Leonkunapa kasqanman Danielta wischusqankumanta

¡YAW! Danielchusmi sasachakuypi kachkan. ¡Leonkunam ichaqa mana imanankupaschu! ¿Yachankichu imanasqa? ¿Pitaq Danielta chay leonkunapa kasqanman wischuykun? Qawasunchikyá.

Babilonia nacionpa reyninqa Dario sutiyoq runañam. Rey Dariopa agradonpaqmi Danielqa karqa allin ruraq chaynataq yachayniyoq runa kaspan, hinaptinmi gobiernasqan nacionpi Danielta churarurqa kamachikuqkunapa jefen kananpaq. Chaymi Danieltaqa wakin kamachikuqkuna envidiakuspanku kaynata rurarqaku:

Rey Darioman rispanku nirqaku: ‘Reyllayku, llapallaykum tanteanakuruniku huk decretota kamachinaykipaq 30 punchawkamayá ama pipas mañakuchunchu huk diostaqa nitaq huk runatapas, aswanqa qam reynillaykutayá. Pipas mana chayta kasukuqqa leonkunapa kasqan machaymanyá wischusqa kachun’ nispa. Darioqa manam yachanchu imapaqmi chay runakunaqa chay decretota munasqankuta. Ichaqa allinpaq hinata hapispanmi chay decretotaqa qellqarqa. Chaymi decretotaqa manañam cambiaytaqa atinmankuchu.

Chaymanta Daniel yacharuspanmi wasinman pasakurqa hinaspam sapa punchaw rurasqanman hina Diosta mañakurqa. Jehová Diosta mañakusqanta Daniel mana saqerunantam chay envidiakuq runakunaqa musyakurqaku. Chaymi munasqankuman hina Danielta wañuchinankupaqña kachkaptin kusikurqaku.

Chaymanta musyaruspanmi rey Darioqa sinchita llakikurqa. Ichaqa decretasqanta manañam cambiaytaqa atinmanchu, chaymi leonkunapa machayninman Danielta wischunankupaq kamachirqa. Hinaspanmi Danielta rey nirqa: ‘Servisqayki Diosnikiyá qamtaqa libraykusunki’ nispa.

Llakisqa kaspanmi rey Darioqa mana puñuspam achikyarurqa. Hinaptinmi paqarinnintinta kallparqa leonkunapa machayninman. Waqaya dibujopi Danielta qawamuchkan. Hinaspa qayarqa: ‘¡Kawsaq Diospa serviqnin Daniel! Servisqayki Diosnikiqa ¿yaqachum leonkunamanta libraykusurqanki?’ nispa.

Danielñataq nirqa: ‘Diosniymi angelninta kachamuspan mana imanawananpaq leonkunapa siminta wichqarachirqa’ nispa.

Llumpayllatañamá reyqa kusirikurqa. Hinaspanmi kamachirqa leonkunapa machayninmanta Danielta horqomunankupaq. Hinaptinmi Danielta wañuchiy munaqkunata leonkunapa kasqanman wischurachimurqa. Hinaspanmi manaraqpas chay mana allin runakuna pampaman chayaykuchkaptinku leonkuna pawaykuspa tisaparurqa llapallan tullunkupas chamchakunankama.

Hinaptinmi rey Darioqa qellqarqa kamachisqan nacionpi runakunaman kaynata: ‘Danielpa Diosninta manchakuywan respetaychik. Payllamiki milagrokunataqa ruran. Payllamiki leonkunapa mikusqan kananmantaqa libraykurqa Danieltapas’ nispa.