Qorimanta malta torota rurasqankumanta

¡AMAYÁ! ¿Imatam runakunaqa rurachkanku? ¡Malta torota yupaychachkanku! ¿Imanasqataq chaynataqa rurachkanku?

Orqomanta Moises unayña mana hamuptinmi, runakunaqa ninakurqaku: ‘Moisestaqa imachá pasarun, manam yachanchikchu. Rurasunchik pusawananchikpaq taytachata’ nispa.

Moisespa wawqen Aaronñataq nirqa: ‘Qorimanta aretekunata horqospa apamuychik.’ Aaronñataqmi chayta chullurachispan qorimanta malta torota rurarurqa. Israel runakunañataqmi ninakurqaku: ‘¡Kaymi Egipto nacionmanta horqomuwaqninchik Diosqa!’ nispa. Hinaptinmi fiestata ruraykuspanku qorimanta torota yupaycharqaku.

Chayna rurasqankuta Jehová Dios rikuramuspanmi piñakururqa. Chaymi Moisesta nirqa: ‘Apurawta kutiy. Runakunam chaylla Kamachikuyniykunamanta rakikuruspanku fundisqa malta torota adoraspankum huchallikurunku’ nispa.

Chayllam Moisesqa orqomanta kutimurqa. Campamentoman asuykuspanmi rikururqa ¡malta toro taytachata hinaspa runakunapa tususqankuta! Chaymi Moisesqa piñakuruspa hapisqan tabla rumikunata chamqarurqa hinaptinmi pakipakururqa. Hinaspanmi chay rurasqanku malta toro taytachata kañaykurqa. Hinaspa ñutuy-ñutuyta kutarurqa.

Diospa cheqnisqantam llaqtaqa rurarqaku. Chaymi Moisesqa wakinkunata espadankuta alistanankupaqmi kamachirqa. ‘Malta torota yupaychaqkunatam wañuchinkichik,’ nispam nirqa. ¡Chaymá 3.000 runakunata wañurachirqaku! ¿Manachu kayqa qawachiwanchik Jehová Diosllata yupaychaspa taytacha-mamachakunata mana yupaychanapaq?