Jerusalenman rey hina Jesuspa yaykusqanmanta

ISKAYNIN ñawsakunata sanoyachisqanmantaqa manam unaymantachu Jesusqa Jerusalen llaqtapa hichpanpi kaq llaqtachaman rirqa. Hinaspam iskay discipulonkunata nirqa: ‘Riychik wak chimpa llaqtachaman, chaypim tarinkichik watasqa malta asnochata hinaspa paskaramuspa aysaramuychik’ nispa.

Chay asnota aparamuptinkum Jesusqa sillakuykurqa. Hinaspa hichpallanpi kaq Jerusalen llaqtaman rirqa. Chaymi llaqtaman hichpaykuchkaptin runakunaqa lloqsimurqaku Jesusta chaskiykunankupaq. Hinaptinmi achkallaña runakuna ñanman pachankuta mastarqaku. Wakinñataqmi palmera sachapa kallmankunata churarqaku hinaspa qaparirqaku: ‘¡Jehová Diospa sutinpi hamuq reytayá Diosqa bendecichun!’ nispa.

Ñawpa tiempopiraqmi Israel nacionpi reykunaqa asnopi sillakuykuspa Jerusalen llaqtaman yaykurqaku llapallan runakuna reqsinankupaq. Chaynatamá Jesusqa rurarqa. Chaynata rurasqankuwanmi chay runakunaqa qawachichkanku Jesus reyninku kananta munasqankuta. Ichaqa manamá llapallan runakunachu munan. Chayna kasqantam musyanchik temploman Jesus riruptin.

Templopim Jesusqa sanoyachirqa ñawsakunata chaynataq wistukunatapas. Hinaptinmi Jesuspa milagrokuna rurasqanta qawaspanku warmachakunaqa alabarqaku. Chaymi sacerdotekunaqa piñakuspanku Jesusta nirqaku: ‘¿Uyarichkankichu kay wamakunapa nisqanta?’ nispa.

Jesusñataqmi nirqa: ‘Arí, uyarichkanim. ¿Manachu Bibliapi leerqankichik: “Warmachakunawanmi alabaykachikuni niqta?”’ nispa. Chaymi warmachakunaqa hinalla alabarqaku Diospa churasqan reyta.

Ñoqanchikpas kay wawakuna hina kaytam munanchik, ¿aw? Wakin runakunaqa munanqakupaschá Diospa gobiernonmanta manaña rimananchikta. Ñoqanchikmi ichaqa hinallam willananchik runakunapa allinninpaq Jesuspa rurananmanta

Allpapiraq Jesus kachkaptinqa manam tiemporaqchu karqa kamachikuyta qallarinanpaqqa. ¿Haykapitaq chay tiempoqa karqa? Chaytam discipulonkunaqa yachayta munarqaku. Chaymantañam kunanqa yachasunchik.