¿Imatam ruwawaq imapas pasasuptiki?

IMAM SASACHASUNKIMAN

• Tayta-mamaykim huk llaqtamanña llamkayrayku illanan.

• Kuyasqa amistadnikim huk llaqtaman ripukun.

• Mayor wawqiki utaq panikim casarakuruspan ripukun.

¿Imataq yanapasunkiman kaykuna pasasuptiki mana llumpayta hukmanyanaykipaq?

Wayrawan kurkuykuq sachakunaqa manam wayrawanqa anchachu pakikunku. Yaqa chayna ruwaytam qampas atiwaq sichum qunqayllamanta imapas karuptinqa. Ichaqa ima ruwanaykikunamanta manaraq yachachkaspa, puntataqa yachaykusun imanasqa chaykuna kasqanmanta.

IMATAM YACHANAYKI

Kawsasqanchikpiqa imapas kanqapunim. Bibliam nin kawsakuyninchikpiqa imapas qunqayllamanta pasakunanmanta (Eclesiastes 9:12, Chuya Qellqa 2012). Chaynam pasakun vidapiqa. Ichaqa wakinpiqa imapas pasakusqankunaqa allinninchikpaqmi, qallariyllanpi mana chaynapaq rikchakuspanpas. Chayna kaptinpas, yaqa lliwmi hawka tarikunku imayna kawsakusqallankuwan, ichaqa imapas qunqayllamanta pasaruptinmi hukmanyanku allinninkupaqña kachkaptinpas.

Mozo-sipaskunam astawanqa sasachakunku. ¿Imanasqa? Alexmia nin: “Ñam hukmanyasqaña tarikunki cuerpoyki cambiasqanrayku. Chaywanpas imapas pasakusqankunaqa astawanmi sasachasunki”, nispa.

Yuyayniyuqkunaqa imapas pasaruptinqa yachankuñam chay sasachakuyta imayna atipayta. Mozo-sipaskunam ichaqa manaraq anchachu yachanku imayna atipayta.

Atichwanmi imaña pasawaptinchikpas allin kawsakuytaqa. Wakin mozokunaqa imataña pasaspankupas atinkum sasachakuykunata atipaspa allin kawsakuyta. Chayna kaq mozokunaqa manam sasachakuy pasarunallantachu suyanku, aswanqa chay pasasqankuwanmi yuyayta hapinku. Chaymi trago tomaymanqa utaq drogakuymanqa mana chayllaqa wichiykunkuchu.

¿IMATAM RUWAWAQ?

Munasqaykiman hina imapas mana kaptin. Munankichá imapas munasqaykiman hinalla pasakunanta, ichaqa manam atiwaqchu. Wakin amistadnikikunam ripukunqaku, wawqikikunapas hatunyaruspankuqa ripukunqakum, utaqmi huk law llaqtaman aylluykiwan kuska ripunayki kanqa. Chaymi llakillaykipi piensanaykimantaqa imayna tarikusqaykiman hinaña allinta kawsakunaykipaq kallpanchakunayki (bibliapa yachachisqan: Eclesiastes 7:10).

Hamuq punchawkunapiña piensay. Imapas pasaruwasqallanchikpi piensayqa manam allinchu, chayqa qipata qawaspalla carro apay hinam kanman. Aswan allinqa chay imapas pasawasqanchikmanta qipaman imaynaña kawsakunapaq yuyaymanaymi (Proverbios 4:25). Chaymi tapukuwaq: “¿Ima ruwaytam munayman? ¿Yaqachu chay ruwayta atiruyman kayna killakunallapi?”, nispa.

Allin kaqkunallapi piensay. Lauram nin: “Imapas pasaruwaptinchikqa yuyaymanananchikmi chay pasawasqanchikmanta imakuna yachasqanchikpi”, nispa. ¿Imakunatam yachawaq imapas pasasusqaykimanta? (bibliapa yachachisqan: Eclesiastes 6:9).

Victoria sutiyuq sipasmi nin: “Warmallaraq kachkaptiymi lliw amistadniykuna karu llaqtaman ripukurqaku. Chaymi hukmanyarurqani. Munarqanim paykunawan kayta. Ichaqa chay tiempopim yuyayta hapirqani. Wiñasqayman hinataqmi musyakurqani imapas pasakusqanta, musyakurqanitaqmi wakin runakunawanpas amistadta armay atinaymantapas”, nispa (bibliapa yachachisqan: Proverbios 27:10).

Hukkunata yanapay. Hukkunata yanapanapaqmi biblia kaynata niwanchik: “Amayá kikillaykichikpa allinnikichiktachu maskaychikqa, aswanqa wakinnikichikpa allinnintayá”, nispa (Filipenses 2:4). Imapas pasawasqallanchikpi mana llumpayta piensanapaqqa hukkunata yanapaymi yanapawasun allin tarikunapaq. 17 watanpi Anam nin: “Cuentatam qukuruni ima llakinpipas pitapas yanapaspayqa aswan allin tarikusqaymanta”, nispa.