Jesuspa nacesqanmanta

Roma nacionta kamachiq Cesar Augustom nirqa lliw Juda runakuna nacesqanku llaqtaman rispa padronachikunankupaq. Chaymi Joseywan Mariaqa Belen llaqtaman rirqaku, Joseyqariki chay llaqtanmantam karqa. Mariaqa ñam unqukunanpaqña karqa.

Belen llaqtaman chayaruspankum maypipas samanankupaq mana kaptin animalkunapa sayananpiña samarqaku. Chaypim Mariaqa unqukurqa, hinaspam wawa naceruptin pañalkunawan wankuykuspa animalkunaman qarananku artesapi siriykachirqa.

Chay llaqtapa hichpanpim michiqkunapas ovejankuta chakrapi tuta cuidachkarqaku. Paykunamanmi qunqayllamanta Diospa angelnin rikuriykurqa, hinaptinmi muyuriqninkupi Jehova Diospa kanchayninta qawarqaku. Chaymi michiqkuna llumpayta mancharikuptinku chay angel nirqa: “Ama manchakuychikchu, sumaq willakuytam apamuchkaykichik. Kunanmi Belen llaqtapi Diospa akllasqan nacerun”, nispa. Rimayta tukuruptillanmi hanaq pachapi achkallaña angelkuna rikuriruspanku nirqaku: “Diosyá hanaq pachapi hatunchasqa kachun, kay pachapipas hawkayayyá kachun”, nispa. Chaynata niruspankum angelkunaqa chinkarurqaku.

Chayta uyariruspankum michiqkunaqa ninakurqaku: “Belenmanyá risun”, nispanku. Hinaspam utqayllamanña rispanku tarirurqaku Joseyta, Mariata chaynataq llullu wawachatapas.

Chay michiqkunaqa angelpa willasqantam willakurqaku, willakusqankuta uyariruspankum runakunaqa uyarayarqakuraq. Mariapas angelpa nisqanpim yuyaymanarqa, manam haykapipas angelpa willakusqantaqa qunqarqachu. Chaymantañataqmi michiqkunaqa Diosta agradecekuspanku kutikurqaku.