Davidpa lluptisqanmanta

GOLIAT runata David wañurachiptin, Israel tropakunapa jefen Abnerqa Davidta pusarqa Saulman. Saulñataqmi tropankunapa jefen kananpaq Davidta churarurqa hinaspa wasinpi yachananpaqpas pusarqa.

Filistea runakunawan peleamusqankumanta tropakunawan David kutimuptinmi, warmikuna takispa nirqaku: ‘Saulmi wañurachimun waranqa soldadokunata, Davidñataqmi wañurachimun chunka waranqata’, nispa. Chayta uyariruspanmi Saulqa piñakururqa paymanta Davidta astawanraq hatunchasqankumanta. Saulpa churin Jonatanmi ichaqa mana envidiakunchu. Payqa Davidtam kuyan, Davidpas kuyantaqmi Jonatanta. Chaymi Jonatanwan Davidqa contratota rurarqaku wiñaypaq amigo kanankupaq.

Davidqa sumaqtam arpata tocarqa, Saulñataqmi chaywan allinta sientekuq karqa. Huk punchawmi Saulqa Davidta envidiakuspa paypa contranpi mana allinta rurarqa. David arpanta tocachkaptinmi Saulqa lanzata hoqariykuspa Davidta choqarurqa hinaspa kaynata nirqa: ‘Lanzawanyá Davidta perqaman clavarusaq’ nispa. Ichaqa David surtiruptinmi lanzaqa mana hapirqachu. Chaymanta yapatawan Saulqa lanzawan choqaspan Davidtaqa mana hapichirqachu. Hinaptinmi Davidqa chayraq musyarurqa Saulmanta astawan cuidakunanpaq.

¿Yuyachkankichu Saulpa prometekusqanta? Payqa prometekurqa Goliatta wañurachiq runata warmi churinwan casarachinanpaq. Chaymi Saulqa Davidta nirqa warmi churin Micalwan casarakunanpaq, ichaqa 100 Filistea runakunataraqmi wañuchinan. ¡Qaway! Saulqa munarqa Filistea runakuna Davidta wañurachinankutam. Ichaqa manam chaynachu karqa, hinaptinmi Saulqa Davidta warmi churinwan casarachirqa.

Hinaspanmi Davidta wañurachiyta munasqantam Saul nirqa churin Jonatantawan llapallan serviqninkunata. Jonatanñataqmi nirqa: ‘Amayá mana allintaqa Davidpa contranpiqa ruraychu. Payqa manam ima mana allintapas rurasurqankichu. Aswanqa vidantapas peligroman churaykuspanmi Goliat sutiyoq runata wañurachirqa, qanmi chayta qawaykuspayki kusikurqanki’ nispa.

Chaymi Saulqa churin Jonatanpa nisqanta uyarispa prometekurqa Davidta mana wañuchinanpaq. Hinaspa Davidta pusaramuspanku ñawpaqta hina Saulta yanaparqa. Hinaptinmi, David arpanta tocachkaptin, Saulqa yapatawan lanzawan choqarurqa. Davidñataqmi surtiruptin, lanzaqa perqaman clavakururqa. ¡Kaywanqa kimsa kutitañam lanzawan choqarurqa! ¡Chaymi Davidqa chayraq lluptinanta tanteakurqa!

Hinaspam Davidqa chay tutapuni wasinman pasakurqa, Saulmá runakunata kacharqa Davidta wañurachinankupaq. Taytan Saul munasqanta Mical yacharuspanmi Davidta nirqa: ‘Kunan tuta mana lluptikuptikiqa paqarinmi wañunki’ nispa. Chay tutam Davidtaqa warmin Mical wasinpa ventananta lluptikunanpaq yanaparqa. Chaymi Davidqa yaqa qanchis wata Saulmanta ayqekuspan kayman-wakman rispa pakakurqa.