40 KAQ YACHACHIKUY
¿Imaynatataq Diosta kusichichwan?
¿IMAYNATATAQ Diosta kusichichwan? ¿Yaqachu imatapas quspanchik?... Manam. Diosmi nin: ‘Ñuqallapam llapallan purun animalkunaqa. Ñuqallapam qullqipas chaynataq quripas’, nispa (Salmo 24:1; 50:10; Hageo 2:8). Hinaptinqa, ¿imaynatataq Diosta kusichichwan?...
Jehova Diosqa manam hikutawanchikchu payta servinanchikpaqqa, aswanqa munanmi sapakama tanteakuspa servinanchikta utaq mana servinanchiktapas.
Jehova Diosqa unanchawarqanchik kikinchikmanta tanteakuspa kawsakuqtam, manam maquinakunata hinachu. ¿Imaynataq maquinakunaqa kanku?... Maquinakunaqa ruwaqninpa tanteasqanman hinallam imatapas ruwanku, manam kikinkumanta tanteaspachu. Wakin maquinakunaqa botonninta ñitisqallam kuyurinkupas. ¿Rikurqankichu maypipas chayna niraq pukllanakunatapas?... Diosqa manam maquinakuna hina kasukunanchiktachu munan, aswanqa kuyasqanchikrayku hinaspa sunqumanta kasukuy munasqanchikrayku kasukunanchiktam.
¿Imanasqataq Diosqa maquinakunaman rikchakuq pukllanata hinaqa mana ruwawarqanchikchu?
¿Imaynataq Jehova Diosqa tarikunman kuyasqanchikrayku kasukuptinchik?... Tayta-mamaykipas, ¿kusikunmanchu utaq llakikunmanchu imapas ruwasqaykiwan?... Bibliapim nin: ‘Yachayniyuq churiqa taytan kusichiqmi. Mana yachayniyuq wawaqa maman llakichiqmi’, nispa (Proverbios 10:1). Chaynaqa tayta-mamaykiqa kusikunkum imapipas paykunata kasukuptikiqa ¿aw?... ¿Mana kasukuptikiqa?...
¿Imata ruwaspam Diostapas chaynataq tayta-mamaykitapas kusichiwaq?
Hinaptinqa, ¿ima nichwantaq Jehova Diosmanta? Bibliapim niwanchik imayna kusichinanchikmanta. ¿Maskaykuwaqchu Proverbios 27:11 nisqanta? Chaypim Dios nin: ‘Churilláy yachayniyuq kaspayá sunquyta kusiriykachiy. Chayna kaptikiqa contestasaqmi insultaqniyta’, nispa. ¿Imaynataq insultakuq runaqa? Pipas insultakuqqa burlakuqmi hinaspapas asipayakuqmi. Chaynaqa, ¿pitaq Diosta insultaqqa kanman?... Satanasmi. ¿Ima nispataq Diosta insultan?... Chaymantayá yachaykusunchik.
Kay qillqapim 8 kaq yachachikuyninpi yachamurqanchik satanasqa Diosmanta aswan riqsisqa kayta munasqanmanta, hinaspa runakuna payta yupaychananta munasqanmanta. Satanasqa ninmi wiñay kawsayta chaskinanchikraykulla Jehova Diosta yupaychasqanchikta. Chaymi Adanwan Eva Diosta qipancharusqan qipallanta Diosta insultaspan nirqa: ‘Imatapas qanmanta chaskiyta munaspallanmi runakunaqa yupaychasunki. Saqiykuwaptikiqa pitapas qanmantaqa karuncharuymanmi’, nispa.
¿Imatam satanasqa Jehova Diosmanta rimarqa Adanwan Eva huchallikurusqan qipaman?
Chayna nisqanpuni bibliapi mana tarikuptinpas, Job qillqata qawaspanchikmi yachanchik yaqa chayna niraqta rimasqanta. Chaynaqa Jehova Diospas hinaspa satanaspas yachaytam munarqaku imayna sunquyuq Job kasqanmanta. Chaymantam rimachkan Job 1 hinaspa 2 capitulokunapi.
