3 kaq yachachikuy
¿Pitaq Jesucristo?
¿Imaynanpim Jesús Diospa “piwi” Churin? (1)
¿Imanasqam Jesusta “Palabra” nispa sutichakun? (1)
¿Imanasqam Jesús runa hina Allpaman hamurqa? (2-4)
¿Imanasqam milagrokunata rurarqa? (5)
¿Imatam hamuq tiempopi Jesús ruranqa? (6)
1. Manaraq Allpaman hamuchkaspam Jesusqa, cielopi kawsarqa espíritu hina. Diospa punta unanchasqanmi; chayraykum Diospa “piwi” Churin. (Colosenses 1:15; Revelación 3:14.) Diosllam Jesustaqa unancharqa, mana pipa yanapasqan. Cielopi kachkaspam Jesusqa Jehovapa “llamkaqmasin” karqa, paymi yanaparqa cielopipas Allpapipas imaymana rurayta. (Proverbios 8:22-31; Colosenses 1:16, 17.) Diosmanta principal rimaqmi karqa. Chayraykum Jesusta sutichakun “Palabra”, nispa. (Juan 1:1-3; Revelación 19:13.)
2. Diosmi Churinta Allpaman kachamurqa vidanta Mariapa wiksanman churamuspa. Chaymi Jesuspa taytanqa mana runachu; chayraykum mana huchayoq chuya runa. Kimsa razonraykum Diosqa Jesusta kachamurqa: 1) Diosmanta cheqapta yachachiwananchikpaq (Juan 18:37), 2) Diospaq hunta sonqo kananpaq, chayta qawaspa pay hina kananchikpaq (1 Pedro 2:21), 3) ñoqanchikrayku vidanta qospa huchamanta wañuymantawan librawananchikpaq. ¿Imanasqam chay sacrificio necesitakurqa? (Mateo 20:28.)
3. Diospa kamachisqanta mana kasukuspam, Adanqa pantarqa, chaytam Biblia nin “hucha”, nispa. Chayraykum, wañuyman Diosqa sentenciarqa. (Génesis 3:17-19.) Diospa leyninta mana kasukuptinmi, chuya kaynin tukurqa. Chaymi pisi pisillamanta machuyaspa, wañurqa. Adanmi lliw churinman huchata saqen. Chayraykum ñoqanchikpas machuyanchik, onqonchik wañunchikpas. ¿Imaynatam runata salvanman? (Romanos 3:23; 5:12.)
4. Jesusqa Adán hina perfectom karqa. Manam ichaqa huchallikurqachu, aswanmi hatun pruebapipas Jesusqa Diosta kasukuqpuni. Chayraykum, payqa sacrificarqa chuya kawsayninta Adanpa huchanta pagananpaq. Chay rurasqantam Bibliaqa sutichan “rescate”, nispa. Chaynapim Adanpa llapan churinkuna wañuymanta kacharichisqa kanmanku. Lliwmi Jesuspi iñiqqa huchankumanta pampachasqa kanmanku wiñay kawsaytapas chaskinmanku. (1 Timoteo 2:5, 6; Juan 3:16; Romanos 5:18, 19.)
5. Allpapi kachkaspam, Jesusqa onqosqakunata hampirqa, yarqasqakunata mikuchirqa, hatun wayrakunatapas sayachirqa. Wañusqakunatapas kawsarichirqam. ¿Imanasqam milagrokunata rurarqa? 1) Llakipayaqmi ñakariq runakunata chaymi yanapayta munarqa. 2) Milagronkunam rikuchirqa Diospa Churin kasqanta. 3) Rikuchirqataqmi Rey hina Allpata kamachimuspa kasukuq runakunapaq rurananta. (Mateo 14:14; Marcos 2:10-12; Juan 5:28, 29.)
6. Jesusqa wañurqam, espiritual cuerpopi Dios kawsarichiptintaq cieloman kutirqa. (1 Pedro 3:18.) Chaymantañam Rey kananpaq Dios churarqa. Jesusqa tukuchinqañam Allpapi mana allin kawsaytapas ñakariytapas. (Salmo 37: 9-11; Proverbios 2:21, 22.)
[7 kaq paginapi dibujokuna]
Kay Allpapi kachkaspam Jesusqa, yachachirqa, milagrokunata rurarqa vidantapas ñoqanchikrayku ofrecerqa