¿Imanasqataq Jesusqa ñakarirqa hinaspa wañurqa?

¿Munawaqchu wiñaypaq kawsakuyta? Achka runakunam ninmanku: “Arí”, nispa. Ichaqa ninkum llapallanchik wañuqlla kasqanchikta hinaspa wañukuptinchik imapas tukusqanta.

Ichaqa ima nichwantaq: “¿Munawaqchu kunallan wañukuyta?”, nispa tapuykuwaptinchik. Manachá pipas “arí” nichwanchu. Chaynataqa ninchik sasachakuykunaña kaptinpas kawsakuyta munaspanchikmi. Bibliam nin mana wañuy munaqta Dios unanchawasqanchikmanta, ninmi: ‘Runakunamanmi qurqa wiña-wiñaypaq kaqkunamanta piensanankupaq’, nispa (Eclesiastes 3:11).

Ichaqa manamá pipas wiñaypaqqa kawsanchu. Chaynaqa, ¿imanasqataq wañunchik? ¿Yaqachu Diosqa imallatapas ruwarun mana wañunanchikpaq? Chaymanta yachanapaqmi Jesuspa imanasqa ñakarisqanmantawan wañukusqanmanta yachananchik, bibliam chaymanta allinta willawanchik.

¿IMANASQATAQ WAÑUNCHIK?

Bibliapi Genesis sutiyuq qillqam willawanchik Adantawan Evata wiñaypaq kawsanankupaq Dios unanchasqanmanta hinaspa chayna kawsakunankupaq ima ruwanankuta Diospa kamachisqanmantapas. Willawanchiktaqmi mana wiñaypaq kawsasqankumantapas. Bibliapiqa chaylla entiendenapaqmi chaykunamanta willawanchik, chaymi wakinqa ninku cuentolla kasqanta. Ichaqa Genesis qillqapas Jesusmanta bibliapi willakuq qillqakuna hinam mana llullakuspa imam kaqta willawanchik.a

¿Imapim tukurqa Adanpa mana kasukusqan? Bibliam nin: “Huk runallawan kay pachapi huchallikuy qallariruptinmi chayrayku wañuypas rikurirurqa chaymi lliw runakuna huchallikuspanchik wañunchik”, nispa (Romanos 5:12). Diosta mana kasukuspanmi Adanqa huchallikururqa, chaymi yuyaqyaspan wañurqa. Adanpa miraynin kasqanchikraykum huchayuqña nacenchik, chaymi unqunchik, yuyaqyanchik hinaspa wañunchik. Bibliapa nisqanqa tupanmi churikuna tayta-mamanman rikchakusqanmanta yachaysapa runakunapa nisqanwanpas. Ichaqa, ¿imatam Diosqa ruwarqa mana wañunanchikpaq?

¿IMATAM DIOSQA RUWARQA?

Diosqa munachkanmi wiñaypaq kawsananchikta hinaspapas tukuy imatam ruwarun manaña wañuspa kawsakunapaq.

Bibliam nin: “Huchallikuypa pagonqa wañuymi”, nispa (Romanos 6:23). Huk rimaypiqa nichkanmi huchallikusqanchikrayku wañusqanchikta. Chaymi Adanpas huchallikusqanrayku wañurqa. Ichaqa manamá ñuqanchikqa huchayuqchu karqanchik Eden huertapi tukuy ima pasakusqanmantaqa, chaymi Diosqa llakipayawaspanchik churin Jesucristota ñuqanchikrayku wañunanpaq kachamurqa. ¿Imanasqam chayta ruwarqa?

Adanqa mana huchayuqmi karqa, pay mana kasukusqanraykum llapallan runakuna huchayuqña nacespa wañunchik, chayraykum wañuymanta librawananchikpaqqa Adan hina mana huchayuq hinaspa wañukunankama kasukuq runa hamunan karqa. Bibliam nin: ‘Chullalla runapa mana kasukusqanwanmi achkallaña runakuna huchasapa rikurirurqaku, chullalla runapa kasukusqanwantaqmi achkallaña runakunaqa mana huchayuqña rikurinqaku’, nispa (Romanos 5:19). Chay kasukuq ‘chullalla runaqa’ Jesusmi, payqa mana huchayuqmi karqab, hanaq pachapi kawsakuchkaspanmi kay pachaman hamuspan ñuqanchikrayku wañurqa. Jesuspa wañukusqanraykum Diosqa mana huchayuqta hinaña chaskiwaspanchik wiñay kawsayta quwasun.

