Asnopa rimarisqanmanta

¿HAYKAPIPAS uyarirqankichu asno rimarisqanmanta? ‘Manam, uywakunaqa manam rimankuchu’ nispachá ninkiqa. Bibliam ichaqa willan huk asnopa rimarisqanmanta. Qawasunchikyá imaynam chayqa karqa.

Israelpa mirayninkunaqa Canaan allpaman yaykunankupaqña kachkanku. Moab nacionpa reynin Balacmi Israelpa mirayninkunata mancharikurqa. Chaymi qayachirqa Balaam sutiyoq sacre runata Israel runakunata ñakananpaq. Achka qollqeta paganankupaq tantearuptinkum Balaamqa asnonpi sillakuykuspan rey Balacwan tupananpaq rirqa.

Jehová Diosqa manam munanchu Llaqtantaqa Balaam ñakaykunanta. Chaymi angelta espada hapirisqata ñanpi sayaykuspa Balaamta harkananpaq kacharqa. Chay angeltaqa Balaamqa manam rikurqachu asnonmi ichaqa rikururqa. Chaymi asnoqa kutikuyta munarqa, chaymantañam pampapi sirikuykuyqa. Hinaptinmi Balaam rabiaruspan tawnanwan asnota waqtaparurqa.

Hinaptinmi Jehová Diosqa asnota rimarirachispa Balaamta uyarichirqa nisqanta. ‘¿Imanarqaykitaq maqawanaykipaq?’ nispam asnoqa tapuykurqa.

Balaamñataq nirqa: ‘Burlakuwasqaykiraykum maqayki. ¡Makiypi espada kaptinqa kunallanmi wañurachikiman!’ nispa.

Asnoñataqmi nirqa: ‘Manam huk kutillatapas kaynataqa rurarqaykichu’ nispa.

Balaamñataqmi nirqa: ‘Arí chaynam’ nispa.

Hinaptinmi Jehová Diosqa espada hapirisqata ñanpi sayachkaq angelta Balaamta qawarirachirqa. Angelñataqmi nirqa: ‘¿Imanasqataq asnoykita maqaparunki? Ñoqaqa hamurqani qamta harkanaypaqmi, rispaykiqa amam Israel runakunataqa ñakamunkichu. Asnoyki ñawpaqniymanta mana muyuruptinqa wañurachikimanmi karqa, asnoykitam ichaqa mana wañuchiymanchu karqa’ nispa.

Balaamñataq nirqa: ‘Huchallikurunim. Ñanpi sayarusqaykitaqa manam yacharqanichu’ nispa. Hinaptinmi angelqa mana harkarqachu Balaamta hinalla rispa Balacwan tupananpaq. Hinaspanmi Balaamqa Israel runakunata ñakaytaraq munarqa, Jehová Diosmi ichaqa Israel runakunata kimsa kutikama bendeciykachirqa.