Mosoq pachapi kusisqa kawsakuy
Kay tratadopa dibujonta qawaspayki, ¿imaynataq sientekunki? ¿Manachu munawaq kaypi hawka, kusisqa hinaspa tukuy imayoq kawsakuyta? Munankichá. Ichaqa, ¿mosqoyllachu otaq yanqallachu kanman kayna sumaq huertapi kawsakuyqa?
Chaynatam piensanku yaqa lliw runakuna: wañuchinakuy, yuyaqyay, onqoy hinaspa huk sasachakuykunapas kaptin. Chayna kaptinpas suyakuyniyoqmi kachwan. Diospa prometesqanman hinam Biblia willakun hamuq tiempopi ‘mosoq cielokunawan mosoq allpa’ kananmanta, chaypim “tukuy imapas allin arregloman hina rurasqa kanqa” (2 Pedro 3:13; Isaias 65:17).
Bibliapa nisqanman hina kay ‘mosoq cielokunaqa’ hinaspa ‘mosoq allpaqa’ manam qawasqanchik cielochu nitaq kay Allpa pachachu. Rikusqanchik cielowan Allpa pachaqa allin rurasqam kachkan, kaykuna wiñaypaq takyananmantam Bibliaqa nin (Salmo 89:36, 37; 104:5). ‘Mosoq allpa’ nispanqa rimachkan kay pachapi allin runakuna kawsanankumantam, ‘mosoq cielokuna’ nispanñataqmi rimachkan hanaq pachapi gobiernomanta, chay gobiernom kay Pachapi runakunata kamachimunqa. Hinaptinqa, ¿cheqaptachu ‘mosoq allpa’ otaq suma-sumaq huerta kanqa?
Qallariymantapacham Diosqa munarqa kay Allpa pacha suma-sumaq huerta kananta. Paymi Adantawan Evata Eden sutiyoq huertapi churaspan kamachirqa: ‘Wawa-churiyoqyá kaychik, kay pachamanyá huntaychik, [. . .] munaychakuychikyá allpapi’, nispan (Genesis 1:28). Chaynamá, Diosqa munarqam wawa-churiyoq kaspanku enteron Pachata sumaq huertaman tikranankuta. Ichaqa Diosta mana kasukusqankuraykum wiñay kawsayninkuta yanqacharurqaku, chaywanpas Diospa munayninqa manam cambiarqachu. Chayqa cumplikunqapunim mosoq pachapi (Isaias 55:11).
Padrenuestro oracionpi Diospa Munaychakuynin hamunanpaq mañakuspaykiqa, nichkankim mana allinkunamanta kay Pachata Dios librananta hinaspa gobiernanantapas (Mateo 6:9). Chayna mañakusqanchiktaqa Diosqa uyarinqam, Palabranmi nin: “Allin ruraq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku”, nispa (Salmo 37:29).
Mosoq pachapi kawsakuymanta
Diospa Gobiernonmi mana tupachiy atina bendicionkunata kay Pachapaq ruranqa, chaywanmi Diosqa cumplinqa serviqninkuna imayna kawsananpaq ñawpaqmantaraq munasqanta. Manañam kanqachu cheqninakuy, chaymi kay Pachapi lliw runakuna kuyanakuspa kawsanqaku. Diosmi prometen ‘guerrakunata kay pachapa cantonkama tanirachinanpaq’. “Manañam nacionpurapas peleanqakuñachu. Guerrapaqpas manañam yachanqakuñachu.” (Salmo 46:9; Isaias 2:4.)
Hinaptinmi kay Pachaqa sumaqllaña huerta kanqa. Bibliam nin: “Chunniq sitiom kusikunqa. Chaki allpam anchata kusikunqa. Purun waytakuna hinam waytanqa. [. . .] Chaki allpakunapim mayukuna kallpanqa. Chay chaki allpapim qochakuna kanqa. Chay chaki allpapim pukyukuna kanqa”, nispa (Isaias 35:1, 6, 7).
Kay Pacha sumaq huerta kaptinqa mayna kusikuychá kanqa. Manam pipas yarqaymantaqa kanqañachu. Bibliam nin: “Allpanchikqa sinchitam rurunqa”, nispa (Salmo 67:6; 72:16). Diospa prometesqanman hinam, llamkasqankuwan lliw kusikunqaku: ‘Wasikunatam hatarichinqaku hinaspam chaypi yachanqaku. Uvas huertakunatam plantanqaku hinaspam rurunta mikunqaku. [. . .] Manam sapaq runachu rurunta mikunqa’. (Isaias 65:21, 22.)
Mosoq pachapiqa manañam qemiy-qemiy wasikunapiñachu kawsanqaku, Diosqa ninmi: “Wasikunatam hatarichinqaku hinaspam chaypi yachanqaku. [. . .] Ichaqa manam sapaq runakuna yachananpaqñachu”, nispa. Nintaqmi: “Llamkanqakupas manañam yanqapaqchu”, nispa (Isaias 65:21-23). Kaykunam qawachin lliw runakuna allin llamkayniyoq kanankuta. ¡Mayna sumaqmi chaypi kawsayqa kanqa!
Eden huertapi hina hawkayay kananpaqmi Diospa Gobiernonqa yanapanqa chaymi animalkunaqa manaña dañanakunqakuñachu, manataqmi runakunatapas imananqachu. Bibliam nin: “Atoqwan malta carnerom hawkaña kawsanqa. [Leonwan] uña cabram kuskaña waqtapanqaku. Leonwan malta toropas kuskañam wiñanqaku. Warmachapa pusasqanñam chaykunaqa kanqaku”, nispa (Isaias 11:6-9; Oseas 2:18).
Manam chayllachu, kay Pacha paraiso kaptinqa lliw onqoykunam chinkachisqa kanqa. Bibliam nin: “Manañam mayqannikichikpas ninkichikñachu: ‘Onqochkanim’ nispaqa” (Isaias 33:24). “Diosmi pichanqa paykunapa weqenta, manañam kanqachu wañuypas, [. . .] waqaypas nitaq nanaypas. Ñawpaq kaqkunaqa pasarunñam” (Apocalipsis 21:4).
Imatam rurawaq chaypi kanaykipaq
Kusikunkichá Diospa prometesqan mosoq pachapi hawka kawsakuymanta yachasqaykiwanqa. Wakin runakunapaq chayna kawsakuy mosqoy hinalla kaptinpas, kuyakuq Diosninchikqa cumplinqapunim prometesqantaqa (Salmo 145:16; Miqueas 4:4).
Kay Pachapi wiñaypaq suma-sumaq huertapi kawsayta munaspaqa, kaykunatam rurana. Jesusmi Diosta mañakuspan nirqa: “Chay wiñay kawsayniyoqqa kanku sapallan cheqap Dios kasqaykita reqsiqkunam hinaspa kachamusqayki Jesucristota reqsiqkunam”, nispa (Juan 17:3).
Chaymi Diospa prometesqan mosoq pachapi kawsayta munaspaqa, Diospa munayninmanta puntata yachananchik hinaspa kasukunanchik. “Kay pachapi mana allin ruraykunawan mana allin munaykunaqa tukuruqllam, Diospa munasqanman hina ruraqmi ichaqa wiñaypaq takyanqa”. Chayta ruraspaqa kuyakuq Jehová Diosninchikmantam bendicionninkunata wiñaypaq chaskisunchik (1 Juan 2:17).
Kaypi rikuriq textokunaqa horqosqam kachkan Chuya Qellqa Bibliamanta.