Yachaysapa Gabaon runakunamanta

CANAAN lawpi llaqtakunaqa Israel castakunapa contranpi peleanankupaq preparakurqaku. Vencerunankutam tanteakurqaku. Gabaon llaqtayoq runakunam ichaqa mana chaynatachu piensarqaku. Paykunaqa musyakunku Israelpa mirayninkunata Dios yanapasqanta, hinaspa manam munankuchu Diospa contranpi peleaytaqa. Hinaptinqa, ¿yachankichu Gabaon runakunapa rurasqankuta?

Karu nacionmanta hamusqankuta hamuq tukurqaku. Chaynapimá wakinkunaqa mawka pachawan chaynataq mawka usutawan churakurqaku. Asnonkumanpas mawka costalkunata cargaruspanku chaki qoqarasqa tantatawanmi aparqaku. Hinaspam Josueyman rispanku nirqaku: ‘Ñoqaykuqa llumpay karu nacionmantam hamurqaniku Jehová Diosnikichikpa ancha reqsisqa sutinrayku. Uyarirqanikum Egipto nacionpi paypa tukuy ima rurasqankunata. Llaqtaykupi ancianoykunam niwarqaku ñanniykupaq necesitasqaykuta aparikamuspa qamkunaman hamuspayku ninaykupaq: “Serviqnikikunam kaniku. Juramentaykuwaychik ñoqaykuwan mana peleanaykichikpaq”, nispa. Kayqaya pachaykupas karumanta hamusqaykurayku mawkayasqaña kachkan, kay tantayku kunanqa chakiruspan qoqarachkanña’ nispa.

Josueywan Israel runakunapa wakin jefenkunapas chayta qawaykuspa Gabaon runakunata creerurqaku. Chaymi paykunawan mana peleanankupaq contratota rurarqaku. Kimsa punchawllanmantam ichaqa yacharurqaku Gabaon runakunaqa hichpallankupi yachasqankuta.

Josueyñataqmi tapurqa: ‘¿Imanasqataq engañawarqankiku: “Llumpay karumantam hamuniku” nispaqa?,’ nispa.

Chaymi Gabaon runakuna nirqaku: ‘Yupaychasqayki Jehová Dios tukuy kay Canaan allpata qamkunaman qosunaykichikta yacharuspaykum wañuchiwanaykikumanta manchakurqaniku’ nispa. Israelpa mirayninkunam cumplirqaku prometesqankuta, hinaspa Gabaon runakunata mana wañurachirqakuchu. Aswanqa sirvientenkunapaqña hapirurqaku.

Jerusalen llaqtapa reyninmi piñakururqa Gabaon runakuna Israel casta runakunawan hawkalla kanankupaq contratota rurasqankumanta. Hinaptinmi huk kaqnin tawa reykunata nirqa: ‘Hamuychik hinaspa yanapawaychik Gabaon llaqtapa contranpi peleananchikpaq’ nispa. Hinaptinmi chaytam pichqa reykunaqa rurarqaku. Kay pichqa reykuna contranpi hamuchkaptinkuqa, ¿yachayniyoq runakuna hinachu Gabaon runakunaqa Israel runakunawan contratota rurarqaku? Qawasunchikyá.