanapaykunanpaq. Ñuqanchikpas chay ruwaytam atichwan. Hukkunata mana yanapaykuyninchikmi ichaqa qawachinman mana kuyakuyniyuq kasqanchikta (Proverbios 17:17).

“Amayá kikillaykichikpaqchu allintaqa munaychik aswanqa wakinkunapaqwanyá” (Filipenses 2:4).

¿Hinalla llumpayta llakikuspaykiqa?

IMATAM YACHANAYKI.

Wakinmi ñawpaqpi huchallikusqankumanta ñakakunku, wakinqa imayna hamuq punchaw kananmanta utaq qullqimantam llakikunku.a

¿IMATAM BIBLIA NIN?

Ñawpaqpi huchallikusqankumanta ñakakuy: Punta pachak watapi runakunam manaraq Jesuspa qatiqnin kachkaspanku karqaku sinkakuqkuna, huchapakuypi puriqkuna hinaspa suwakuqkuna (1 Corintios 6:9-11). Mana allinkuna ruwasqankumanta ñakakunankumantaqa Dios pampachasqanpim yuyaymanarqaku, chaymi Diospa munasqanman hinaña kawsakurqaku. Diosmantam Salmo 130:4 nin: “Qamllam pampachaykuwankikuqa”, nispa.

Hamuq punchawkunamanta llakikuy: Jesucristom nirqa: “Amayá afanakuychikchu hamuq punchawmantaqa. [...] Sapa punchawpaq sasachakuykunaqa amañayá hatunyachunchu”, nispa (Mateo 6:25, 34). ¿Ima niytam munarqa? Nichkarqam hamuq punchawkunapi sasachakuykuna kananpi mana llumpayta piensanapaq. Wakinpiqa ima sasachakuypi tarikunanchikmanta piensasqanchikqa manam chayamunchu.

Qullqimanta llakikuy: Bibliata huknin qillqaqninmi nirqa: “Amataq wakchayachiwaychu. Nitaq apuyarachiwaychu”, nispa (Proverbios 30:8). Payqa kapuqllanwan kawsakuytam yacharurqa, chayna kawsakuqkunatam Diosqa kuyan. Hebreos 13:5 nin: “Amayá apuyaytaqa kuyaychikchu ichaqa kapusuqnikichikwanyá contentakuychik. Diosmi nirqa: ‘Manapunim [...] saqisqaykichu’”, nispa. Diosqa manam saqinchu paypa munasqanman hina kawsaqkunataqa qullqim ichaqa rikuykunalla.

‘Allin runataqa manam qunqarusqataqa rikurqanichu. Wawa-churintapas manam limosnakuqtaqa rikurqanichu’ (Salmo 37:25).

¿Yaqachu haykallapipas llakikuyninchik chinkanqa?

¿IMATAM RUNAKUNA NINKU?

Harriet Green sutiyuq runam 2008 watapi huk periodicopi nirqa: “Kunanqa runakunam llumpayta llakikunku”, nispa (The Guardian). 2014 watapiñataqmi Patrick OConnor sutiyuq runa huk periodicopi nirqa: “Estados Unidos nacionpi yachaqkunam kunanqa llumpay llakikuywan imawanpas tarikunku”, nispa (The Wall Street Journal).

¿IMATAM BIBLIA NIN?

Proverbios 12:25 nin: ‘Preocupasqa kaptinmi runapa sunqun hukmanyasqa kachkan. Kuyakuy palabrakunawanmi ichaqa sunqun kusisqa kachkan’, nispa. Kuyakuy palabrakunataqa tarinchikmi Diospa munaychakuyninmanta allin noticiakunapi (Mateo 24:14). Dios kay pachata munaychakuspanqa chinkachinqam imapas llakichiwaqninchikkunata, unquykunata hinaspa wañuytapas. Chayna kananmantam biblia nin: ‘Diosmi pichanqa paykunapa wiqinta, manañam kanqachu wañuypas, lutokuypas, waqaypas nitaq nanaypas’, nispa (Apocalipsis 21:4).

“Kawsachiqninchik Diosninchikyá qamkunata kusikuyllawanña huntaykususpaykichik hawkayachisunkichik” (Romanos 15:13).