Davidmantawan Saulmanta

Goliatta David wañurachiptinmi Saulqa tropankunapa kamachiqnin kananpaq Davidta akllarurqa. Davidqa allin peleaq kasqanraykum riqsisqa karqa. Peleamusqanmanta sapa kuti kutimuptinmi warmikuna takispa chaynataq tususpa niqku: “Saulmi achka enemigonkunata wañurachimun. Davidñataqmi aswan achka-achkataraq”, nispa. Chayta uyariruspanmi Saulqa Davidta chiqnispan wañurachiyta munarqa.

Davidqa miskichatam arpata tocaq. Huk punchawmi arpata tocapuchkaptin Saulqa lanzawan chuqarurqa. Ichaqa kurkuykuptinmi lanzaqa pirqaman chayarurqa. Chaymantapacham Saulqa tukuyta ruwarqa Davidta wañuchinanpaq. Davidñataqmi ayqikuspan chunniqpi pakakurqa.

Saulñataqmi 3.000 soldadonkunawan Davidta qatikacharqa. Huk kutipim mana yachastin Saulqa Davidpa pakakusqan machayman yaykururqa. Chaymi Davidta runankuna nirqaku: “Kunanyá Saulta wañurachiy”, nispa. Davidñataqmi Saulman upallalla asuykuruspan pachanpa puntanta kuchururqa. Chayna ruwasqanwanqa manam Diospa akllasqan kamachiqta respetarqachu, chaymi Davidqa anchata hukmanyarurqa. Hinaspapas runankunatam nirqa Saulta mana wañuchinankupaq. Machaymanta Saul lluqsiramuptinmi Davidqa kallpawan nirqa: “Munaspayqa wañurachikimanmi karqa”, nispa. Chaywanpas Saulqa Davidtaqa hinallam wañuchiyta munarqa.

Huk tutam Davidqa sobrinon Abisaiwan upallalla Saulman asuykururqaku. Saulta cuidaq Abnerpas puñurusqam, chaymi Abisaiqa Davidta nirqa: “¡Saqiykuway Saulta kunan wañurachinaypaq!”, nispa. Ichaqa Davidmi nirqa: “Ama, Jehova Diospa makinpiña saqiykusun. Ñuqanchikqa lanzantawan yakuyuq aysakullanta aparikusun”, nispa.

Chaymantam Davidqa urquman qispiruspan qaparirqa: “¡Abner! ¿Imanasqam kamachiq Saulta mana cuidarqankichu? ¿Maytaq kamachiqpa lanzanwan yaku aysakunqa?”, nispa. Saulñataqmi Davidta nirqa: “Wañurachiwankimanmi karqa, ichaqa manam chaytaqa munarqankichu. Yachaniñam Israel runakunapa kamachiqnin kanaykimanta”, nispa. Hinaspam Saulqa wasinman kutikurqa. Davidta Saul mana kuyaptinpas Saulpa wakin ayllunkunaqa kuyarqakum.