116 KAQ WILLAKUY
Imatam rurana wiñaypaq kawsanapaq
¿YACHANKICHU kay warmacha amigochankunawan leesqanta? Qampa leesqayki . . . Bibliamanta willakuq libroytam leechkanku. Paykunapas... “Imatam rurana wiñaypaq kawsanapaq” leesqallayki willakuytam leechkanku.
¿Yachankichu imakunamantam yachachkanku? Puntataqa, Jehová Diosmanta hinaspa Churin Jesucristomantam wiñaypaq kawsananchikpaqqa yachana. Bibliapiqa kaynatam nin: ‘Wiñay kawsayniyoq kanapaqqa. Sapallan cheqap Diosta reqsina chaynataq Jesucristotapas reqsinam’ nispa.
¿Imaynatataq Jehová Diosmanta hinaspa Churin Jesusmanta yachachwan? Yachachwanmi Bibliamanta willakuq libroyta qallariyninmanta tukupayninkama leespa. Kay libroqa Jehová Diosmanta chaynataq Jesusmantapas allintam yachachin, ¿aw? Chaymantapas yachachinmi paykunapa rurasqankumanta chaynataq ruranankumantapas. Ichaqa manam kayllatachu leena.
¿Qawachkankichu chay huknin librota? Bibliamá. Kay libropa willakuyninkunapi rikuriq textokunata Bibliapi leechikuy. Bibliaqa yachachiwanchikmi Jehová Diosta allinta servinanchikpaq hinaspa wiñay kawsayta chaskinanchikpaq. Chaymi Bibliataqa sapa punchaw leenanchik.
Ichaqa Jehová Diosmantawan Jesuscristomanta yachayllachuqaya. Paykunamanta chaynataq yachachisqankumanta achkataña yachaspapas manaraqmi wiñay kawsaytaqa haypachwanraqchu. ¿Yachankichu imatawanmi rurana?
Chaymantapas Bibliapi yachasqanchikman hinam kawsananchik. ¿Yuyarichkankichu Judas Iscarioteta? Payqa Jesuspa 12 akllasqan apostolninkunamanta hukninmi karqa. Judasqa achkatam yacharqa Jehová Diosmanta chaynataq Jesusmantapas. Ichaqa, ¿imataq paytaqa pasarurqa? Tiempopa risqanman hina payqa kikillanpaq munaq rikuriruspanmi Jesusta 30 qollqepaq traicionarurqa. Chaymi Judasqa wiñay kawsaytaqa manam chaskinqachu.
¿Yuyarichkankichu 69 kaq willakuypi Giezi runamanta yachamusqanchikta? Mana paypa kaqta pachatapas chaynataq qollqetapas munapayarurqa, hinaspam llullakururqa hapikurunanpaq chaymi Jehová Diosqa castigarurqa. Chaynam ñoqanchiktapas castigawasun kamachikuyninkunata mana kasukuptinchikqa.
Chaymantapas willawanchiktaqmi Jehová Diosta allinta serviq achka runakunamanta. Paykuna hinam kaytaqa munanchik, ¿aw? Samuel sutiyoq warmachapa rurasqanmi allinqa qatikunanchikpaq. Yuyariy, 55 kaq Willakuypi yachasqanchikman hinam payqa tawa otaq pichqa watachayoqmi Jehová Diosman asuykuna karpanpi servirqaña. Chaynaqa warmacha kaspaykipas manam llumpay warmachachu kanki Diosta servinaykipaqqa.
Ichaqa, llapallanchikmi Jesucristota qatikuyta munanchik. Payqa 87 kaq Willakuypa nisqanpi hinam warma kaspapas hanaq pachapi Taytanmanta templopi runakunaman rimarqa. Rurasqanman hinayá qatikusunchik. Chaynaqa kallpanchakusunchikyá Jehová Diosmanta chaynataq Churin Jesucristomantapas runakunaman willamunanchikpaq. Chaykunata ruraspaqa Allpapi paraiso kaptinmi wiñaypaq kawsakusunchik.