Nisqankuta mana ruwasqankumanta

Diosmi Moisesta nirqa: “Qispimuy ñuqapa kasqay urquman. Tabla rumikunapim kamachikuykunata qillqaspay qusqayki”, nispa. Chaymi Moisesqa 40 punchaw chay urqupi kamurqa, chaypim Diosqa iskay tabla rumikunapi chunka kamachikuykunata qillqaspan qurqa.

Chay urqumanta Moises manaña kutimuptinmi Israel runakunaqa Aaronta nirqaku: “¡Taytachataña ruwapuwayku pusawanankupaq!”, nispa. Chaymi Aaron paykunata nirqa: “Apamuwaychik qurimanta imapas kaqta”, nispa. Hinaspam qurikunata chulluchispan malta torota ruwarurqa, hinaptinmi runakunaqa nirqaku: “¡Kaymi Egiptomanta hurqumuwaqninchikqa!”, nispa. Hinaspam tususparaq yupaycharqaku. Paykunaqa Jehova Diosllata yupaychanankupaq nichkaspankupas qipancharurqakum.

Chaynata qawaspam Sinai urqupi kachkaptin Moisesta Jehova Dios nirqa: “Kutiy Israel runakunapa kasqanman. Paykunam malta toroman rikchakuq taytachata yupaychaspa huchallikuchkanku”, nispa. Chaymi Moisesqa makinpi iskay tabla rumiyuq kutimurqa.

Hinaspam runakunata takispa, tususpa malta toro yupaychachkaqta tarirurqa. Chaymi Moisesqa piñakuruspan tabla rumi apasqantapas chamqaruspan pakirurqa. Malta toro ruwasqankutapas ñutuparurqam, hinaspam Aaronta tapurqa: “¿Imatataq kay runakunaqa ruwasurqanki kay huchata ruwanaykipaqqa?”, nispa. Hinaptinmi Aaron nirqa: “Ama piñakuychu, yachankiñam imayna kasqankuta. Taytachata munaptinkum qurita ninaman wischuykuptiy chay malta toro rikurirurqa”, nispa. ¡Chayqa hatun hucham karqa! Chaymi Moisesqa urquman kaqlla kutispan Jehova Diosta ruegakurqa Israel runakunata pampachaykunanpaq.

Jehova Diosqa llapallan kasukuqkunatam pampachaykurqa, munarqataqmi Moisestapas kasukunankuta.