Josueymantawan Gabaon runakunamanta

Canaan allpapi wakin llaqtakunapas yacharurqakum Jerico llaqta munaychakusqa kasqanmanta, chaymi hukllawakururqaku Israel runakunapa contranpi peleanankupaq. Gabaon runakunam ichaqa mana hukllawakuspanku mawka pachawan hinakuruspa Josueyman rispa nirqaku: “Karu-karumantam hamurqaniku. Uyarirunikum Egiptopi hinaspa Moab nacionpi Jehova Dios yanapasusqaykichikta. Sichum mana wañuchiwaptikikuqa sirvientekikunam kasaqku”, nispa.

Chaymi Josueyqa nisqankuta allinpaq hapispan mana wañuchinankumanta nirqa. Ichaqa kimsa punchawmantam yacharurqa karu-karumanta mana hamusqankuta, aswanqa Canaan allpallamanta kasqankuta, chaymi nirqa: “¿Imanasqam llullakuwarqankiku?”, nispa. Paykunañataqmi nirqaku: “Qamkunawan Jehova Dios kasqanraykum manchakurqaniku. Amayá wañuchiwaykuchu”, nispa. Hinaptinmi Josueyqa paykunaman nisqanta yuyarispan mana wañuchirqachu.

Chaymantam Canaan allpapi pichqa kamachiqkuna tropankunapiwan Gabaon runakunata chinkachiq rirqaku. Josueyñataqmi tropankunawan Gabaon runakunata yanapanankupaq tukuylla tuta rirqaku. Achikyaykuptillanmi peleayta qallaykurqaku. Canaan runakuna chiqiruspanku ayqikuchkaptinkum Jehova Diosqa hatun rumi sayaykunata runtu parata kachaykamurqa. Josueyñataqmi Diospi hapipakusqanrayku mañakurqa intita sayachinanpaq. Dios sayarachiptinmi mana tutaykurqachu Canaan allpapi kamachiqkunatawan tropankunata wañuchinankukama.