85 KAQ WILLAKUY
Establopi Jesuspa nacesqanmanta
¿YACHANKICHU pitaq chay wawachaqa? Jesusmi. Chayllaraqmi chay establopi naceramun. Establoqa uywakuna waqaychanam. Mariaqa Jesustam siriykachichkan uywakunaman qarana artesapi. Ichaqa, ¿imanasqamá Joseywan Mariaqa kaypi uywakunawan kachkanku? Manamá chay sitioqa wawacha nacenanpaq hinachuqaya, ¿aw?
Manamá. Ichaqa Roma nacionpi kamachikuq Cesar Augustom kamachirqa llapa runankuna nacesqanku llaqtanman kutispa, padronachikunankupaq chaymi paykunaqa chaypi kachkanku. Joseyqa Belen llaqtayoq runam karqa. Hinaptin warmin Mariawan llaqtaman chayaramuptinku samana wasitaqa manam tarirqakuchu. Chaymi uywakunapa kasqan establoman rirqaku. Hinaptinmi, ¡hina chay punchawllapim Mariaqa wawan Jesusta wachakurqa! Ichaqa qawasqaykiman hina chay wawaqa allinllam kachkan.
¿Rikuchkankichu Jesusta qawanankupaq michiqkuna hamusqanta? Paykunaqa llaqtapa hichpan purunpim tuta kachkarqaku hinaptinmi muyuriqninkuta achkiy kancharirurqa. ¡Diospa angelninmá karqa! Chay michiqkunaqa anchallataña mancharikurqaku. Hinaptinmi paykunata angel nirqa: ‘Ama manchakuychikchu, allin noticiatam apamuchkaykichik. Salvaqnikichikmi nacerapusunkichik Belen llaqtapi. Payqariki Cristo Señormi. Sutillam pañalkunawan maytuykusqata tariykunkichik uywaman qarana artesapi siriykachisqata’ nispa. Hinaptinmi achkallaña angelkuna rikuriykamurqa hinaspam Diosta alabarqaku. Chayllam michiqkunaqa Jesusta maskaq pasarqaku, hinaspanmi tariramunku.
¿Yachankichu imanasqam Jesusqa mana wakin runakuna hinachu? ¿Yachankichu pim cheqaptapuni kasqanta? Yuyariy, kay libropi punta kaq willakuypim yacharqanchik Diospa piwi churinmanta. Hanaq pachata, cielota, Allpata chaynataq tukuy imakunatapas Jehová Dios unanchachkaptinmi payqa ruraysiqnin karqa. Paymá, ¡Jesusqa!
Cheqaptamá Jehová Diosqa hanaq pachapi Churin kachkaptin Mariapa wiksanman wawata hina churaykurqa. Chaypunillam Mariapa wiksanpi wawaqa wiñayta qallarirqa wakin wawachakuna mamanpa wiksanpi wiñasqanman hina. Chay wawacham ichaqa Diospa Churin karqa. Chaymantañam Belen llaqtapi uywakuna kasqan establopi nacerqa. ¿Musyakunkichu imanasqam Jesus nacesqanmanta angelkuna runakunaman willakuspa kusikusqankuta?