4 KAQ
Yachachikuy mana qilla kanankupaq
¿IMAYNAM MANA QILLA RUNAQA?
Chayna runaqa tiempollanpim imapas nisqankuta ruwan.
Warmakunapas taksanmantam yachananku imapas nisqankuta cumpliyta. Padres sin fronteras sutiyuq qillqapim nin: “Warmachakunaqa wata masniyuq kasqanmantapacham imapipas yanapakuyta atinmankuña. Yaqa iskay watachanpi warmachakunañataqmi munankuña kikinkumanta imapipas yanapakuyta. Wakin llaqtakunapiqa tayta-mamankum churi-wawankutaqa pichqa watachanmanta qanchis watachankama ima ruwaytapas yachachinku. Chayna watachayuq achka warmachakunam wasinkupi ima ruwaykunapipas allinta yanapakunku”, nispa.
¿IMANASQATAQ ANCHA ALLIN?
Achka musu-sipaskunam tayta-mamankumanta ripukuspanku sasachakuypi kaspanku tayta-mamankuman kutimunku. Sasachakuykunapiqa kanku qullqita yanqakunapi usuchisqankuraykum, wasinku pichakuyllatapas mana atisqankuraykum utaq imallatapas mana ruwayta atisqankuraykum.
Chayraykum warmaykitaqa yachachinayki yuyayniyuq kaspan ama ñakarinanpaq. Cómo preparar a su hijo para la edad adulta sutiyuq libropim nin: “Manachá munankichu 18 watankama qamlla warmaykipaq tukuy imata ruwasqaykirayku, chay watanmanta qipaman ñakarinantaqa”, nispa.
¿IMAYNATAM YACHACHICHWAN MANA QILLA KAYTA?
Imakunatapas ruwachkananpaqyá kamachiy
BIBLIAPIM NIN: “Anchata llamkakuq runaqa allinmi kanqa”, nispa (Proverbios 14:23).
Taksa warmakunaqa tayta-mamankuwanmi imakunatapas ruwayta munachkanku. Hinaptinqa, imakunatapas ruwaysisunaykichikpaqyá kamachiychik.
Wakin tayta-mamakunam ninku warmanku achka tareayuq kasqankurayku manaña imatapas kamachisqankumanta.
Chayna kaptinpas tayta-mamankuta yanapaq warmakunam escuelankupipas allin warmakuna kanku imapas kamachisqankuta ruwaq kasqankurayku. Huk qillqam nin: “Yanapakuyllataña munaptinku warmakunata ‘manam’ niptinchikqa hatunyaspankum hukkuna yanapaytaqa mana munanqakuchu. Chaymantapas tukuy ima ruwasqallaña kanantam munanqaku”, nispa.
Chaynaqa, warmakuna imapipas yanapakuspankuqa yachankum hukkunapaq imapas ruway ancha allin kasqanta. Chaymantapas wasinkupi kaqkunata yanapasqankuraykum allin tarikunku.
Pantasqankunata allichananpaqyá yanapay
BIBLIAPIM NIN: “Allinnikipaq imapas nisusqaykitaqa kasukuyá, rimapayasusqaykitapas chaskikuyá chaynapi hamuq punchawkunapipas yachayniyuq kanaykipaq”, nispa (Proverbios 19:20).
Warmayki pantaruptinqa ama upallakuychu, warmakunaqa pantasqanku allichaytam atinmanku. Hukpata imantapas pakirapuspaqa pampachaykunantam maskananku, hinaspam atisqankuman hina pakirusqankuta allichananku.
Warmaykichikkuna pantasqankuta riqsikuspankuqa kaykunatam yachanqaku:
Mana llullakuyta.
Hukkunaman mana tumpayta.
Pantasqanku riqsikuyta.
“Pampachaykuway” niyta.