Imapas pasaruwananchikmanta

Alonam nin: “Alarmapa waqasqanta uyarispayqa llumpaytam manchakuni, chaymi utqayman pakakuni. Pakakuspaypas mancharisqallañam tarikuni. Huk punchawmi hawapi purichkaptiy alarma waqayta qallaykurqa. Mana imanakuytapas atispaymi waqayta qallaykurqani. Unayninmantañam hawkayarurqani. Ichaqa kaqmantamá alarma waqayta qallaykurqa”, nispa.

Guerrapa chawpinpi mana kawsaqkunapas hukmanyasqam tarikunmanku. Kaypi piensariy, sichu huk kaqnin ayllunchik utaq amistadninchik mana hampiy atina unquywan kasqanta yacharuspanchikqa hukmanyaruchwanmi. Wakinkum hukmanyanku hamuq punchawkuna imayna kananmanta piensaspanku, tapukunkum: “¿Imaynapiñaya warmaykunawan willkaykunaqa kawsakunqaku? ¿Ichapas guerrapa chawpinpi, qachallaña allpapi utaqchu imaymana unquypa chawpinpi?”, nispa. Chaynaqa, ¿imatam ruwachwan kaykunawan llakikuspaqa?

Bibliam nin: ‘Allin yuyayniyuq runaqa desgracia sucedenanta qawarispanmi asurikun’, nispa (Proverbios 27:12). Bibliapa kayna nisqanqa allinmi ¿aw? Imaynam imapas pasaruwananchikmanta waqaychakunchik, chaynallataqmi piensasqanchiktawan imayna tarikusqanchikta waqaychananchik. Maqanakuytawan noticiapi wañuchinakuyta qawaymi astawan warmanchikkunatawan ñuqanchikta hukmanyachiwanchik. Kaykunata mana qawayninchikqa allinninchikpaqmi. Diosqa unanchawarqanchik allin kaqkunallata qawananchikpaqwan piensananchikpaqmi. Chayta ruwaptinchikqa “waqaychawaqninchik Diosmi” hawkayachiwasun (Filipenses 4:8, 9).

DIOSTA MAÑAKUYQA ANCHA ALLINMI

Qawamusqanchikman hinaqa Diospi iñiyqa yanapawanchikmi hukmanyasqa kasqanchikta atipanapaq. Bibliam kallpanchawanchik sasachakuypi kaspa Diosta astawan mañakunapaq (1 Pedro 4:7). Uyariwananchikmanta mana iskayrayaspam yanapawananchikpaqwan, yachaytawan kallpata quwananchikpaq mañakuchwan (1 Juan 5:15).

Bibliam nin ‘kay pachapi mana allin kaqkunaqa diablopa makinpi kasqanta’, manam Diospa makinpichu (Juan 12:31; 1 Juan 5:19). Chayraykum Jesusqa kaynata mañakunapaq yachachirqa: “Librawaykuyá diablomanta”, nispa (Mateo 6:13). Mañakuyqa hawkayachiwachwanmi. Alonam nin: “Alarmakuna waqaykamuptinmi Diosta mañakuni hawkayachiwananpaq. Chaymantapas, qusaymi telefonowan qayamuwan Diosta mañakunaykupaq. Chaywanmi hawka tarikuni”, nispa. Chaychá bibliaqa nin: “Diosqa llapallan qayakuqninkunapa hichpallanpim kachkan”, nispa. Arí, sunqumanta mañakuqtam yanapan (Salmo 145:18).

¿KANMANCHU IMA SUYAKUYPAS?

Jesusmi ancha riqsisqa yachachikuyninpi qatiqninkunaman yachachirqa Diosta kaynata mañakunankupaq: “Munaychakusqayki hamuchun”, nispa (Mateo 6:10). Diospa munaychakuynin utaq kamachikuyninmi hukmanyasqa kasqanchikta chinkachinqa. ‘Hawkayay qukuq kamachikuq’ Jesucristom guerrakunata enteron pachapi tanichinqa (Isaias 9:6; Salmo 46:9). “Tayta Diosmi juzganqa achka-achka runakunata [...]. Manañam nacionpurapas peleanqakuñachu. Guerrapaqpas manañam yachanqakuñachu”. Hinaspa, “manaña pipapas manchachisqanmi hawkaña kakunqaku” (Miqueas 4:3, 4). Ayllukunam ‘wasikunata hatarichinqaku hinaspam chaypi yachanqaku. Uvas huertakunatam plantanqaku hinaspam rurunta mikunqaku’ (Isaias 65:21). Manañataqmi pipas ‘unquchkanim’ nispaqa ninqañachu (Isaias 33:24).

Ichaqa, imataña ruwaptinchikpas wakinpiqa qunqayllamantam imapas pasaruwachwan (Eclesiastes 9:11). Chaymantapas, mana huchayuq runakunam guerrakunapi, maqanakuypi hinaspa unquykunawan wañunku. ¿Kusikunapaqchu chaynapi tukuyqa?

Waranqantin runakunatam Diosqa kawsarichinqa. Payllam yachan hayka kawsarinantaqa. Kawsarinanku punchawkamam Diospa yuyayninpi “llapallan wañuqkuna” kachkanku (Juan 5:28, 29). Bibliam nin: ‘Lamar quchapa patanpi bote watasqa hinam confianzanchikqa almanchikta takyachin’ nispa (Hebreos 6:19). Chaymi Diosqa lliw runakuna creenankupaq Jesusta kawsarichirqa (Hechos 17:31).

Kunanpas Diosta servinankupaq kallpanchakuqkunaqa hukmanyasqam tarikunku. Rimamusqanchik Paulpa, Janetpa hinaspa Alonapa hukmanyasqa tarikusqankuta atipanankupaqmi yanaparqa, allin tanteowan imatapas ruwasqanku, Diospa yanapakuyninta mañakusqanku hinaspa hamuq tiempopi Dios ima ruwananpi yuyaymanasqanku. Paykuna hinam ñuqanchikpas hukmanyasqa kayninchikta atipayta atichwan, bibliam nin: “Confianzawan kawsachiqninchik Diosninchikyá qamkunata kusikuyllawanña huntaykususpaykichik hawkayachisunkichik”, nispa (Romanos 15:13).