¿IMANASQATAQ JESUSQA ÑAKARIRQA HINASPA WAÑURQA?

¿Imanasqataq Jesusqa wañunanraq karqa runakunata huchamanta librananpaqqa? ¿Manachu Diosqa runakunataqa pampachaylla-pampachaykunman karqa? Chay ruwaytaqa atinmanmi karqa, ichaqa chaynata ruwaspanqa kamachisqantachá kikin mana kasukuchkanmanchu karqa. Chay kamachisqanqa allinta imatapas ruwananpaqmi allin karqa, manam munasqanman hina utaq paypaq allin kaptillan ruwananpaqchu (Salmo 37:28).

Kamachisqanman hina Dios mana ruwaptinqa, nichwanpaschá karqa: “Diosqa manam yapapipas kamachisqanman hinachu ruwanqa, manam allintachu akllanqa wiñay kawsanankupaq kaqkunataqa, hinaspapas manam lliw nisqankunatachu ruwanqa”, nispa. Ichaqa kamachisqanman hinam Diosqa ruwarqa, chaymi mana iskayrayachwanchu imatapas allintapuni ruwananmantaqa.

Jesuspa ñuqanchikrayku wañukusqanwanmi Diospa munasqanman hina kay pacha sumaq huerta kaptin wiñaypaq kawsakusun, chaymi Jesuspas nirqa: ‘Diosqa ancha-anchatam kuyarqa runakunata, chaymi sapallan churinta qumurqa pipas paypi iñiqqa manaña puchukaspa wiñaypaqña kawsananpaq’, nispa (Juan 3:16). Churinta wañunanpaq kachamusqanwanmi yachanchik Diosqa allin ruwaq kasqanta hinaspa llumpayta kuyawasqanchikta.

Ichaqa, ¿imanasqataq Jesusqa llumpayta ñakarispan wañurqa? Llumpayta ñakarispan wañukunankama kasukuspanmi Jesusqa qawachirqa diablo llulla kasqanta, diabloqa ninmi runakunaqa ñakarispanku utaq sasachakuypi kaspanku Diosta mana kasukunankuta (Job 2:4, 5). Adan mana huchayuq kachkaspanpas mana kasukuptinchá diabloqa piensarqa nisqan chiqap kasqanta. Jesuspas mana huchayuqmi karqa, ichaqa llumpayta ñakarispanpas Diostam kasukurqa (1 Corintios 15:45). Kasukuspanmi Jesusqa qawachirqa Adanpas kasukuy atisqanta. Tukuy imapi kasukusqanraykum Jesustaqa qatipakuchwan (1 Pedro 2:21). Chayna kasukusqanraykutaqmi Diosqa hanaq pachapi wiñaypaq kawsakuytapas quykun.

¿IMAYNATAM JESUSPA WAÑUKUSQANQA YANAPASUNKI?

Manamá iskayrayachwanchu Jesuspa wañukusqanmantaqa hinaspa wañukusqanrayku wiñay kawsakunanchikmantapas. Chaymi kaqmanta tapuykiku: “¿Munawaqchu wiñaypaq kawsakuyta?”, nispa. Jesusmi wiñaypaq kawsanapaq ima ruwananchikmanta nirqa: ‘Diosqa ancha-anchatam kuyarqa runakunata, chaymi sapallan churinta qumurqa pipas paypi iñiqqa manaña puchukaspa wiñaypaqña kawsananpaq’, nispa (Juan 17:3).

Kay qillqa ruwaqkunaqa munanikum Diosta hinaspa Jesucristota riqsinaykita. Jehova Diospa testigonkunam chaypaq yanapasunki. Astawan yachanaykipaq yaykuy internetpi jw.org nisqanman.