Diosman sonqo Job runamanta

¿MANACHU llakichisunki chay onqoq runa? Sutinmi Job, warmiñataqmi paypa warmin. ¿Yachankichu imatataq Jobta nichkan? ‘Diosta ñakaspaykiyá wañuy’ nispam nichkan. Kunanyá yachasunchik imanasqataq chaynata rimarqa, hinaspa imanasqataq Jobqa llumpayta ñakarirqa.

Jobqa Diosman sonqo kaspanmi Jehová Diosta kasukurqa. Canaan lawpa hichpallanpi Uz sutiyoq lawpim Jobqa yacharqa. Jehová Diosqa llumpayta Jobta kuyarqa, ichaqa Jobta cheqniqninpas karqam. ¿Yachankichu pitaq chay cheqniqnin kasqanta?

Satanas Diablom karqa. Yuyariy, Satanasqa mana allin angelmi, payqa Jehová Diosta cheqninmi. Paymi Adantawan Evataqa engañarqa Diosta mana kasukunankupaq, hinaspa llapallan runakunata Diosta mana kasukunankupaq engañaruytapas munarqa. Ichaqa, ¿atirqachu chayna rurayta? Manam. Yuyariyá Diosman sonqo achka warmi-qarikunamanta yachasqanchikta. ¿Haykatam sutichawaq?

Egipto nacionpi Jacob hinaspa Josey wañukusqankumantaqa, Jobllam enteron Allpapiqa Diosman sonqo karqa. Jehová Diosqa qawachiyta munarqa llapallan runakunata mana allin kanankupaq Satanas engañayta mana atisqanta, hinaspa nirqa: ‘Serviqniy Jobta qaway. Payqa munasqayman hina ruraqmi.’

Satanasñataqmi nirqa: ‘Payqa adorasuchkanki qam bendeciykuptikim, paypaqa tukuy ima kapuqninpas sumaqllaña. Ichaqa kapuqninta purmarachiptikiqa uyaykipipunim ñakasunki’ nispa.

Chaymi Jehová Diosqa nirqa: ‘Rispayá mana allin munasqaykita Jobta ruramuy. Yaqachus ñakaruwanqa. Ichaqa amam wañurachinkichu’ nispa.

Satanasqa puntatam Jobpa uywankunata hinaspa camellonkunata runakunawan suwarachirqa, hinaspa ovejankunatapas wañurachirqa. Wañurachirqataq chunka churinkunatapas. Chaymanta Jobta chay mana allin onqoywan hapirachirqa. Chaywanmi Jobqa llumpayllataña ñakarirqa. Chaymi Jobta warmin nirqa: ‘¡Diosta ñakaspaykiyá wañuy!’ nispa. Jobmi ichaqa mana munarqachu. Chaymantapas, kimsa amigon tukuqkuna payta nirqaku mana allinta ruraspa kawsakusqanmanta ñakarisqanta. Jobñataqmi ichaqa mana huchallikurqachu.

Jobpa chayna rurasqanmi Jehová Diostaqa anchata kusichirqa, hinaspa dibujopi qawasqaykiman hina Diosqa Jobta bendecirqa. Onqosqanmantam sanoyarachirqa. Chunka kuyayllapaq suma-sumaq churinkunapas karqa, chaymanta uywankunapas, ovejankunapas hinaspa camellonkunapas ñawpaq kapuqninmantaqa huk chaynatawanraq kapurqa.

¿Job hinachu qampas Diosman sonqolla wiñaypaq kawaq? Chayna kaptikiqa, Diosmi bendecisunki. Hinaptinqa enteron Allpa Eden huertaman hina tikrakuptinmi wiñaypaq kawsakunki.