Daniel librasqa kasqanmanta

Media nacionniyuq Darioñam Babiloniapi kamachirqa. Paymi Danielta ancha riqsisqa runakunapa kamachiqnin kananpaq churarqa. Chay runakunam ichaqa Danielta chiqnirqaku, hinaspam wañuchiyta munarqaku. Chaymi punchawpi kimsa kutita Jehova Diosta Daniel mañakusqanmanta yachaspanku Dariota nirqaku: “Kamachiqllayku, lliw runakunatayá kamachiy qamllata mañakusunaykipaq. Mana kasusuqnikiqa leonkunapa kasqanmanyá wischuchikuchun”, nispa. Hinaptinmi Darioqa chayna kananpaq kamachirqa.

Danielqa kamachiqpa chayna tantiarusqanta yacharuspanmi, wasinpa ventanan lawpi qunqurakuykuspa Jehova Diosta mañakurqa. Chay chiqnikuq runakunañataqmi qunqayllamanta Danielpa wasinman yaykuruspanku mañakuchkaqta tarirurqaku, hinaspankum Darioman kamaslla kaynata willarqaku: “Danielqa kimsa kutikama Diosninta mañakuspanmi qamtaqa mana kasusunkichu”, nispa. Chayta uyariruspanmi Darioqa Danielmanta llumpayta llakikurqa, kamachisqan mana valeqña rikurinanpaqmi tukuy punchaw piensarqa, ichaqa manam paypas kamachiy hurqusqantaqa chinkachiytaqa atirqachu. Chaymi Danielta leonkunapa kasqanman wischuykachirqa.

Chay tutam Darioqa puñuytapas mana atispan llumpayta llakikurqa. Achikyaramuptinñataqmi leonkunapa kasqanman kallpaspa qaparirqa: “¡Daniel! ¿Libraykusunkichu Diosniki?”, nispa.

Danielñataqmi uyariruspan nirqa: “Diosniypa angelnin leonkunapa siminta taparuptinmi mana imanawanchu”, nispa. Chaymi Darioqa anchata kusikuspan chaylla Danielta hurquchirqa. Danielqa sanollam lluqsiramurqa, mana imanpas rachmisqa. Chaymantam Darioqa Danielta chiqniq runakunata leonkunapa kasqanman wischuykachirqa. Chaymi paykunataqa tisaparuspa leonkuna mikururqaku.

Chaymantam Darioqa kaynata kamachirqa: “Llapaykichikmi Danielpa Diosninta yupaychanaykichik. Paymi Danielta libraykun”, nispa.

Qampas, ¿Daniel hinachu sapa punchaw Diosta mañakunki?