Sumaq huertapi kawsakuyta munaspaqqa kunanmantam Diosta kasukunanchik.

¡Pisi tiempollamantañam sumaq huertapi kawsakusunchik!

Diosninchikqa kay allpa pachatam unancharqa kasukuqnin runakuna wiñaypaq kawsakunankupaq (Salmo 37:29). Chaymi Adantawan Evata huk sumaq huertapi churarqa, hinaspam kamachirqa kawsaykunata tarpukuspanku kay allpa pachata waqaychanankupaq (Genesis 1:28; 2:15).

Kunanqa, kay allpa pachanchikqa manamá Diospa nisqanman hina sumaq huertachu kachkan. Chaywanpas, Diosqa hinallam munachkan kay allpa pachanchikta sumaq huertayachiyta. Chaypaqqa mana allin runakunatam chinkachinqa, chaynapi kasukuqnin runakuna kawsakunankupaq. Chaynaqa, kay allpa pachanchik sumaq huertaña kaptinqa ¿imaynañataq kawsakusunchik?

Enteron allpa pachapim huk gobiernollaña kanqa

Pisi tiempollamantañam Diospa gobiernon hanaq pachamanta kay allpa pachata gobiernamunqa. Hinaptinqa llapallanchikmi kusisqaña kawsakusunchik, hinaspapas hawkañam llamkakusun. Taytanchik Jehova Diosqa Jesustam kamachiqninchikta churaykun. Jesusqa manam kay allpa pachapi gobiernaqkuna hinachu, aswanqa munan kusisqa kawsakunanchiktam. Chaymi payqa kuyakuywan, llakipayaspa sumaqta gobiernawasunchik (Isaias 11:4).

Huk sunqullañam kawsakusunchik

Riqsinakuq amistadkunam kusisqallaña sumaq huertapi mikuchkanku.

Maymantaña kaspanchikpas, ima kastamantaña kaspanchikpas huk sunqullañam kawsakusunchik (Apocalipsis 7:9, 10). Kay enteron allpa pachapi runakunam Diosninchikta kuyasunchik, kikinchikpurapas kuyanakusuntaqmi. Chaymantapas llapallanchikmi huk sunqullaña llamkakusunchik, chaynapi allpa pachanchikta cuidananchikpaq (Salmo 115:16).

Manañam imapas ñakarichiwasunchu

Jesusña gobiernawaptinchikqa manañam kanqachu llumpay wayrapas, llumpay parapas nitaq terremotokunapas (Salmo 24:1, 2). Kay allpa pachapi kaspanmi Jesusqa wayra-parata hawkayachirqa. Chaywanmi qawachiwanchik wayra-parapas taytanpa atiy qusqanwan makillanpi kasqanta (Marcos 4:39, 41). Jesusña kay pachata gobiernaptinqa manañam wayra-parapas waqachiwasunñachu. Animalkunawanpas hawkañam kawsakusun. Manañam pipas allpa pachanchiktaqa qachachanqachu (Oseas 2:18).

Manañam unqusunchu, mikuypas llapallanchikpaqmi kanqa

Llapallanchikmi sanoña kasunchik. Manam pipas unqusunñachu, nitaq yuyaqyasunñachu nitaq wañusunñachu (Isaias 35:5, 6). Sumaq huertapim kawsakusunchik Adanwan Eva hina. Jesusña gobiernawaptinchikqa kawsaykunapas achkanpim qispinqa. Chaymi mikuyninchikpas llapallanchikpaq kanqa Eden huertapi hina (Genesis 2:9). Israel naciontam Dios nirqa: ‘Saksanaykichikkamam mikunkichik’, nispa. Chayna nisqantam ñuqanchikpas qawasunchik sumaq huertapi (Levitico 26:4, 5).

Tukuy rikchaq frutakuna, verdurakuna chaynataq tantakunapas.

Hawkañam kawsakusunchik

Jesusña gobiernawaptinchikqa manañam kanqachu waqachinakuyqa, aswanqa llapallan runakunam kuyakuqllaña kanqaku. Manañam kanqachu wañuchinakuypas. Bibliapipas niwanchikmi: “Sapakamam uvas plantankupa llantuyninpi tiyakunqaku. [...] Manaña pipapas manchachisqanmi hawkaña kakunqaku”, nispa (Miqueas 4:3, 4).

Llapallanchikpam wasinchikpas, llamkayninchikpas kanqa

Arí, llapallanchikmi wasiyuqña kasunchik, kusisqataqmi llamkakusunpas. Bibliapas ninmi llapallanchik mana yanqapaq llamkananchikmanta (Isaias 65:21-23).

Yachayniyuqmi kasun

Bibliam nin: ‘Enteron kay pachapi runakunam riqsinqaku tayta Diosta’, nispa (Isaias 11:9). Llapallanchikmi Diospa yachachisqan kasunchik. Chaymantapas, unanchasqankunapim Diospa yachayninta qawasunchik. Imapas yachasqanchikwanqa manam pitapas wañuchinapaqqa armakunataqa ruwasunchu, aswanqa hawkam kawsakusunchik allpa pachanchikta waqaychaspa (Salmo 37:11; Isaias 2:4).

Wiñaypaqmi kawsakusunchik

Diosninchikqa wiñaypaq kusisqa kawsakunanchikpaqmi kay allpa pachanchikta tukuy imayuqta unanchapuwarqanchik (Salmo 37:29; Isaias 45:18). Wiñaypaq kawsakunapaqqa Diosninchikmi ‘wañuyta chinkachinqa’ (Isaias 25:8). Bibliaqa niwanchiktaqmi manaña “llakikuypas, waqaypas nitaq nanaypas” kananmanta (Apocalipsis 21:4). Jehova Diosninchikqa kasukuqnin runakunata chaynataq kawsarimuq runakunatam sumaq huertapi wiñaypaq kawsakunankupaq churanqa (Juan 5:28, 29; Hechos 24:15).

Kusisqallañam kawsariramuq amistadninkuta, ayllunkuta abrazaykuchkanku.

Kunanpas waranqantin runamasinchikkunam Jehova Diospa munasqanman hinaña kawsakunankupaq kallpanchakuchkanku. Chaynapi Diospa gobiernonpi kawsakunankupaq. Chaypaqqa ¿imatam ruwachkanku? Jehova Diostawan churin Jesustam sumaqta riqsichkanku (Juan 17:3).

Pisi tiempollamantañam Diospa piñakuynin punchawqa chayamunqaña. Chay punchawpi mana wañuyta munaspaqqa Jehova Diospa testigonkunata niwayku Kusisqa kawsakunapaq sutiyuq librowan bibliamanta yachachinaykupaq. Mana qullillapaqtaqmi yachachisqaykiku.