Punta kaq capitulopim willawanchik angelkunawan hanaq pachapi Jehova Dios huñunakuptin satanaspas chaypi kasqanmanta. Chaymi Diosqa satanasta tapurqa: “¿Maymantataq hamuchkanki?”, nispa. Satanasñataqmi nirqa: “Allpa pachata canton-canton muyumusqaymantam”, nispa. Hinaptinmi kaqmanta Diosqa tapurqa: ‘¿Yaqachu rikumurqanki serviqniy Jobta? Payqa allin kaqkuna ruwaqmi’, nispa (Job 1:6-8).
Diablopaqqa manam chaynachu karqa. Chaymi nirqa: ‘Jobqariki adorasuchkanki imatapas chaskinanraykullam, mana imatapas quptikiqa uyaykipipunim ñakasunki’, nispa. Diosñataqmi nirqa: ‘Allinmi, munasqaykitayá ruway Jobpa kapuqninwanqa, ichaqa amam imanankipaschu kikin Jobtaqa’, nispa (Job 1:9-12).
Hinaptinqa, ¿imatam ruwarqa satanasqa?... Satanasqa Jobpa toronkunata hinaspa asnonkunatam lliwta runakunawan suwarachirqa hinaspa michiqkunatapas wañurachirqa. Chaymantapas ovejankunatawan oveja michiqninkunatam rayo wichiykamuspan wañurachirqa. Hinaspapas chunkantin churinkunatam wañurachirqa yachasqanku wasita tuñirachispan. Ichaqa tukuy chaykunawanpas Jobqa hinallam Diosta yupaycharqa (Job 1:13-22).
Kaqmanta satanaswan rimaspanmi Jehova Diosqa nirqa Jobqa hinalla tukuy sunqunwan yupaychasqanta. Hinaptinmi diabloqa nirqa: ‘Aychanpiwan tullunpi nanayta quykuptikiqa uyaykipipunim ñakasunki’, nispa. Diosñataqmi diabloman ñakarichinanpaq quykurqa, ichaqa nirqam ama wañurachinanpaq.
¿Imawanmi Jobqa ñakarirqa hinaspa imaynatam Diosta kusichirqa?
Chaymi satanasqa chupu unquywan Jobta tukururqa. Chaywan millakuypaqta Job asnariptinmi mana pipas asuykurqachu. Warminpas nirqam: “¡Diosta ñakaspaykiyá wañuy!”, nispa. Amistadninkunapas llumpaytam llakichirqaku mana allinkuna ruwasqanrayku ñakarisqanta nispanku. Tukuy chaykunawan satanas ñakarichiptinpas Jobqa hinallam tukuy sunqunwan Jehova Diosta servirqa (Job 2:1-13; 7:5; 19:13-20).
Jehova Diosqa mayna kusisqachá tarikurqa Jobta qawaspanqa ¿aw?... Satanastachá nirqa: ‘¡Qaway Jobta! Payqa tukuy sunquwan serviqniymi’, nispa. Qamqa, ¿atiwaqchu Job hina kayta?... Atiwaqmi. Pay hina imaña kaptinpas Diosman sunqu kaspaykiqa Diostam kusichinki hinaspam satanasqa llulla kasqanta qawachinki. Chaytam Jesuspas ruwarqa.
Jesusqa manam haykapipas satanaspa makinmanqa wichiykurqachu. Chaywanqa, ¡maynataya Jehova Diosqa kusikurqa! Hinaspachá Jesusmanta rimaspan satanasta nirqa: ‘¡Qaway churiyta! Imaña kaptinpas tukuy sunqunwanmi kuyawan’, nispa. Jesuspas chaynallataqchá taytan kusikusqanta yachaspan kusikurqa. Chayraykum qirupi wañuytapas mana manchakurqachu (Hebreos 12:2).
¿Munawaqchu Jesus hina kaspa Jehova Diospa sunqun kusichiyta?... Jehova Diostaqa kusichinki munasqanman hina kawsakuspaykim.
Bibliapi qawasun imakunata ruwaspa Jehova Diosta Jesus kusichisqanmanta hinaspa ñuqanchikpas imayna kusichinamanta Proverbios 23:22-25; Juan 5:30; 6:38; 8:28 hinaspa 2 Juan 4.